វិទ្យុជាតិកម្ពុជា៖ គឹមហឿនស្ទឹងត្រែង ០១ /០២ / ២០២១
MC៖ ផ្លូវបេតុងប្រវែងជាង៦០០ម៉ែត្រទទឹង០៦ម៉ែត្រ ចូលទៅកាន់ភូមិកាតូត នៅឃុំកំភុន ស្រុកសេសានខេត្តស្ទឹងត្រែង ត្រូវបានបើកសម្ពោធឱ្យប្រើប្រាស់ហើយ ដើម្បីបង្កលក្ខណៈងាយស្រួលជូនដល់ប្រជាពលរដ្ឋ បានធ្វើចរាចរណ៍ទៅមក បានស្រួលនៅឆ្នាំ២០២១នេះ។
អ្នកយកព័ត៌មានយើងប្រចាំខេត្តស្ទឹងត្រែងធ្វើសេចក្តីរាយការណ៍
ក្នុងពិធីសម្ពោធផ្លូវបេតុង ឯកឧត្តមឡូយសុផាតអ្នកតំណាំងរាស្ត្រមណ្ឌលស្ទឹងត្រែង មានប្រសាសន៍ទទួលស្គាល់ថា៖ ពីដើមឡើយប្រជាជនរស់នៅតំបន់ភូមិការតូតនេះ គ្មានផ្លូវចេញចូលទេ ដោយសារតែមានទឹកហូរចេញពីចង្កេះភ្នំមកបង្កលក្ខណៈងាយស្រួល រស់នៅទើបបងប្អូននាំគ្នាមកនៅតំបន់នេះ ប៉ុន្តែពិបាកក្នុងការធ្វើ ដំណើរ។
ឯកឧត្តមបានលើកទឹកចិត្តឱ្យបងប្អូនប្រជាពលរដ្ឋយើងទាំងអស់ ថែរក្សានូវសមិទ្ធផលផ្លូវដែលយើងមានហើយនេះ ហើយត្រូវ ចូលរួមជាមួយអាជ្ញាធរប្រឹងប្រែងអភិវឌ្ឍន៍មូលដ្ឋានបន្តទៅទៀត (សំឡេង)................។
លោក សុវណ្ណពិសេដ្ឋអភិបាលស្រុកសេសានបាន បញ្ជាក់ថា៖ផ្លូវមួយខ្សែនេះ ជាទីតាំងចំណុចឆ្លងកាត់ភាពលំបាក ឡើងជម្រាលភ្នំ រអិល ស្ទើរ ឡើងពុំរួច ប្រជាពលរដ្ឋដឹកកសិផល សិស្សនុសិស្សធ្វើដំណើរក៏លំបាក ទើបអាជ្ញាធរ ស្រុកបានឯកភាពគ្នា សម្រេចចំណាយថវិកាមូលនិធិស្រុកផងនិងឃុំផងជិត៥០០ លានរៀល សាងសង់ជាផ្លូវបេតុងជូនប្រជាពលរដ្ឋ ដើម្បីងាយស្រួលធ្វើចរាចរណ៍ទៅមក។
លោក វណ្ណវែង តំណាងឱ្យជនជាតិដើមភាគតិចព្រៅបានសាទរពេលទទួលបានសមិទ្ធផលនេះ ព្រោះពេលមានផ្លូវបេតុងថ្មីហើយ បងប្អូនជនជាតិព្រៅនៅភូមិការតូត ធ្វើដំណើរបានស្រួល ជាពិសេស ពេលឈឺម្តងៗ ចេញទៅមន្ទីរពេទ្យខេត្តបានទាន់ចិត្ត។
លោកថា៖បងប្អូនប្រជាពលរដ្ឋនឹងរួមគ្នាថែរក្សា ហាមប្រាមមិនឱ្យរថយន្តធំដឹកធ្ងន់ បើកបរឆ្លងកាត់លើផ្លូវបេតុងនេះទេ ដើម្បីទុកជាប្រយោជន៍ប្រើប្រាស់បាន យូរអង្វែង។
សូមបញ្ជាក់ថា៖ផ្លូវនេះអាចធ្វើដំណើរចេញទៅភូមិកំភុនក៏បាន ហើយកសិករដឹកជញ្ជូនផលកសិកម្មចេញទៅផ្លូវជាតិលេខ ៧៨ ទៅកាន់ទីប្រជុំជន (អូរពងមាន់)ក្រចេះ ស្ទឹងត្រែង រតនគិរី និងទៅដល់ទីរួមខេត្តស្ទឹងត្រែងផងដែរ៕
Comments