វិទ្យុជាតិកម្ពុជា ៖ លោក អេង យូ
សៀមរាប ៖ អាជ្ញាធរជាតិអប្សរាគ្រោងដោះលែងសត្វស្លាបកម្រៗចំនួន៣ ប្រភេទ ចូលទៅក្នុងព្រៃឧទ្យានអង្គរឱ្យរស់នៅមានសេរីភាពវិញ ក្រោយពីទទួលបានពីរដ្ឋបាលព្រៃឈើភ្នំពេញ និងអង្គការដៃគូ។
លោក ជូរ៉ា ឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិបានឱ្យដឹងថាគម្រោងដោះលែងសត្វព្រៃ ក្នុងឧទ្យានអង្គរ ក្រោមកិច្ច សហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance បានដឹកជញ្ជូនសត្វស្លាបកម្រចំនួន៣ប្រភេទនេះ សរុបចំនួន១១ក្បាល មកកាន់ព្រៃរមណីយដ្ឋានអង្គរ ក្នុងគោលបំណង បង្កើនចំនួនសត្វព្រៃ ថែរក្សា ការពារសត្វទាំងនោះឱ្យរស់
នៅប្រកប ដោយសុវត្ថិភាព និងជាសក្តានុពលបម្រើវិស័យទេសចរ ក្រៅពីការទស្សនាប្រាង្គប្រា សាទ ក្នុងតំបន់រមណីយដ្ឋានអង្គរ។
លោកបន្តថា សត្វស្លាបទាំង នោះរួមមាន សត្វក្ងោក (Peafowl) ចំនួន៥ក្បាល សត្វកេងកងធំ(Great Hornbill) ចំនួន៣ក្បាល និងសត្វព្វាំង(Wreathed Hornbill) ចំនួន៣ក្បាល ដែលទទួលបានជាអំណោយពីអង្គការអភិរក្សសត្វព្រៃនានា និងប្រជាពលរដ្ឋ យកមកផ្សាំងនៅក្នុងព្រៃរមណីយដ្ឋានអង្គរដែលក្រុមការងារគម្រោងនឹងធ្វើការដោះលែងសត្វស្លាបទាំងនេះចេញពីទ្រុងចូលទៅក្នុងព្រៃនាពេលខាងមុខ។
សំឡេង ៖ ទាក់ទងនឹងសត្វ ៣ ប្រភេទដែលយើងគ្រោងដោះលែង ក្នុងព្រៃឧទ្យានអង្គរហ្នឹង មានក្ងោក៥ក្បាល សត្វព្វាំង៣ក្បាល និងកេងកងធំ៣ក្បាល សត្វទាំងអស់នេះបានមកមួយចំនួន បានមកពីអង្គការអភិរក្សសត្វព្រៃនិងមានប្រជាពលរដ្ឋជាអំណោយតាមរយៈអង្គការសម្ព័ន្ធមិត្តសត្វព្រៃនិងខាងរដ្ឋបាលព្រៃឈើ ដែលសហការជាមួយយើងក្នុងគម្រោង ដោះលែងសត្វព្រៃក្នុងឧទ្យានអង្គរ ក្នុងគោលបំណងធ្វើឱ្យព្រៃនៅឧទ្យានអង្គរ មានសត្វកើនឡើងវិញ យើងខិតខំប្រមូលសត្វព្រៃ មកដោះលែង ឱ្យព្រៃយើងមានសត្វ ដើម្បីបម្រើឱ្យភ្ញៀវទេសចរ ក្រៅពីការទស្សនាប្រាសាទនិងសហគមន៍ គាត់អាចមកមើលព្រៃនិងសត្វព្រៃ។
សូមជម្រាបផងដែរថា កន្លង មកក៏ធ្លាប់មានការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ(Pileated gibbon) ចំនួន១១ក្បាល សត្វឈ្លូស (Red muntjac) ចំនួន៤ ក្បាល សត្វស្វាព្រាម (Silvered langurs) ចំនួន១២ក្បាល សត្វសំពោចក្រអូប(Common palm civets) ចំនួន៥ ក្បាល សត្វភេខ្លួនរលោង (Smooth-coated otter) ចំនួន៤ក្បាល សត្វឆ្មាដាវ (Leopard Cat) ចំនួន២ក្បាល និងសត្វកេងកងតូច(Oriental Pied Hornbill) ចំនួន២ក្បាល និងសត្វផ្សេងៗមួយចំនួនទៀត។ ដែលរហូតមកដល់សព្វថ្ងៃសត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ។
ដើម្បីឱ្យសត្វព្រៃទាំងអស់បន្តវត្តមាននៅក្នុងព្រៃធម្មជាតិនៃឧទ្យានអង្គរ យើងនឹងបង្កើនចំនួនបន្ថែមទៀត អាជ្ញាធរជាតិអប្សរា នឹងគ្រោងដោះ លែងសត្វព្រៃក្នុងឧទ្យានអង្គរ សូមអំពាវនាវជូនសាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា ជៀសវាងពេលប្រទះឃើញមានបំណងមិនល្អ និងមេត្តាកុំផ្តល់ចំណីឱ្យសត្វទាំងនោះ៕
Comments