កូរ៉េខាងត្បូងបង្កើនល្បឿនចាក់ វ៉ាក់សាំងចំពេលករណីថ្មីថយចុះបានបន្តិចបន្តួច

វិទ្យុជាតិកម្ពុជា ៖ កញ្ញា ខៀវ ណាវីន 

បរទេស ៖ ទិន្នន័យពីទីភ្នាក់ងារត្រួតពិនិត្យនិងបង្ការជំងឺកូរ៉េ (KDCA) បានបង្ហាញថាប្រទេសកូរ៉េខាងត្បូងបានចាក់វ៉ាក់សាំងការពារជំងឺកូវីដ-១៩បានចំនួន ៨៥៧.០០០ ដូសកាលពីថ្ងៃច័ន្ទទី ៧ ខែមិថុនា ដោយបានបង្កើតកំណត់ត្រាប្រចាំថ្ងៃក្នុងការចាក់ថ្នាំបង្ការរបស់ខ្លួន ដែលបានយកអត្រាចាក់វ៉ាក់សាំងដល់ ១៦,៤ ភាគរយសម្រាប់កម្រិតដំបូង។ 
នេះបើយោងតាមការចេញ ផ្សាយដោយសារព័ត៌មាន CNA ថ្ងៃអង្គារ ទី០៨ ខែមិថុនានេះ។ 

រហូតមកដល់បច្ចុប្បន្នការចាក់វ៉ាក់សាំងយឺតដោយសារការដឹកជញ្ជូនវ៉ាក់សំាង បានធ្វើឱ្យស្មុគស្មាញដល់កិច្ចប្រឹងប្រែងរបស់កូរ៉េខាងត្បូងក្នុងការទប់ស្កាត់ករណីឆ្លងថ្មីៗ។ ប្រទេសកូរ៉េខាងត្បូងបាននិយាយកាលពីសប្តាហ៍មុនថា ខ្លួនរំពឹងថានឹងបំពេញតាមគោលដៅចាក់វ៉ាក់សាំងសម្រាប់ឆមាសទី ១ នៃឆ្នាំនេះដោយចាក់ថ្នាំបង្ការដល់ប្រជាជនចំនួន ១៤ លាននាក់មុនកាលកំណត់។ រដ្ឋាភិបាលគ្រោងនឹងចាក់វ៉ាក់សាំង ៧០ ភាគរយនៃប្រជាជនចំនួន ៥២ លាននាក់របស់ខ្លួននៅត្រីមាសទី ៣ ដោយចាប់ផ្តើមពីគ្រូមត្តេយ្យនិងគ្រូបឋមសិក្សាក្នុងអំឡុងពេលសម្រាករដូវក្តៅ។ប្រទេសកូរ៉េខាងត្បូងបានរាយការណ៍ថាមានករណីឆ្លងវីរុសថ្មីចំនួន ៤៥៤ ករណីកាលពីថ្ងៃចន្ទដែលនាំឱ្យមានការឆ្លងសរុបចំនួន ១៤៥.០៩១ ករណី ហើយមានអ្នកស្លាប់ចំនួន ១.៩៧៥ នាក់៕