ពួកតាលីបង់ជួបគណៈប្រតិភូសហភាពអឺរ៉ុប-អាមេរិកដើម្បីជំរុញការគាំទ្រ

វិទ្យុជាតិកម្ពុជា ៖ កញ្ញា ខៀវ ណាវីន
អន្តរជាតិ ៖ ក្រុមតាលីបង់បានធ្វើកិច្ចចរចាទល់មុខគ្នាជាលើកដំបូងជាមួយគណៈប្រតិភូអាមេរិក-សហភាពអឺរ៉ុបនៅថ្ងៃអង្គារទី ១២ ខែតុលានៅទីក្រុងកាតា ខណៈទីក្រុងប្រ៊ុចសែលបានសន្យាផ្តល់ជំនួយចំនួន ១ ពាន់លានអឺរ៉ូ (១,២ ពាន់លានដុល្លារ) ដល់អាហ្វហ្គានីស្ថាន។ 
នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី ១៣ ខែតុលា។ នៅឯកិច្ចប្រជុំក្រុងដូហានិងសន្និសីទនៃប្រទេសសេដ្ឋកិច្ចធំៗ របស់ពិភពលោក G20 និងសារសម្រាប់ពួកតាលីបង់គឺដូចគ្នា៖ពិភពលោក ប្តេជ្ញាផ្តល់ជំនួយមនុស្សធម៌ដល់ប្រជាជនដែលរងគ្រោះនៅអាហ្វហ្គានីស្ថានហើយប្រទេសនេះមិនត្រូវក្លាយជាមូលដ្ឋានរបស់ពួកសកម្ម ប្រយុទ្ធទេ។ 

សហភាពអឺរ៉ុបបានបើកកិច្ចប្រជុំកំពូល G20 ដោយសន្យាផ្តល់កញ្ចប់ថវិកា ១ ពាន់លានអឺរ៉ូ រួមទាំងប្រាក់សម្រាប់តម្រូវការមនុស្សធម៌បន្ទាន់ និងប្រទេសជិតខាងអាហ្វហ្គានីស្ថានដែលទទួលយកជនជាតិអាហ្វហ្គានីស្ថានដែលភៀសខ្លួនពីតាលីបង់។ ប្រធានគណៈកម្មការសហភាពអឺរ៉ុបលោកស្រី អ៊ួរស៊ូឡាវ៉ុនដឺឡឺយ៉េន (Ursula von der Leyen) បាននិយាយថាជំនួយនេះមានន័យថា “ដើម្បីបញ្ចៀសការដួលរលំផ្នែកមនុស្សធម៌និងសេដ្ឋកិច្ចសង្គម” ។ 

លោកស្រីបាននិយាយថា “យើងបានដឹងច្បាស់អំពីលក្ខខណ្ឌរបស់យើងសម្រាប់ការចូលរួមណាមួយ ជាមួយអាជ្ញាធរអាហ្វហ្គានីស្ថាន រួមទាំងការគោរពសិទ្ធិមនុស្ស” ។ នាយករដ្ឋមន្រ្តីអ៊ីតាលី Mario Draghi ដែលបានធ្វើជាម្ចាស់ផ្ទះនៃកិច្ចពិភាក្សា G20 បាននិយាយថា ពួកគេបានយល់ព្រមធ្វើការជាមួយគ្នាដើម្បីផ្តល់ជំនួយមនុស្សធម៌សម្រាប់ប្រជាជនអាហ្វហ្គានីស្ថាន។ លោកបានប្រាប់សន្និសីទសារព័ត៌មានក្រោយកិច្ចប្រជុំកំពូលថា "ជំនួសឱ្យការឆ្លើយតបនិងការឈ្លោះប្រកែកគ្នា ឥឡូវនេះយើងមានការ យល់ដឹងអំពីភាពអាសន្ននេះនិងការទទួលខុសត្រូវដ៏ធំធេងដែល G20 មានចំពោះប្រជាជនអាហ្វហ្គានីស្ថាន" ។ មេដឹកនាំ G20 បានបញ្ជាក់ ជាថ្មីពីការប្តេជ្ញាចិត្តក្នុងការផ្តល់ជំនួយមនុស្សធម៌ដោយផ្ទាល់ដល់ប្រជាជនអាហ្វហ្គានីស្ថានតាមរយៈអង្គការអន្តរជាតិឯករាជ្យនិង “ដើម្បី លើកកម្ពស់សិទ្ធិមនុស្សជាមូលដ្ឋានសម្រាប់ជនជាតិអាហ្វហ្គានីស្ថានទាំងអស់រួមទាំងស្ត្រីក្មេងស្រីនិងសមាជិកនៃក្រុមជនជាតិភាគតិច” ៕