ចំនួនអ្នកស្លាប់ដោយសារទឹកជំនន់នៅម៉ាឡេស៊ីកើនឡើងដល់ ១៧ នាក់ និងជិត ៧ ម៉ឺននាក់ត្រូវភៀសខ្លួននៅទូទាំងប្រទេស

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ អាជ្ញាធរក្នុងរដ្ឋ Selangor បាននិយាយថា មនុស្សប្រាំបួននាក់ផ្សេងទៀតត្រូវបានគេរាយការណ៍ថា បានស្លាប់ដែលនាំឱ្យចំនួនអ្នកស្លាប់សរុបដោយសារទឹកជំនន់នៅក្នុងប្រទេសម៉ាឡេស៊ីកើនឡើងដល់ ១៧ នាក់គិតត្រឹមថ្ងៃអង្គារនេះ។នេះបើយោងតាមការចេញផ្សាយដោយសារព័ត៌មាន Xinhua នៅថ្ងៃទី២២ ខែធ្នូ។ លោក Amirudin Shari នាយករដ្ឋមន្រ្ដីរដ្ឋ Selangor បាននិយាយនៅក្នុងសន្និសីទសារព័ត៌មានមួយថា សាកសពបន្ថែមទៀតត្រូវបានរកឃើញ ខណៈដែលទឹកជំនន់ចាប់ផ្តើមស្រក ហើយរដ្ឋាភិបាលរដ្ឋបានប្រមូលធនធានចាំបាច់ទាំងអស់ដើម្បីជួយដល់ជនរងគ្រោះ។ គាត់បាននិយាយថា "នៅពេលនេះ ការផ្តោតរបស់យើងគឺធានាឱ្យប្រតិបត្តិការស្វែងរក និងជួយសង្គ្រោះត្រូវបានអនុវត្តប្រកបដោយប្រសិទ្ធភាព" ។ យោងតាមទិន្នន័យពីនាយកដ្ឋានសុខុមាលភាពសង្គមម៉ាឡេស៊ីបានឱ្យដឹងថា ចំនួនអ្នកផ្លាស់ទីលំនៅដោយសារទឹកជំនន់នៅក្នុងប្រទេសម៉ាឡេស៊ីបានកើនឡើងដល់ជាង ៦៩,៤០០ នាក់នៅក្នុងរដ្ឋចំនួន ៧ បូកនឹងទឹកដីសហព័ន្ធនៃទីក្រុងគូឡាឡាំពួ គិតត្រឹមម៉ោង ១០:០០ យប់។ រដ្ឋដែលរងគ្រោះខ្លាំងជាងគេគឺ Pahang នៅតាមបណ្តោយឆ្នេរសមុទ្រភាគខាងកើតនៃឧបទ្វីបម៉ាឡេស៊ី ដោយមនុស្សជាង ៤២,០០០ នាក់ត្រូវបានជម្លៀសទៅកាន់មជ្ឈមណ្ឌលសង្គ្រោះទឹកជំនន់ បន្ទាប់មកគឺរដ្ឋ Selangor ដែលមានជាង ២៣,០០០ នាក់ត្រូវបានជម្លៀសចេញ។ បើយោងតាមទីភ្នាក់ងារសារព័ត៌មានរដ្ឋ Bernama ថា នាយករដ្ឋមន្ត្រី Ismail Sabri Yaakob បានប្រាប់កិច្ចប្រជុំជាមួយនាយករដ្ឋមន្ត្រីនៅព្រឹកនេះថា គេបានរកឃើញថារដ្ឋដូចជា Terengganu, Kelantan និង Pahang ត្រូវបានរៀបចំដើម្បីប្រឈមមុខនឹងទឹកជំនន់ ជាពិសេសក្នុងអំឡុងពេលនៃឆ្នាំនេះ។ លោកបាននិយាយថា ខណៈដែលរដ្ឋឆ្នេរសមុទ្រភាគខាងកើតត្រូវបានរៀបចំដើម្បីប្រឈមមុខនឹងទឹកជំនន់ប្រចាំឆ្នាំ ស្ថានភាពនៅក្នុងរដ្ឋ Selangor គឺមិននឹកស្មានដល់ ហើយបានទទួលស្គាល់ថាមានបញ្ហាជាមួយនឹងការឆ្លើយតបនឹងការគ្រប់គ្រងគ្រោះមហន្តរាយ៕