អត្រាអតិផរណានៅប្រទេសឡាវឡើងដល់ចំណុចខ្ពស់បំផុតក្នុងរយៈពេល ២ ឆ្នាំនេះ

 វិទ្យុជាតិកម្ពុជា កញ្ញា ខៀវ ណាវីន

                    អន្តរជាតិ ៖ អត្រាអតិផរណាពីមួយឆ្នាំទៅមួយឆ្នាំនៅក្នុងប្រទេសឡាវ បានកើនឡើងដល់ ៦,២៥ ភាគរយ នៅក្នុងខែមករា ជាតួលេខខ្ពស់បំផុតដែលបានកត់ត្រាចាប់តាំងពីខែមករាឆ្នាំ ២០២០។ 

នេះបើយោងតាមការចេញផ្សាយដោយសារព័ត៌មាន Xinhua នៅថ្ងៃទី២៣ ខែកុម្ភៈ។ 

តម្លៃនៃទំនិញ និងសេវាកម្មបានបន្តកើនឡើងចាប់តាំងពីខែមីនា ឆ្នាំ ២០២១ ហើយបានកើនឡើងដល់ ៥,០៤ ភាគរយ នៅក្នុងខែវិច្ឆិកា មុនពេលកើនឡើងដល់ ៥,២៧ ភាគរយនៅក្នុងខែធ្នូ ។

នេះបើយោងតាមរបាយការណ៍ចុងក្រោយពីការិយាល័យស្ថិតិឡាវ។

 កាសែតក្នុងស្រុក Vientiane Times បានរាយការណ៍នៅថ្ងៃពុធនេះថា ការកើនឡើងថ្លៃដើមប្រេងឥន្ធនៈ គឺជាកត្តាជំរុញដ៏សំខាន់ មួយ នៃអតិផរណានៅក្នុងប្រទេសឡាវ។ ការរាតត្បាតនៃជំងឺកូវីដ-១៩ ជាពិសេសការលេចឡើងនៃវីរុស Omicron និងទីផ្សារ ឥន្ធនៈដែលងាយនឹងបង្កជាហេតុ ជះឥទ្ធិពលយ៉ាងធំធេងលើអត្រាអតិផរណានៅក្នុងប្រទេសជុំវិញពិភពលោក រួមទាំងប្រទេស ឡាវផងដែរ។ លើសពីនេះ ការធ្លាក់ថ្លៃថេរនៃប្រាក់គីបរបស់ឡាវកំពុងធ្វើឱ្យកាន់តែពិបាកក្នុងការទប់ស្កាត់អតិផរណានៅក្នុងប្រទេសឡាវ។ 

ក្នុងខែមករា តម្លៃទំនិញ និងសេវាកម្មត្រូវបានជំរុញជាចម្បងដោយប្រភេទទំនាក់ទំនង និងការដឹកជញ្ជូន ការថែទាំវេជ្ជសាស្រ្ត និងឱសថ ភោជនីយដ្ឋាន និងសណ្ឋាគារ។ ការចំណាយក្នុងប្រភេទទំនាក់ទំនង និងការដឹកជញ្ជូនបានកើនឡើង ១,២៦ ភាគរយ ពីមួយខែទៅមួយខែ និង ១៣,៧២ ភាគរយពីមួយឆ្នាំទៅមួយឆ្នាំ។ ចាប់តាំងពីដើមឆ្នាំ ២០២២ មក តម្លៃប្រេងឥន្ធនៈ បានកើនឡើង ចំនួន ៤ ដង ដោយបានរារាំងអ្នកប្រើប្រាស់ និងការខិតខំប្រឹងប្រែងរបស់ពួកគេក្នុងការលើកកម្ពស់កម្រិតជីវភាព។ រដ្ឋាភិបាលឡាវកំពុងចាត់វិធានការដើម្បីបង្កើនផលិតភាព ដើម្បីកាត់បន្ថយការនាំចូល និងគ្រប់គ្រងការឡើងថ្លៃប្រេងឥន្ធនៈ ដើម្បីបន្ធូរបន្ថយផលប៉ះពាល់ដល់សេដ្ឋកិច្ច។ រដ្ឋាភិបាលបានសម្រេចចិត្តកាត់បន្ថយពន្ធលើតម្លៃបន្ថែមពី ១០ ទៅ ៧ ភាគរយ នៅឆ្នាំនេះ នេះបើយោងតាមរបាយការណ៍៕