កូរ៉េខាងត្បូង អាមេរិក ជប៉ុន ធ្វើសមយុទ្ធប្រឆាំងនាវាមុជទឹក ក្នុងពេលមានភាពតានតឹងជាមួយកូរ៉េខាងជើង

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ កងកម្លាំងទ័ព ជើងទឹកនៃប្រទេសកូរ៉េខាង ត្បូង សហរដ្ឋអាមេរិក និងជប៉ុន នឹងធ្វើសមយុទ្ធប្រឆាំងនាវាមុជទឹកត្រីភាគីដ៏សំខាន់របស់ពួកគេជាលើកដំបូងក្នុង រយៈពេល ៥ ឆ្នាំនៅថ្ងៃសុក្រនេះ ក្នុងពេលមានភាពតាន តឹងជុំវិញការសាកល្បងមីស៊ីលជាបន្តបន្ទាប់របស់ប្រទេសកូរ៉េខាងជើង។ នេះបើយោងតាមការចេញផ្សាយដោយ សារព័ត៌មាន Reuters នៅថ្ងៃទី៣០ ខែកញ្ញា។ សមយុទ្ធនេះនឹងធ្វើឡើងនៅក្នុងដែន ទឹកអន្តរជាតិ ពីឆ្នេរសមុទ្រភាគខាងកើតនៃឧបទ្វីបកូរ៉េ មួយថ្ងៃបន្ទាប់ពីកូរ៉េខាងជើងបានបាញ់មីស៊ីលផ្លោងពីរគ្រាប់ឆ្ពោះទៅកាន់ឆ្នេរសមុទ្រភាគខាងកើតរបស់ខ្លួន ហើយលោកស្រី Kamala Harris អនុប្រធានាធិបតីអាមេរិកបានទៅទស្សនាទីក្រុងសេអ៊ូល និងព្រំដែនរវាងប្រទេសកូរ៉េទាំងពីរ។ កងទ័ពជើងទឹកកូរ៉េបាននិយាយនៅក្នុងសេចក្តីថ្លែងការណ៍មួយថា សមយុទ្ធនេះត្រូវបានបង្កើតឡើងដើម្បីបង្កើនសមត្ថភាពរបស់ពួកគេក្នុងការឆ្លើយតបទៅនឹងការបង្កើនការគំរាមកំហែងពីនាវាមុជទឹករបស់កូរ៉េខាងជើង រួមទាំងមីស៊ីលផ្លោងបាញ់ចេញពីនាវាមុជទឹក (SLBM) នៅពេលដែលវាបង្កការគំរាមកំហែងនុយក្លេអ៊ែរ និងមីស៊ីលជាបន្តបន្ទាប់ជាមួយនឹងការសាកល្បងមីស៊ីលផ្លោងជាបន្តបន្ទាប់។ មន្ត្រីយោធាកូរ៉េខាងត្បូងម្នាក់បាននិយាយថា នៅក្រោមកម្មវិធី កងទ័ពជើង ទឹកនៃប្រទេសទាំងបីនឹងតាមដាននាវាមុជទឹករបស់កូរ៉េខាងជើង ខណៈកំពុងផ្លាស់ប្តូរព័ត៌មានគ្នាទៅវិញទៅមក៕