ទីក្រុងតូក្យូចង់ជំរុញការអប់រំភាសាអង់គ្លេសសម្រាប់សិស្សវិទ្យាល័យ

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃពុធថា រដ្ឋធានីតូក្យូរបស់ប្រទេសជប៉ុន គ្រោងនឹងជំរុញការអប់រំភាសាអង់គ្លេសសម្រាប់សិស្សវិទ្យាល័យ ដោយផ្តល់ឱ្យពួកគេនូវឱកាសកាន់តែច្រើនក្នុងការសន្ទនាជាភាសាអង់គ្លេស និងឱកាសសម្រាប់ការផ្លាស់ប្តូរទៅក្រៅប្រទេស។ នេះបើយោងតាមការចេញផ្សាយដោយសារព័ត៌មាន Xinhua។ សេចក្តីព្រាងថវិការបស់រដ្ឋាភិបាលទីក្រុងតូក្យូសម្រាប់សារពើពន្ធឆ្នាំ ២០២៣ (ខែមេសា ឆ្នាំ ២០២៣ ដល់ខែមីនា ឆ្នាំ ២០២៤) ដែលនឹងត្រូវប្រកាសនៅចុងខែមករា បានផ្តល់ថវិកាចំនួន ៦០០ លានយ៉េន (៤,៥២ លានដុល្លារអាមេរិក) សម្រាប់កម្មវិធីផ្លាស់ប្តូរសម្រាប់សិស្សវិទ្យាល័យនៅក្នុងទីក្រុង។ ទឹកប្រាក់ចំនួន ១០០ លានយ៉េនបន្ថែមទៀត (៧៥៤,០០០ ដុល្លារ) នឹងត្រូវបានបម្រុងទុកសម្រាប់កម្មវិធីដើម្បីអញ្ជើញសិស្សានុសិស្សកម្រិតវិទ្យាល័យពីបរទេសមកទស្សនាប្រទេសជប៉ុនដើម្បីចូលរួមក្នុងសកម្មភាពភាសា។ ដើម្បីផ្តល់មូលនិធិដល់សិស្សវិទ្យាល័យក្នុងទីក្រុងតូក្យូដែលចូលរួមក្នុងការប្រកួតប្រជែងធ្វើបទបង្ហាញជាភាសាអង់គ្លេស រដ្ឋាភិបាលទីក្រុងបានផ្តល់ជាបណ្តោះអាសន្ននូវថវិកាចំនួន ៤០ លានយ៉េន (៣០១,៨១០ ដុល្លារ) ខណៈដែល ២០ លានយ៉េន (១៥០,៩០៥ ដុល្លារ) ត្រូវបានទុកសម្រាប់សិស្សចំនួន ១២០ នាក់ដើម្បីចូលរួមវគ្គបណ្តុះបណ្តាលរយៈពេលពីរថ្ងៃ។ យោងតាមក្រុមហ៊ុនអប់រំដែលមានមូលដ្ឋាននៅស្វីស EF Education First បានឱ្យដឹងថា ផែនការរបស់រដ្ឋាភិបាលក្រុងតូក្យូដើម្បីកែលម្អភាសាអង់គ្លេសរបស់ពួកគេ កើតឡើងនៅពេលដែល ប្រទេសជប៉ុនជាប់ចំណាត់ថ្នាក់ទី ៨០ ក្នុងចំណោមប្រទេស និងតំបន់ចំនួន ១១១៕