លោក Blinken នៅទីក្រុងតូក្យូក្នុងដំណើរចូលរួមរំលែកទុក្ខជូនសពលោក Shinzo Abe

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ លោក Antony Blinken រដ្ឋមន្ត្រីការបរទេសអាមេរិកបានមកដល់ក្រុងតូក្យូ នៅថ្ងៃចន្ទនេះ ដើម្បីចូលរួមរំលែកទុក្ខដោយផ្ទាល់ចំពោះមរណភាពលោក Shinzo Abe អតីតនាយករដ្ឋមន្ត្រីរបស់ប្រទេសជប៉ុនដែលត្រូវបានគេធ្វើឃាដកាលពីថ្ងៃទី៨កក្កដា។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី១១ ខែកក្កដា។ អ្នកការទូតកំពូលរបស់សហរដ្ឋអាមេរិកបានចុះចតនៅមូលដ្ឋានយោធា Yokota ហើយគ្រោងនឹងធ្វើដំណើរខ្លីមួយទៅកាន់រដ្ឋធានីដើម្បីជួបលោក Fumio Kishida នាយករដ្ឋមន្ត្រីនិងសម្តែងការសោកសៅរបស់លោក។ លោក Abe ជានាយក រដ្ឋមន្ត្រីកាន់អំណាចយូរបំផុតរបស់ប្រទេសជប៉ុន ដែលគាំទ្រយ៉ាងខ្លាំងក្លា និងមានទំនាក់ទំនងនយោបាយជាមួយសហរដ្ឋអាមេរិក ត្រូវបានបាញ់សម្លាប់ក្នុងអំឡុងពេលយុទ្ធនាឃោសនាកាលពីថ្ងៃសុក្រ នៅក្នុងឧក្រិដ្ឋកម្មដ៏កម្រនៅក្នុងប្រទេសមួយដែលមានសុវត្ថិភាពបំផុតរបស់ពិភពលោក។ មុននេះលោក Joe Biden ប្រធានាធិបតីអាមេរិកបានទៅគេហដ្ឋានរបស់ឯកអគ្គរដ្ឋទូតជប៉ុន ដើម្បីចុះហត្ថលេខាលើសៀវភៅរំលែកទុក្ខ។ លោក Blinken បាន សម្រេច ចិត្ត ឈប់ នៅ ទីក្រុង តូក្យូ ខណៈ ដែល លោក បាន ទៅ បំពេញ ទស្សនកិច្ច នៅ អាស៊ីអាគ្នេយ៍។ កាលពីថ្ងៃអាទិត្យក្នុងប្រទេសថៃ លោក Don Pramudwinai រដ្ឋមន្ត្រីការបរទេសថៃ បានបើកកិច្ចពិភាក្សាជាមួយលោក Blinken ដោយបាននិយាយថា ខ្ញុំ គិត ថា អ្នក រាល់ គ្នា នៅ តែ តក់ស្លុត ចំពោះ ការ ធ្វើ ឃាត ទៅលើលោក Abe និងតក់ស្លុត ចំពោះ ការ បាត់ បង់ សមាជិកក្រុម គ្រួសារ និងមិត្តភ័ក្តិ។ ខ្ញុំដឹងថាអ្នកទាំងអស់គ្នាមានអារម្មណ៍យ៉ាងសោកសៅនៅទូទាំងតំបន់ ក៏ដូចជាជុំវិញពិភពលោក៕