ព័ត៌មានថ្មីៗ:សម្តេចតេជោ នាយករដ្ឋមន្រ្តី បានប្រកាសឧបត្ថម្ភ កីឡាករយ៉ាវ វណ្ណៈ ដែលទទួល​បានមេដាយមាសចំនួន ៤ម៉ឺនដុល្លារ បន្ថែមលើប្រាក់រង្វាន់ដែលក្រសួងអប់រំផ្តល់​ឲ្យចំនួន​៨០លានរៀលសម្តេចតេជោ នាយករដ្ឋមន្រ្តី បានប្រកាសថា សម្តេចនៅតែបន្តធ្វើជាប្រធានប៉ារ៉ា អូឡាំពិកក្រសួងធនធានទឹកប្រកាសចាត់វិធានការ រក្សាទឹកទុកដើម្បីធានាដល់ការធ្វើស្រែប្រាំងរបស់កសិកររាជរដ្ឋាភិបាលពន្លឿនការតាក់តែងក្រមការពារបរិស្ថាន និងធនធានធម្មជាតិ ឲ្យចប់នៅចុងឆ្នាំនេះក្រសួងសង្គមកិច្ចសម្រេចបង្កើតមជ្ឈមណ្ឌលដាច់ដោយឡែកមួយសម្រាប់ថែទំា កុមារ ដែលទំនាស់នឹងច្បាប់
បទសម្ភាសន៍ពិសេស ជាមួយសម្ដេច ហ៊ុន សែន ក្នុងវេទិកាខ្សែក្រវាត់និងផ្លូវ សម្រាប់កិច្ចសហប្រតិបត្តិការអន្តរជាតិ
ចេញផ្សាយ  ១៣-ឧសភា-២០១៧    ដោយ : SengChhay

 #CCFRspecial

សម្តេចអគ្គមហាសេនាបតីតេជោហ៊ុនសែនSamdech Hun Sen, Cambodian Prime Minister នាយករដ្ឋមន្ត្រីនៃព្រះរាជាណាចក្រកម្ពុជានឹងដឹកនាំគណៈប្រតិភូជាន់ខ្ពស់អញ្ជើញចូលរួម«វេទិកាខ្សែក្រវាត់និងផ្លូវសម្រាប់កិច្ចសហប្រតិបត្តិការអន្តរជាតិ »#BeltAndRoadForum ដែលនឹងសម្ពោធនៅថ្ងៃអាទិត្យទី១៤ខែឧសភាខាងមុខនេះនាទីក្រុងប៉េកាំង។នៅថ្ងៃទី១២នេះសម្តេចតេជោហ៊ុនសែនបានផ្តល់កិច្ចសម្ភាសសរសេរពិសេស​ជាមួយវិទ្យុមិត្តភាពកម្ពុជាចិន Cri ccfr និងប្រព័ន្ធសារព័ត៌មានប្រទេសចិនគឺទីភ្នាក់ងារស៊ីនហួរ China Xinhua News ការសែតប្រជាជនចិន People's Daily, China ព្រមទាំងកាសែតយុវជនចិន( China Youth Daily )។
សម្ដេចតេជោហ៊ុនសែនបានឆ្លើយសំណួរពាក់ព័ន្ធនឹងការរំពឹងទុកចំពោះវេទិការនេះនិងទំនាក់ទំនងកម្ពុជា-ចិនក្រោមគំនិត #ខ្សែក្រវាត់មួយនិងផ្លូវមួយ#BeltAndRoad ។
ខាងក្រោមនេះគឺខ្លឹមសារការផ្តល់កិច្ចសម្ភាស​សរសេរ​​របស់សម្ដេច។
------------------------

ជំនួយស្មារតីសម្រាប់សម្តេចតេជោនាយករដ្ឋមន្រ្តី
ផ្តល់កិច្ចសម្ភាសន៍សរសេរជាមួយវិទ្យុមិត្តភាពកម្ពុជាចិននិងភ្នាក់ងារកាសែតប្រទេសចិន

-------------------------

Q-1 / សំនួរទី១៖សម្តេចតេជោនាយករដ្ឋមន្រ្តីជាទីគោរពដ៏ខ្ពង់ខ្ពស់គំនិតផ្តួចផ្តើមខ្សែក្រវ៉ាត់និងផ្លូវនិងការបង្កើតធនាគារវិនិយោគហេដ្ឋារចនាសម្ព័ន្ធអាស៊ី (Asian Infrastructure Investment Bank ឬ AIIB) និងមូលនិធិផ្លូវសូត្រ (Silk Road Fund) ត្រូវបានផ្តួចផ្តើមឡើងដោយឯកឧត្តមស៊ីជីនភីងប្រធានាធិបតីចិនតាំងពី៤ឆ្នាំមកម្ល៉េះ។តើសម្តេចតេជោនាយករដ្ឋមន្រ្តីមានការយល់ឃើញយ៉ាងដូចម្តេចចំពោះកិច្ចសហប្រតិបត្តិការកម្ពុជា-ចិនក្រោមគំនិតផ្តួចផ្តើមខ្សែក្រវ៉ាត់និងផ្លូវ ?ហើយតើគំនិតផ្តួចផ្តើមនេះជម្រុញកិច្ចសហប្រតិបត្តិការកម្ពុជា-ចិនដោយរបៀបណា ?
ចម្លើយ៖
កម្ពុជាតែងតែគាំទ្រនិងចូលរួមយ៉ាងសកម្មក្នុងសម្មភាពនានានៃដំណើរការគំនិតផ្តួចផ្តើមខ្សែក្រវ៉ាត់និងផ្លូវនេះ។គំនិតផ្តួចផ្តើមខ្សែក្រវ៉ាត់និងផ្លូវមានកិច្ចសហប្រតិបត្តិការវិស័យគន្លឹះមួយចំនួនរួមមានការជម្រុញការតភ្ជាប់ការជម្រុញពាណិជ្ជកម្មការធ្វើសមាហរណកម្មកិច្ចសហប្រតិបត្តិការហិរញ្ញវត្ថុនិងការតភ្ជាប់ប្រជាជននិងប្រជាជន។
ក្នុងឱកាសទស្សនកិច្ចផ្លូវរដ្ឋរបស់ឯកឧត្តមស៊ីជីនភីងប្រធានាធិបតីចិននៅកម្ពុជាកាលពីថ្ងៃទី១៣ដល់១៤ខែតុលាឆ្នាំ២០១៦ប្រទេសទាំងពីរបានចុះហត្ថលេខាលើឯកសារកិច្ចសហប្រតិបត្តិការចំនួន៣១ក្នុងនោះមាន«អនុស្សារណៈយោគយល់គ្នាស្តីពីការរៀបចំចំណុចគោលនៃផែនការកិច្ចសហប្រតិបត្តិការទ្វេភាគីដើម្បីរួមគ្នាបង្កើតកិច្ចសហប្រតិបត្តិការខ្សែក្រវ៉ាត់សេដ្ឋកិច្ចផ្លូវសូត្រ(ខ្សែក្រវ៉ាត់) និងកិច្ចសហប្រតិបត្តិការផ្លូវសូត្រសមុទ្រស.វ.ទី២១(ផ្លូវ)»ម្បីជម្រុញកិច្ចសហប្រតិបត្តិរវាងប្រទេសយើងទំាងពីរលើកកម្ពស់ការអភិវឌ្ឍនិងកិច្ចសហប្រតិបត្តិការផលប្រយោជន៍ទៅវិញទៅមកឈរលើគោលដៅរួមគ្នាមួយក្នុងក្របខ័ណ្ឌនៃគំនិតផ្តួចផ្តើមនេះ។លក្ខណៈពិសេសនៃគំនិតផ្តួចផ្តើមនេះគឺការផ្តោតជាសំខាន់លើការសម្របសម្រួលគោលនយោបាយអភិវឌ្ឍន៍ជាមួយប្រទេសដៃគូឈរលើស្មារតីគោរពគ្នាទៅវិញទៅមក។ជាក់ស្តែងគម្រោងសហប្រតិបត្តិការក្នុងក្របខ័ណ្ឌគំនិតផ្តួចផ្តើមនេះសុទ្ធតែបានផ្សារភ្ជាប់ជាមួយនឹងផែនការអភិវឌ្ឍជាតិរបស់កម្ពុជាជាពិសេសយុទ្ធសាស្ត្រចតុកោណដំណាក់កាលទី៣និងគោលនយោបាយអភិវឌ្ឍន៍ឧស្សាហកម្ម។លក្ខណៈពិសេសមួយទៀតនៃគំនិតផ្តួចផ្តើមនេះគឺការពន្លឿនការអនុវត្តជាក់ស្តែង។ថ្វីត្បិតតែគំនិតផ្តួចផ្តើមនេះថ្មីក៏ពិតមែនប៉ុន្តែយើងសង្កេតឃើញថាជំហានឈានឆ្ពោះទៅរកការអនុវត្តគម្រោងមានល្បឿនលឿន។ក្នុងរយៈពេលដ៏ខ្លីកម្ពុជានិងចិនបានកំណត់គម្រោងវិនិយោគនិងអភិវឌ្ឍន៍ប្រកបដោយសក្តានុពលភាពយ៉ាងច្រើនដូចជាគម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុគម្រោងសាងសង់អាកាសយានដ្ឋានអន្តរជាតិខេត្តសៀមរាបគម្រោងលើវិស័យហេដ្ឋារចនាសម្ព័ន្ធដឹកជញ្ជូនការអភិវឌ្ឍនិងគម្រោងសាងសង់និងអភិវឌ្ឍលើវិស័យថាមពលជាដើមហើយយើងកំពុងបោះជំហានយ៉ាងលឿនឆ្ពោះទៅរកការអនុវត្តជាក់ស្តែងដើម្បីសម្រេចលទ្ធផលជាផ្លែផ្កាសម្រាប់ប្រទេសយើងទាំងពីរ។កម្ពុជានិងប្រទេសផ្សេងៗទៀតក្នុងតំបន់មានគម្រោងអភិវឌ្ឍន៍ហេដ្ឋារចនាសម្ព័ន្ធជាច្រើនដើម្បីបង្កើនភាពតភ្ជាប់ក្នុងតំបន់ក៏ដូចជាក្នុងសកលលោក។យ៉ាងណាក្តីការផ្តល់ហិរញ្ញប្បទាននៅតែជាបញ្ហាប្រឈមដូច្នេះសម្រាប់កម្ពុជាយើងសង្ឃឹមថាតាមរយៈគំនិតផ្តួចផ្តើមនេះធនាគារវិនិយោគហេដ្ឋារចនាសម្ព័ន្ធអាស៊ី (Asian Infrastructure Investment Bank ឬ AIIB) និងមូលនិធិផ្លូវសូត្រ (Silk Road Fund) អាចផ្តល់នូវដំណោះស្រាយលើបញ្ហាប្រឈមផ្នែកហិរញ្ញប្បទានដោយដើរតួនាទីបំពេញបន្ថែមទៅលើស្ថាប័នហិរញ្ញវត្ថុពហុភាគីដែលមានស្រាប់។
បន្ទាប់ពីការចូលរួម«វេទិកាខ្សែក្រវ៉ាត់និងផ្លូវសម្រាប់ជម្រុញកិច្ចសហប្រតិបត្តិការ»ខ្ញុំនឹងបន្តធ្វើទស្សនកិច្ចផ្លូវការរបស់ខ្ញុំពីថ្ងៃទី១៦ដល់១៧ខែឧសភាឆ្នាំ២០១៧នៅប្រទេសចិនដែលក្នុងឱកាសនោះនឹងមានការចុះហត្ថលេខាលើ¡°ចំណុចគោលនៃផែនការកិច្ចសហប្រតិបត្តិការទ្វេភាគីដើម្បីរួមគ្នាកសាងខ្សែក្រវ៉ាត់និងផ្លូវ¡±ដោយផ្តោតចំបងលើវិស័យកិច្ចសហប្រតិបត្តិការគន្លឹះ។ 
តាមរយៈឯកសារនេះយើងនឹងដាក់ចេញនូវចំណុចគោលការអនុវត្តជាក់ស្តែងដើម្បីពង្រីកនិងធ្វើពិពិធកម្មកិច្ចសហប្រតិបត្តិការលើគ្រប់វិស័យជម្រុញទំនាក់ទំនងនយោបាយឲ្យកាន់តែជិតស្និទ្ធពង្រឹងកិច្ចសហប្រតិបត្តិការសេដ្ឋកិច្ចឲ្យកាន់តែរឹងមាំនិងធ្វើឲ្យទំនាក់ទំនងប្រជាជននិងប្រជាជនកាន់តែស្អិតរមួតដែលកត្តាទាំងនេះគឺសុទ្ធតែជាធាតុផ្សំយ៉ាងសំខាន់ក្នុងការរឹតបណ្តឹងចំណងទំនាក់ទំនងកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយកម្ពុជា-ចិន។
Q-2 / សំនួរទី២៖វេទិកាខ្សែក្រវ៉ាត់និងផ្លូវនឹងត្រូវរៀបចំឡើងនៅទីក្រុងប៉េកាំងពីថ្ងៃទី១៤ដល់១៥ខែឧសភាឆ្នាំ២០១៧។តើសម្តេចតេជោនាយករដ្ឋមន្រ្តី៖
-យល់ឃើញយ៉ាងដូចម្តេចចំពោះសារៈសំខាន់នៃវេទិកានេះ ? 
-គ្រោងនឹងលើកប្រធានបទអ្វីនៅក្នុងវេទិកានេះ ?
-រំពឹងថាវេទិកានឹងទទួលលទ្ធផលអ្វីខ្លះនិងយល់ថាវេទិកានេះនឹងជម្រុញកិច្ចសហប្រតិបត្តិការរវាងបណ្តាប្រទេសនៅតាមបណ្តោយខ្សែក្រវ៉ាត់និងផ្លូវយ៉ាងដូចម្តេច ?
ចម្លើយ៖
ខ្ញុំសូមវាយតម្លៃថា«វេទិកាខ្សែក្រវ៉ាត់និងផ្លូវសម្រាប់ជម្រុញកិច្ចសហប្រតិបត្តិការ»ដែលរៀបចំឡើងនេះគឺជាវេទិកាពហុភាគីមួយដែលមានសារៈសំខាន់ណាស់ហើយដើរតួជាធាតុផ្សំមួយនៃការអនុវត្តគំនិតផ្តួចផ្តើមខ្សែក្រវ៉ាត់និងផ្លូវសម្រាប់កិច្ចសន្ទនាយុទ្ធសាស្រ្តនិងគោលនយោបាយអភិវឌ្ឍន៍ដើម្បីប្រមែប្រមូលគំនិតចែករំលែកចក្ខុវិស័យនិងការបេ្តជ្ញារួមគ្នាមួយក្នុងការជម្រុញភាពជាដៃគូកាន់តែជិតស្និទ្ធការតភ្ជាប់សម្រាប់ការអភិវឌ្ឍឲ្យកាន់តែខ្លាំងក្លានិងការរឹតបន្តឹងចំណងទាក់ទងរវាងប្រជាជននិងប្រជាជនឲ្យកាន់តែស្អិតរមួត។
«វេទិកាខ្សែក្រវ៉ាត់និងផ្លូវសម្រាប់ជម្រុញកិច្ចសហប្រតិបត្តិការ»ដែលរៀបចំឡើងនេះនឹងផ្តោតជាចំបងលើមូលបទសម្រាប់ពិភាក្សាចំនួន០៣រួមមាន«ថាមពលរួមនៃគោលនយោបាយដើម្បីភាពជាដៃគូជិតស្និទ្ធ»«កិច្ចសហប្រតិបត្តិការលើការតភ្ជាប់ដើម្បីការអភិវឌ្ឍប្រទាក់ក្រឡា»និង«វិធីរឹតចំណងទាក់ទងរវាងប្រជាជននិងប្រជាជន»។ក្នុងវេទិកានេះខ្ញុំនឹងថ្លែងសុន្ទរកថាលើប្រធានបទពីរគឺ«ថាមពលរួមនៃគោលនយោបាយដើម្បីភាពជាដៃគូជិតស្និទ្ធ»និង«វិធីរឹតចំណងទាក់ទងរវាងប្រជាជននិងប្រជាជន»។
①ក. ថាមពលរួមនៃគោលនយោបាយដើម្បីភាពជាដៃគូជិតស្និទ្ធ
-ថាមពលរួមនៃគោលនយោបាយគឺជាមូលបទសំខាន់មួយក្នុងការបង្កើនភាពដៃគូរវាងកម្ពុជានិងចិន។ថាមពលរួមនៃគោលនយោបាយនេះនឹងអនុញ្ញាតឲ្យយើងប្រមូលផ្តុំធនធានយកមកប្រើប្រាស់ចំពោះវិស័យអាទិភាពសម្រាប់ការអភិវឌ្ឍឲ្យមានប្រសិទ្ធភាពដែលផ្តល់ផលប្រយោជន៍ទៅវិញទៅមក។ជាក់ស្តែងនៅឆ្នាំមុនភាគីទាំងពីរបានដាក់ចេញនូវបញ្ជីគម្រោងអាទិភាពនៃកិច្ចសហប្រតិបត្តិការសមត្ថភាពផលិតនិងវិនិយោគដោយកំណត់គម្រោងចំនួន១១ក្នុងចំណោមនោះរួមមានការអភិវឌ្ឍព្រលានយន្តហោះអន្តរជាតិថ្មីនៅខេត្តសៀមរាបការសាងសង់ផ្លូវល្បឿនលឿនភ្នំពេញ-ព្រះសីហនុការសាងសង់រោងចក្រអគ្គីសនីថ្មីៗនិងការអភិវឌ្ឍកសិ-ឧស្សាហកម្មក្នុងតំបន់សេដ្ឋកិច្ចពិសេសនៅតាមបណ្តាខេត្តនៅភូមិភាគឦសាននៃប្រទេស។
-គម្រោងជាច្រើនដែលបានលើកឡើងខាងលើមានទំនាក់ទំនងយ៉ាងខ្លាំងជាមួយនឹងគោលនយោបាយអភិវឌ្ឍន៍វិស័យឧស្សាហកម្មរបស់កម្ពុជា។ការសម្របសម្រួលគោលនយោបាយទៅវិញទៅមកក៏បានផ្តល់ផលសេដ្ឋកិច្ចទាំងរវាងរដ្ឋាភិបាលនិងវិស័យឯកជន។ជាក់ស្តែងទំហំពាណិជ្ជកម្មកម្ពុជា-ចិនបាននិងកំពុងកើនឡើងយ៉ាងឆាប់រហ័សជាមធ្យម២៦% ក្នុងមួយឆ្នាំនៅក្នុងរយៈពេល១០ឆ្នាំចុងក្រោយនេះ។ 
-តាមរយៈទំនាក់ទំនងមិត្តភាពនិងការសម្របសម្រួលគោលនយោបាយរដ្ឋាភិបាលចិនក៏បានលើកទឹកចិត្តក្រុមហ៊ុនល្បីឈ្មោះរបស់ចិនឲ្យផ្តោតការយកចិត្តទុកដាក់ចំពោះកម្ពុជា។ជាលទ្ធផលនៅខែធ្នូឆ្នាំ២០១៦មានវេទិកាមួយដែលមានមូលបទថា«កម្ពុជា៖ព្រះរាជាណាចក្រនៃកាលានុវត្តភាពនៅតាមបណ្តោយខ្សែក្រវ៉ាត់មួយផ្លូវមួយ»ត្រូវបានរៀបចំឡើងដោយមានសហគ្រាសជាង៦០០ចូលរួមនិងមានការចុះហត្ថលេខាលើកិច្ចព្រមព្រៀងក្នុងតម្លៃ១,៥ប៊ីលានដុល្លារអាមេរិកដើម្បីសាងសង់ទីក្រុងមិត្តភាពកម្ពុជា-ចិន។
②ខ. វិធីរឹតចំណងទាក់ទងរវាងប្រជាជននិងប្រជាជន
-ការផ្លាស់ប្តូររវាងរវាងប្រជាជននិងប្រជាជនគឺជាគន្លឹះក្នុងការលើកកម្ពស់ការយោគយល់គ្នានិងការកសាងទំនុកចិត្តទៅវិញទៅមក។បក្សនយោបាយស្ថាប័នរដ្ឋសភាវិស័យធុរកិច្ចគ្រឹះស្ថានសិក្សាប្រព័ន្ធផ្សព្វផ្សាយយុវជន។ល។ត្រូវធ្វើការប្រាស្រ័យទាក់ទងគ្នាឲ្យបានកាន់តែច្រើននិងល្អជាងមុនក្នុងគោលបំណងបង្កើតបណ្តាញនៃការផ្លាស់ប្តូរក្នុងទម្រង់ពហុទិដ្ឋភាពនិងពហុកម្រិត។
-សម្រាប់កម្ពុជាយើងយល់ឃើញថាវិស័យទេសចរណ៍មានសក្តានុពលយ៉ាងខ្លាំងក្នុងការជំរុញការផ្លាស់ប្តូររវាងប្រជាជននិងប្រជាជន។
-យើងមានការប្តេជ្ញាចិត្តជាពិសេសក្នុងការទាក់ទាញភ្ញៀវទេសចរចិនហើយរាជរដ្ឋាភិបាលកម្ពុជាបានផ្សព្វផ្សាយសៀវភៅសមានចំណងជើងថា«China Ready»ដែលបានដាក់ចេញនូវយុទ្ធសាស្ត្រ៥ឆ្នាំដើម្បីការទាក់ទាញភ្ញៀវទេសចរណ៍ចិនឲ្យបានចំនួន២លាននាក់ក្នុងមួយឆ្នាំត្រឹមឆ្នាំ២០២០។
Q-3 / សំនួរទី៣៖ទំនាក់ទំនងមិត្តភាពប្រពៃណីរវាងប្រទេសទាំងពីរមានប្រវត្តិសាស្រ្តដ៏យូរលង់ណាស់មកហើយ។នៅឆ្នាំមុនឯកឧត្តមស៊ីជីនភីងប្រធានាធិបតីចិនបានមកបំពេញទស្សនកិច្ចផ្លូវរដ្ឋជាប្រវត្តិសាស្រ្តប្រកបដោយជោគជ័យនៅប្រទេសកម្ពុជា។តើសម្តេចតេជោនាយករដ្ឋមន្រ្តីវាយតម្លៃយ៉ាងដូចម៉្តេចអំពីទំនាក់ទំនងសព្វថ្ងៃនៃប្រទេសទំាងពីរហើយតើសម្តេចតេជោនាយករដ្ឋមន្រ្តីមានចក្ខុវិស័យយ៉ាងដូចម៉្តេចដែរក្នុងការអភិវឌ្ឍទំនាក់ទំនងនៃប្រទេសទំាងពីរទៅថ្ងៃអនាគត?
ចម្លើយ៖
ខ្ញុំសូមរំលឹកឡើងបន្តិចថាកម្ពុជា-ចិនបានបង្កើតទំនាក់ទំនងការទូតជាផ្លូវការនៅថ្ងៃទី១៩ខែកក្កដាឆ្នាំ១៩៥៨ហើយទំនាក់ទំនងកិច្ចសហប្រតិបត្តិការនេះគឺបានបង្កើតឡើងរួមគ្នាដោយព្រះករុណាព្រះវររាជបិតានរោត្តមសីហនុព្រះបរមរតនកោដ្ឋនិងឯកឧត្តមប្រធានម៉ៅសេទុងឯកឧត្តមនាយករដ្ឋមន្រ្តីជូអេនឡាយព្រមទំាងថ្នាក់ដឹកនាំចិនជំនាន់មុនៗផ្សេងទៀត។ទំនាក់ទំនងមិត្តភាពជាប្រពៃណីនិងប្រវត្តិសាស្រ្តនិងកិច្ចសហប្រតិបត្តិការប្រកបដោយផ្លៃផ្កាកម្ពុជា-ចិនត្រូវបានបន្តពង្រឹងនិងពង្រីកបន្ថែមទៀតដោយថ្នាក់ដឹកនាំជំនាន់ក្រោយរហូតក្លាយទៅជា«កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ»នៅថ្ងៃទី១៣ខែធ្នូឆ្នាំ២០១០។
កម្ពុជា-ចិនបានរួមគ្នាបង្កើត«គណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន»នៅឆ្នាំ២០១៤ហើយយន្តការនេះបាននិងកំពុងដើរតួយ៉ាងសំខាន់ក្នុងការជម្រុញ«កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ»។រហូតមកដល់សព្វថ្ងៃកិច្ចប្រជុំនេះត្រូវរៀបចំឡើងចំនួន០៤លើករួចមកហើយហើយថ្មីៗនេះកិច្ចប្រជុំចុងក្រោយគឺរៀបចំនៅថ្ងៃទី២៧ខែមេសាឆ្នាំ២០១៧នៅរាជធានីភ្នំពេញហើយលើកក្រោយគឺនឹងរៀបចំឡើងនៅប្រទេសចិន។
យើងក៏មានការផ្លាស់ប្តូរទស្សនកិច្ចគ្នាជាន់ខ្ពស់ទៅវិញទៅមកជាញឹកញាប់ស្ទើរតែរៀងរាល់ឆ្នាំ។ជាក់ស្តែងឯកឧត្តមស៊ីជីនភីងប្រធានាធិបតីចិនបានអញ្ជើញមកបំពេញទស្សនកិច្ចផ្លូវរដ្ឋពីថ្ងៃទី១៣ដល់១៤ខែតុលាឆ្នាំ២០១៦នៅកម្ពុជាហើយព្រះករុណាជាអម្ចាស់ជីវិតលើត្បូងព្រះមហាក្សត្រកម្ពុជាបានយាងបំពេញព្រះរាជទស្សនកិច្ចផ្លូវរដ្ឋនៅប្រទេសចិនកាលពីថ្ងៃទី០២ដល់០៤ខែមិថុនាឆ្នាំ២០១៦។ខ្លួនខ្ញុំផ្ទាល់ក៏នឹងបំពេញទស្សនកិច្ចផ្លូវការបន្ទាប់ពីការចូលរួមវេទិកានេះផងដែរ។
ខ្ញុំសូមវាយតម្លៃខ្ពស់ចំពោះទំនាក់ទំនងមិត្តភាពជាប្រពៃណីប្រវត្តិសាស្រ្តនិងកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយកម្ពុជា-ចិនដែលជាទំនាក់ទំនងជាអ្នកជិតខាងល្អដូចជាបងប្អូនប្រកបដោយភាពស្មោះត្រង់និងជួយគ្នាទៅវិញទៅមកដោយឈរលើគោលការណ៍ជឿទុកចិត្តគ្នាគោរពគ្នាទៅវិញទៅមកមិនជ្រៀតជ្រែកកិច្ចការផ្ទៃក្នុងនិងផ្តល់ផលប្រយោជន៍ទៅវិញទៅមកដល់ប្រទេសនិងប្រជាជនយើងទំាងពីរ។ការអភិវឌ្ឍរបស់កម្ពុជាក្រោយទទួលបានសន្តិភាពពេញលេញមិនអាចកាត់ផ្តាច់បានពីជំនួយឥតសំណងឥណទានសម្បទាននិងការវិនិយោគដ៏ច្រើនសន្ធឹកសន្ធាប់របស់មិត្តចិនបានឡើយ។
ទន្ទឹមនឹងទំនាក់ទំនងទ្វេភាគីយើងក៏មានទំនាក់ទំនងកិច្ចសហប្រតិបត្តិការយ៉ាងសកម្មផងដែរក្នុងក្របខ័ណ្ឌពហុភាគីតួយ៉ាងដូចជានៅក្នុងអង្គការសហប្រជាជាតិកិច្ចសហប្រតិបត្តិការអាស៊ាន-ចិនមេគង្គ-ឡាងឆាងនិងវេទិកាអន្តរជាតិដទៃទៀតដើម្បីរួមគ្នាការពារនិងថែរក្សាសន្តិភាពសន្តិសុខស្ថិរភាពនិងវិបុលភាពរួមទំាងក្នុងតំបន់និងពិភពលោក។
នៅឆ្នាំ២០១៨ខាងមុខនេះគឺជាខួប៦០ឆ្នាំនៃការបង្តើតទំនាក់ទំនងការទូតកម្ពុជា-ចិន។៦០ឆ្នាំកន្លងមកនេះយើងបានកសាងរួមគ្នានូវសមិទ្ធផលជាផ្លែផ្កានៃមិត្តភាពនិងសហប្រតិបត្តិការជាច្រើន។យើងបានកសាងគ្រឹះយ៉ាងរឹងមាំសម្រាប់ទំនាក់ទំនងជាអ្នកជិតខាងល្អដូចជាបងប្អូនប្រកបដោយភាពស្មោះត្រង់និងជួយគ្នាទៅវិញទៅមកដោយឈរលើគោលការណ៍ជឿទុកចិត្តគ្នាគោរពគ្នាទៅវិញទៅមកមិនជ្រៀតជ្រែកកិច្ចការផ្ទៃក្នុងនិងផ្តល់ផលប្រយោជន៍ទៅវិញទៅមកដល់ប្រទេសនិងប្រជាជនយើងទំាងពីរ។ខ្ញុំសង្ឃឹមយ៉ាងមុតមាំថាកម្ពុជានិងចិននឹងបោះជំហានរួមគ្នាបន្តទៀតលើប្រវត្តិនៃទំនាក់ទំនងដ៏យូរលង់និងប្រពៃថ្លៃថ្លានេះឆ្ពោះទៅរកមិត្តភាពនិងកិច្ចសហប្រតិបត្តិការគ្រប់ជ្រុងជ្រោយនិងកាន់តែស៊ីជម្រៅថែមទៀតសម្រាប់ទសវត្សខាងមុខ៕
(ចប់)

ថ្ងៃទី១២ខែ​ឧសភា​​ឆ្នាំ​២០១៧​ , ដោយ​វិទ្យុ​មិត្តភាព​កម្ពុជា​-ចិន​
រូបភាពឯកសារ​

 

ត្រលប់ក្រោយ >>