កូនស្រីលោក Duterte លាលែងពីការប្រជែងតំណែងអភិបាលក្រុង ខណៈពេលកំណត់បោះឆ្នោតហ្វីលីពីនជិតមកដល់

វិទ្យុជាតិកម្ពុជា កញ្ញា ខៀវ ណាវីន

       អន្តរជាតិ ៖ កូនស្រីរបស់ប្រធានាធិបតីហ្វីលីពីន Rodrigo Duterte នៅថ្ងៃអង្គារ បានដកខ្លួនចេញពីការឈរឈ្មោះជាអភិបាលក្រុង Davao ចំពេលនៅសល់តែប៉ុន្មានថ្ងៃទៀតប៉ុណ្ណោះពីថ្ងៃកំណត់ ដើម្បីផ្លាស់ប្តូរបេក្ខជនសម្រាប់ការបោះឆ្នោតប្រធានាធិបតីនៅឆ្នាំក្រោយ។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី ១០ ខែវិច្ឆិកា។ លោកស្រី Sara Duterte-Carpio ដែលត្រូវបាន គេប្រាប់យ៉ាងទូលំទូលាយថានឹងអាចស្នងតំណែងបន្តពីឪពុក ប៉ុន្តែលោកស្រីមិនបាននិយាយពីមូលហេតុ ដែលលោកស្រីដកខ្លួនចេញពីការ ប្រកួតអភិបាលក្រុងនោះទេ តែបានប្រាប់អ្នកគាំទ្រនៅលើ Facebook ថា ការប្រកាសបន្ថែមនឹងត្រូវធ្វើឡើងនៅពេលក្រោយ។ ស្ត្រីវ័យ ៤៣ ឆ្នាំរូបនេះ បានជាប់ចំណាត់ថ្នាក់កំពូលនៅក្នុងការស្ទង់មតិពេញមួយឆ្នាំនេះលើបេក្ខជនដែលពេញចិត្តសម្រាប់ប្រធានាធិបតី ប៉ុន្តែបាន និយាយថានាងមិនចង់បានការងារនោះទេ។ ប្រទេសហ្វីលីពីនរៀបចំការបោះឆ្នោតនៅខែឧសភា ឆ្នាំ ២០២២ សម្រាប់តំណែងចាប់ពីកម្រិត ប្រធានាធិបតីរហូតដល់អភិបាលក្រុង និងមន្ត្រីក្នុងតំបន់។លោកស្រី Duterte-Carpioបាននិយាយម្តងហើយម្តងទៀតថា មិនចាប់អារម្មណ៍ ក្នុងការឈរឈ្មោះជាប្រធានាធិបតីនោះទេ។ ប្រធានាធិបតី Duterte ដែលមានអាយុ ៧៦ ឆ្នាំមិនអាចស្វែងរកអាណត្តិទីពីរនៅក្នុងតំណែង ដែលត្រូវបានហាមឃាត់នៅក្រោមរដ្ឋធម្មនុញ្ញ ហើយលោកគ្រោងនឹងចូលនិវត្តន៍នាពេលខាងមុខនេះ។ កូនស្រីរបស់លោកមានប្រជាប្រិយភាពយ៉ាងខ្លាំង ហើយគ្រួសារលោកមានឥទ្ធិពលនយោបាយយ៉ាងខ្លាំងនៅភាគខាងត្បូងនៃប្រទេស ដោយបានគ្រប់គ្រងទីក្រុង Davao អស់រយៈពេលប្រហែល ៣ទសវត្សរ៍។ បេក្ខជនផ្សេងទៀតសម្រាប់តំណែងជាប្រធានាធិបតី រួមមាន សមាជិកព្រឹទ្ធសភា និងអ្នកប្រដាល់ចូលនិវត្តន៍លោក Manny Pacquiao អតីតតារាសម្តែង និងអភិបាលក្រុងម៉ានីល Francisco Domagosoអនុប្រធានដែលកំពុងកាន់អំណាច លោកLeni Robredoសមាជិកព្រឹទ្ធសភាលោក Panfilo Lacsonនិងលោក Marcos៕