សម្ដេចតេជោ ហ៊ុន សែន ទទួលជួបពិភាក្សាការងារជាមួយសមាជិកការិយាល័យនយោបាយ លេខាមជ្ឈិមបក្ស នៃប្រទេសឡាវ

185

វិទ្យុជាតិកម្ពុជា៖ដោយ លោក មឹង កុសល៖


នៅព្រឹកថ្ងៃទី២៩ ខែតុលា ឆ្នាំ២០១៩នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឲ្យ ឯកឧត្តម ខាំផាន់ ភុំម៉ាថាត (KhamphanhPhommathat) សមាជិកការិយាល័យនយោបាយលេខាមជ្ឈិមបក្សនៃប្រទេសឡាវ ចូលជួបពិភាក្សាការងារ នៅវិមានសន្តិភាព រាជធានីភ្នំពេញ។
នៅក្នុងជំនួបនេះ ឯកឧត្តម ខាំផាន់ ភុំម៉ាថាត បានពាំនាំនូវការផ្តាំផ្ញើសួរសុខទុក្ខពី ឯកឧត្តម អគ្គលេខាធិការបក្ស និងឯកឧត្តម នាយករដ្ឋមន្ត្រីឡាវជូនចំពោះសម្ដេចតេជោនាយករដ្ឋមន្ត្រីនៃកម្ពុជា។ ឯកឧត្តមបានមានប្រសាសន៍ថា ឯកឧត្តមខានអញ្ជើញមកប្រទេសកម្ពុជាជាយូរមកហើយ តែពេលនេះ ឯកឧត្តមបានឃើញ កម្ពុជាមានការរីកចម្រើន លើគ្រប់វិស័យ។ ឯកឧត្តមសូមសំដែងនូវការអបអរសាទរចំពោះការដឹកនាំរបស់ សម្ដេចតេជោ ហ៊ុន សែន ជានាយករដ្ឋមន្ត្រី ជាពិសេសគណបក្សប្រជាជនកម្ពុជា ដែលធ្វើឲ្យកម្ពុជាមានសន្ទុះរីកចម្រើនយ៉ាងលឿនជាទីបំផុតនិងបានកែប្រែមុខមាត់កម្ពុជា ជាកម្ពុជាថ្មី មួយ។ ក្នុងន័យនេះឯកឧត្តមពិតជាមានសេចក្តីរីករាយហើយឯកឧត្តម បានជម្រាបជូនសម្តេចតេជោថាថ្នាក់ដឹកនាំនៃប្រទេសឡាវ ក៏ដូចជាប្រជាជនឡាវបានអបអរសាទរចំពោះការលើកតម្កើងទំនាក់ទំនងរវាងប្រទេសទាំងពីរឲ្យទៅជាដៃគូយុទ្ធសាស្ត្រគ្រប់ជ្រុងជ្រោយ។ ដំណើរទស្សនកិច្ចរបស់ឯកឧត្តមមកកាន់ប្រទេសកម្ពុជានាពេលនេះ គឺដើម្បីជំរុញទំនាក់ទំនង ក៏ដូចជាកិច្ចសហប្រតិបត្តិការរវាងប្រទេសទាំងពីរឲ្យកាន់តែស៊ីជម្រៅបន្ថែមទៀត ឲ្យស្របទៅតាមកម្រិតនៃទំនាក់ទំនងជាពិសេសជំរុញការងារ ដែលបានចុះហត្ថលេខាជាមួយគ្នាកន្លងមកឱ្យមានដំណើរការទៅមុខនិងទទួលបាននូវភាពជោគជ័យផងដែរ។ លើសពីនេះទៅទៀត ឯកឧត្តមក៏បានជម្រាបជូនសម្ដេចតេជោនាយករដ្ឋមន្ត្រីដោយសង្ខេបនៃដំណើរវិវត្តន៍របស់ប្រទេសឡាវ ពិសេសលើវិស័យម៉ាក្រូសេដ្ឋកិច្ចដោយឯកឧត្តមក៏បានគោរពសុំការណែនាំក៏ដូចជាអនុសាសន៍ ពីសម្តេចតេជោ ក្នុងការចែករំលែកនូវបទពិសោធន៍របស់ប្រទេសកម្ពុជា។
ជាការឆ្លើយតប សម្ដេចតេជោនាយករដ្ឋមន្ត្រី បានថ្លែងអំណរគុណចំពោះការផ្តាំផ្ញើសាកសួរសុខទុក្ខពី ឯកឧត្តមអគ្គលេខាធិការបក្ស ក៏ដូចជានាយករដ្ឋមន្ត្រីនៃប្រទេសឡាវ និងអរគុណចំពោះការលើកឡើងនូវវឌ្ឍនភាព និងការវិវឌ្ឍរីកចម្រើនរបស់ប្រទេសកម្ពុជា។ សម្ដេចតេជោបានសំដែងនូវការរីករាយយ៉ាងខ្លាំងចំពោះដំណើរទស្សនកិច្ចរបស់ ឯកឧត្តម ថងលូន ស៊ីស៊ូលីត កន្លងមក ដែលទាំងនោះគឺបានចូលរួមលើកកំពស់នូវទំនាក់ទំនង និងកិច្ចសហប្រតិបត្ដិការរវាងប្រទេសយើងទាំងពីរឲ្យកាន់តែល្អប្រសើរឡើងថែមទៀត ជាពិសេសដើម្បីធ្វើយ៉ាងណាបង្កើនការវិនិយោគបន្ថែមទៀត។ ក្នុងនោះប្រទេសយើងទាំងពីរ ក៏បានជំរុញនូវការអភិវឌ្ឍន៍ទៅលើវិស័យថាមពលអគ្គិសនីបន្ថែមទៀតនៅក្នុងប្រទេសកម្ពុជា ជាពិសេសការផ្គត់ផ្គង់អគ្គិសនីមកកម្ពុជា។ សម្តេចតេជោ នាយករដ្ឋមន្ត្រី ក៏បានលើកទឹកចិត្តធ្វើយ៉ាងណាឱ្យភាគីទាំងពីរ កម្ពុជា-ឡាវ បន្តយកចិត្តទុកដាក់ក្នុងកិច្ចសហប្រតិបត្តិការរវាងគ្នានិងគ្នា ជាពិសេសជំរុញការអភិវឌ្ឍហេដ្ឋារចនាសម្ព័ន្ធរួមទាំងវិស័យអគ្គិសនីនេះ ហើយសម្តេចតេជោក៏សូមស្នើឲ្យពិនិត្យមើលលទ្ធភាពលើសក្តានុពលផ្សេងទៀត ដែលប្រទេសយើងទាំងពីរអាចសហការគ្នាបានក្នុងន័យជំរុញ និងពង្រឹងបន្ថែមទៀតនូវទំនាក់ទំនងរវាងប្រទេសទាំងពីរឲ្យស្របទៅតាមអ្វីដែលថ្នាក់ដឹកនាំបានលើកឡើងក្នុងកម្រិតទំនាក់ទំនងដែលជាដៃគូយុទ្ធសាស្ត្រគ្រប់ជ្រុងជ្រោយនោះ៕

អត្ថបទដែលជាប់ទាក់ទង