អាជ្ញាធរខេត្តកំពង់ឆ្នាំងចាប់ផ្តើមបម្លាស់ទីផ្ទះបណ្ដែតទឹកឡើងទៅលើគោក

124

វិទ្យុជាតិកម្ពុជា៖ ដោយលោក ហោ សេងគ្រី៖
នៅថ្ងៃដំបូងអាជ្ញាធរខេត្តកំពង់ឆ្នាំង បានបម្លាស់ទីផ្ទះ​បណ្ដែតទឹក​អោយ​​ទៅកាន់ចំណុចដីគោកនៅកន្លែងបំរ៉ុងទុក ក្នុងឃុំស្វាយជ្រុំ ស្រុករលាប្អៀរ បានចំនួនជាង ១១៥ខ្នងផ្ទះ។
អាជ្ញាធរខេត្តកំពង់ឆ្នាំង សំណូមឲ្យប្រជាពលរដ្ឋ ចូលរួមសហការ ទាន់ពេលវេលា ខណៈទឹកទន្លេ កំពុងឡើងខ្ពស់ងាយស្រួល​អូសផ្ទះ​ទឹក​បម្លាស់ទីឡើងលើគោក។


លោកស៊ុនសុវណ្ណរិទ្ធអភិបាលរងខេត្តកំពង់ឆ្នាំង បានអោយដឹងថា នៅ​​​​​​ថ្ងៃទី០១ ខែតុលា ដែលជាថ្ងៃដំបូង ក្រុមការងារបានអូសផ្ទះ​បម្លាស់​​ទីមានចំនួន៦គោលដៅ គឺមានស្រុកជលគិរី ស្រុកកំពង់​ត្រឡាច​​និងស្រុកបរិបូណ៌បានចំនួន១១៥ខ្នងផ្ទះ ។ក្នុងនោះក្រុងកំពង់ឆ្នាំងបាន៧ខ្នងផ្ទះ ឃុំតាជេសបានចំនួន២០ខ្នងផ្ទះ ,ភូមិព្រែករាំង២៥ខ្នងផ្ទះ, ស្រុកបរិបូណ៌ ១០ខ្នងផ្ទះ ,កំពង់ត្រឡាចបាន៤៤ខ្នងផ្ទះនិងស្រុកជលគីរីបានចំនួន៣ខ្នងផ្ទះ។ ការបន្លាស់ទីតាមគោលដៅនេះ គឺតាមសំណូមពររបស់ប្រជាពលរដ្ឋ ដែលបានលើកឡើងថាៈ ពួកគេនៅកន្លែងណា សុំបម្លាស់ទី ឡើងគោកនៅជិតទីនោះ ។ប៉ុន្តែតាមផែនការ គឺពួកគាត់ត្រូវមកតាំងទៅកន្លែងតែមួយ ស្ថិតក្នុងឃុំស្វាយជ្រុំ ស្រុករលាប្អៀរ ។

ចំណែកប្រជាពលរដ្ឋរស់នៅលើផ្ទះបណ្តែតទឹកនៅក្នុងខេត្ត សរុប​មាន​ចំនួន២៣៩៥គ្រួសារ ស្មើនិងចំនួន ១០.០៨៧នាក់ ។
លោក ស៊ុន សុវណ្ណារិទ្ធបន្តថា ក្រោយពីបន្លាស់ទីផ្ទះបណ្តែតទឹក អាជ្ញា​ធរខេត្ត នឹងរៀបចំច្រាំងទន្លេ អោយក្លាយជាតំបន់ទេសចរណ៍ ដូចជា​ការ​​រៀបចំបែរចិញ្ចឹម ត្រី ធ្វើសួនផ្កាជាដើម ។ តាមការ​ប៉ាន់ប្រ​មាណ​ពីដំបូងមានចំនួនជាង៧០ហិកតាប៉ុន្តែក្នុងជំហានដំបូង មានត្រឹមតែ​ប្រមា៣៥ ហិកតាប៉ុណ្ណោះ។ ចំណែកនៅក្នុង​ទីតាំងថ្មីនេះ អាជ្ញាធ​រខេត្ត​​​​នឹង​​រៀបចំកសាងផ្លូវដាក់ប្រព័ន្ធលូបង្ហូរទឹក រៀបចំប្រព័ន្ធទឹក​ស្អាតដាក់ភ្លើងអគ្គិសនី និងមានសាលារៀន និងសាលាបុណ្យផងដែរ។
លោកបានអំពាវនាវដល់ប្រជាពលរដ្ឋទាំងអស់ចូលរួមសហការគ្នាដើម្បីអូសផ្ទះបណ្ដែតទឹកឲ្យទាន់ទឹកទន្លេនៅកំពុងឡើងខ្ពស់ងាយស្រួលក្នុងការអូសផ្ទះបណ្តែតទឹតាមគោលដៅ ។ ម៉្យាងទៀតបើយើងរុះរើផ្ទះទឹកក្នុងខែប្រាំងវិញ នឹងនាំអោយខូចខាត បាក់បែកនិងចំណាយថវិកាច្រើន ។
លោកអភិបាលរងខេត្ត ក៍បានសុំការយោគយល់អាធ្យាស្រ័យ ពីសំណាក់ប្រជាពលរដ្ឋផងដែរ ព្រោះការបម្លាស់ទីទៅកន្លែងថ្មី អាចមានការយឺតយ៉ាវក្នុងតភ្ជាប់ចរន្តអគ្គីសនី និងប្រព័ន្ធទឹកស្អាតជាដើម ដោយសារពេលនេះទឹកទន្លេឡើងលិចទីតាំងដែលត្រូវមករស់នៅហើយ នៅពេលទឹកស្រក ទើបអាចតភ្ជាប់ចរន្តអគ្គីសនី និងប្រពន្ធ័ទឹកស្អាតបាន៕

អត្ថបទដែលជាប់ទាក់ទង