ប្រមុខរាជរដ្ឋាភិបាលកម្ពុជាបានណែនាំដល់ក្រសួងព័ត៌មានឲ្យបង្កើតច្បាប់ស្តីពីបទល្មើសបច្ចេកវិទ្យា

4

វិទ្យុជាតិកម្ពុជា​៖​ ដោយ​ ធី​ណា​ ឌី​ណេ​៖

ប្រមុខរាជរដ្ឋាភិបាលកម្ពុជាបានណែនាំដល់ក្រសួងព័ត៌មានឲ្យបង្កើតច្បាប់ថ្មីមួយទៀតស្តីពីបទល្មើសបច្ចេកវិទ្យាព័ត៌មាន ដើម្បីធានាការពារដល់សន្តិសុខនិងការទប់ស្កាត់បទល្មើសនានាតាមប្រព័ន្ធអ៊ីនធឺណេត ខណះដែលវិស័យបច្ចេកវិទ្យាកំពុងមានការរីកចំរើនខ្លំាង។
សម្តេចអគ្គមហាសេនាបតីតេជោហ៊ុនសែន នាយករដ្ឋមន្រ្តីនៃកម្ពុជាបានអះអាងថា ការជំរុញអោយមានការបង្កើតច្បាប់ថ្មីនេះ គឺពុំមែនជាការរឹតត្បិតសិទ្ធិសេរីភាពក្នុងការបញ្ចេញមតិនៅកម្ពុជាឡើយ ប៉ុន្តែជាការធានាការពារផ្នែកច្បាប់នៅកម្ពុជា។
ថ្លែងក្នុងជំនួបជាមួយអ្នកសារព័ត៌មានលើកទី៣ប្រមាណជាង៥០០០នាក់នៅថ្ងៃទី១១ ខែមករានេះ សម្តេចតេជោនាយករដ្ឋមន្រ្តីបានឲ្យដឹងថា បច្ចុប្បន្នកម្ពុជាមានរួចមកហើយច្បាប់ស្តីពីរបបសារព័ត៌មានឆ្នាំ១៩៩៥ ជាមួយគ្នានេះក៏កំពុងតែធ្វើសេចក្តីព្រាងច្បាប់ស្តីពីសិទ្ធិទទួលព័ត៌មាន ដែលគ្រោងបញ្ជូនមកកាន់គណៈរដ្ឋមន្រ្តីនៅពេលឆាប់ៗនេះ ប៉ុន្តែកម្ពុជាត្រូវការច្បាប់ថ្មីមួយទៀតស្តីពីបទល្មើសបច្ចេកវិទ្យាព័ត៌មាន ដើម្បីអោយមានភាពប្រទាក់ក្រឡាគ្នាទៅវិញទៅមក ក្នុងការលើកកម្ពស់សិទ្ធិសេរីភាពនិងការបញ្ចេញមតិ ប្រកបដោយភាពត្រឹមត្រូវនៅកម្ពុជា។ សម្តេចបានអះអាងថា ការបង្កើតឲ្យមានច្បាប់បទល្មើសបច្ចេកវិទ្យានេះ គឺពុំមែនតែមាននៅកម្ពុជាទេ បណ្តាប្រទេសមួយចំនួននៅលើពិភពលោក ក៏បានធ្វើច្បាប់នេះឡើងដែរ ដើម្បីការពារ និងប្រឆាំងអំពើឧក្រឹដ្ឋកម្មតាមប្រព័ន្ធបច្ចេកវិទ្យា។
សម្លេង«បណ្តាលប្រទេសនៅអឺរ៉ុប ភាគច្រើនស្ទើរតែទាំងស្រុង បានថ្លែងថាគ្មានប្រទេសណាមួយដែលភ្លេចអំពីឧក្រិដ្ឋកម្មប្រព័ន្ធបច្ចេកទ្យានោះទេ ហើយនឹងបញ្ហាព័ត៌មានក្លែងក្លាយ ។សូម្បីតែប្រទេសដែលគោរពសិទ្ធិបញ្ចេញមតិ ក៏បានបង្ហាញពីក្តីព្រួយបារម្ភអំពី បញ្ហាឧក្រិដ្ឋកម្មព័ត៌មានវិទ្យានិងព័ត៌មានក្លែងក្លាយរហូតដល់ប្រទេសខ្លះ នៅក្នុងប្រទេសអឺរ៉ុប ដែលគេចាត់ទុកថាជាបិតាប្រជាធិបតេយ្យ ក៏ត្រូវតែមានច្បាប់រារាំងដើម្បីដាក់ទណ្ឌកម្មទៅលើ ព័ត៌មានក្លែងក្លាយ និងដាក់ទណ្ឌកម្មទៅលើការរំលោភបំពានអំពី បច្ចេកវិជ្ជាព័ត៌មានផងដែរ។
ដូច្នោះយើងត្រូវស្នើឲ្យមានការពិភាក្សា ឲ្យច្បាស់ទៅលើបញ្ហានេះដើម្បីលើជាក្របខ័ណ្ឌនៃការគ្រប់គ្រង់ ប៉ុន្តែនៅពេលដែលយើងនិយាយពីការគ្រប់គ្រង និងមានអ្នកខ្លះនឹងចេញមកធ្វើអត្ថធិប្បាយថាយើងតម្រង់ឆ្ពោះទៅរករបបផ្តាច់ការហើយ ព្រោះពួកគេត្រូវការណាស់នៅរបស់ដែលហៅថា ការបំពានសេរីភាពចំពោះអ្នកដទៃតាមរយៈប្រព័ន្ធផ្សព្វផ្សាយរបស់ពួកគេ។ ដូច្នេះចំណុចដែលខ្ញុំចង់លើកឡើងមុនដើម្បីដោះស្រាយបញ្ហាទាក់ទងទៅនឹងការគ្រប់គ្រងនិងជំរុញបច្ចេកវិទ្យាការវិវឌ្ឍជឿនលឿននៅក្នុងវិស័យព័ត៌មានរបស់កម្ពុជា។

អត្ថបទដែលជាប់ទាក់ទង