អភិបាល​ខេត្ត​កំពង់ចាម​ នាំយក​បច្ច័យ​ ប្រគេន​ព្រះសង្ឃ​ សម្រាប់​កសាង​ដំបូល​ព្រះវិហារ​ វត្ត​កោះកុក

28

វិទ្យុជាតិកម្ពុជា​៖​ ដោយ​ លោក​ ចន​ ណារិទ្ធ​៖

ឯកឧត្តម​ គួច​ ចំរើន​ អភិបាល​នៃ​គណៈ​អភិបាល​ខេត្ត​កំពង់ចាម​ អមដំណើរ​ដោយ​មន្ត្រី​រាជការក្រោមឱវាត​ នារសៀល​ថ្ងៃ​ទី​១១​ ខែមករា​ ឆ្នាំ​២០១៩នេះ​ បានអញ្ជើញ​ជួប​សំណេះសំណាល​ និង​នាំយក​បច្ច័យ​ទៅ​ប្រគេន​សម្រាប់​កសាង​ដំបូល​ព្រះវិហារ និងឧបដ្ឋានសាលា ឬសាលាឆាន់ ១ខ្នង មានទំហំ ២០ គុណនឹង ១០ម​ នៃ​វត្ត​គង់វង់រង្សី ហៅវត្តកោះកុក ស្ថិតនៅ​ក្នុង​ភូមិកោះកុក «ក» ឃុំកោះទន្ទឹម ស្រុកកំពង់សៀម ខេត្តកំពង់ចាម​ បន្ទាប់ពី​ទទួល​ការគំរាមកំហែង​ដោយ​គ្រោះធម្មជាតិ បណ្តាល​ឲ្យ​មានការបាក់ស្រុត​ដីច្រាំងទន្លេនា​ពេល​កន្លងមក​ ហើយ​ត្រូវបាន​ផ្លាស់ប្ដូរ​មកកាន់​ទីតាំង​ថ្មី​នេះ។

លោក​ស្រី​ សុភ័ក្ដ្រ​ ប្រធាន​មន្ទីរ​ធម្មកា​និង​សាសនា​ ខេត្តកំពង់ចាម​ បាន​ឲ្យ​ដឹង​ថា​ បន្ទាប់ពី​ទទួល​ការ​គំរាមកំហែង​ដោយ​គ្រោះធម្មជាតិ បាក់​ច្រាំង​ទន្លេ​ទៅដល់វត្តកោះកុក ដែលតម្រូវឲ្យរកទីតាំងសមស្រប ដើម្បី កសាងឡើងវិញ ដោយមានការឯកភាព ពីសំណាក់ប្រជាពលរដ្ឋ ព្រះសង្ឃ គណៈកម្មាការអាចារ្យវត្ត ក៏សម្រេចទិញដី ទំហំ​១៥០x១១៥ម៉ែត្រ​ នៅភូមិកោះកុក «ក» នៃឃុំកោះទន្ទឹមនេះ ដើម្បី កសាងវត្តកោះកុក សម្រាប់​អ្នក​ភូមិ​ជាង​៣០០គ្រួសារ​ ក៏​ដូច​ជា​ពុទ្ធបរិស័ទទូទៅ ទុក​ជា​ទី​សក្ការៈ​បូជា​ ហើយ​ក៏​បានដង្ហែព្រះពុទ្ធបដិមា ក៏ដូចជា សម្ភារៈផ្សេងៗ យកមកតម្កល់ទុកជាបណ្ដោះអាសន្ន នៅលើទីតាំង​ខាងលេីនេះ ដើម្បី​រង់ចាំ​កសាងអារាមថ្មី ឡើងវិញផងដែរ​។​

ថ្លែង​​ក្នុង​ឱកាស​នោះ​ដែរ​ ឯកឧត្ដម​ គួច​ ចំរើន​ អភិបាល​ខេត្ត​កំពង់ចាម​ បាន​លើក​ឡើង​ថា​ បន្ទាប់ពី​មាន​ការ​កសាងអគារសិក្សាថ្មី មានចំនួន ២ខ្នង ស្មើនឹង ១០បន្ទប់ ដែលជាអំណោយដ៏ថ្លៃថ្លា របស់សម្ដេចតេជោ ហ៊ុន សែន ត្រូវចំណាយថវិកាប្រមាណជា ២០ម៉ឺនដុល្លារសហរដ្ឋអាមេរិក ទុកជាទីកន្លែង សម្រាប់កូនចៅប្រជាពលរដ្ឋ បានសិក្សារៀនសូត្រ​ និង​ការ​កសាង​វត្ត​អារាម​លេី​ទី​តាំង​ថ្មីនេះ​ តាម​រយៈ​ ឯកឧត្តម​ ​លន់ លឹមថៃ អ្នក​តំណាង​រាស្ត្រ​ ​មណ្ឌល​កំពង់ចាម​ ផងនោះ​។ ឯកឧត្តម​អភិបាល​ខេត្ត​ ក៏បាន​នាំយក​បច្ច័យ​ចំនួន​៨លានរៀល​ ​សម្រាប់​បង្ហើយ​កសាង​ដំបូល​ព្រះវិហារ​​ វត្ត​គង់វង់រង្សី ហៅវត្តកោះកុក នេះផងដែរ​ ៕

អត្ថបទដែលជាប់ទាក់ទង