កម្ពុជាត្រៀមចូលរួមកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប នៅទីក្រុងព្រុចស៊ែល ប្រទេសបែលហ្ស៊ិក

52

វិទ្យុជាតិកម្ពុជា​៖​ ដោយ​ លោក ហោ សេងគ្រី៖


គណៈប្រតិភូកម្ពុជាដឹកនាំដោយឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា នឹងអញ្ជើញទៅចូលរួមកិច្ចប្រជុំ រដ្ឋមន្ត្រីការបរទេសអាស៊ាន-សហភាពអឺរ៉ុបដែលនឹងប្រព្រឹត្តទៅនៅទីក្រុងព្រុចស៊ែល ប្រទេសបែលហ្ស៊ិក នៅថ្ងៃទី២១ ខែមករា ឆ្នាំ២០១៩។
ការអញ្ជើញទៅចូលរួមកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុបរបស់កម្ពុជានាពេល ខាងមុខនេះគឺតបតាមការអញ្ជើញរបស់លោកជំទាវ ហ្វេដឺរីកា ម៉ូហ្គេរីនី តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេសនិងគោលនយោបាយសន្តិសុខនិងជាអនុប្រធាននៃគណៈកម្មាការអឹរ៉ុប។
សេចក្តីប្រកាសព័ត៌មានរបស់នាយកដ្ឋានព័ត៌មាននៃក្រសួងការបរទេស និងសហប្រតិបត្តិការអន្តរជាតិ បានអោយដឹងថា នៅក្នុងអំឡុងពេលនៃកិច្ចប្រជុំ រដ្ឋមន្រ្តីការបរទេសអាស៊ាន និងសមភាគីអឺរ៉ុប នឹងពិភាក្សាគ្នាអំពីវិស័យនៃកិច្ចសហប្រតិបត្តិការមួយចំនួន ដែលមានផលប្រយោជន៍រួម ដើម្បីសម្រេចនូវគោលបំណងរួមមួយ នៃសមាហរណកម្មតំបន់ប្រកបដោយសន្តិភាព ស្ថិរភាព និងវិបុលភាព។
ក្នុងអំឡុងពេលស្នាក់នៅទីក្រុងព្រុចសែល ឯកឧត្តមឧបនាយករដ្ឋមន្រ្តី ប្រាក់ សុខុន មានគម្រោងនឹងជួបទ្វេភាគី ជាមួយឯកឧត្តម ឌីឌ៉្យេរ រ៉េនឌ័រ ឧបនាយករដ្ឋមន្រ្តី និងជារដ្ឋមន្រ្តីការបរទេស និងកិច្ចការអឺរ៉ុប របស់បែលហ្ស៊ិក លោកជំទាវ សេស៊ីលីយ៉ា ម៉ាលស្រ្តុម ស្នងការពាណិជ្ជកម្មសហភាពអឺរ៉ុប និងជាមួយប្រធានគណៈប្រតិភូផ្សេងៗទៀត។
សហភាពអឺរ៉ុបបានក្លាយជាដៃគូសន្ទនាអាស៊ាន នៅឆ្នាំ១៩៧៧ ហើយចាប់តាំងពីពេលនោះមក ទំនាក់ទំនងរវាងតំបន់ទាំងពីរ បានឈានដល់កំរិតខ្ពស់មួយ ដោយគ្របដណ្តប់លើវិស័យកិច្ចសហប្រតិបត្តិការជាច្រើន រួមមាននយោបាយ សេដ្ឋកិច្ចនិងពាណិជ្ជកម្ម សង្គម និងការតភ្ជាប់ជាដើម។ ឈរលើភាពជាដៃគូជាច្រើនទសវត្សរ៍នេះ កិច្ចព្រមព្រៀងជាច្រើនត្រូវបានចុះហត្ថលេខា ដែលជាមូលដ្ឋានដ៏រឹងមាំសម្រាប់ទិសដៅអនាគតនៃតំបន់ទាំងពីរ៕

អត្ថបទដែលជាប់ទាក់ទង