សភាឥណ្ឌូណេស៊ីអនុម័តច្បាប់ផ្លាស់ប្តូរទីតាំងរដ្ឋធានីទៅ Nusantara

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ សមាជិកសភាឥណ្ឌូណេស៊ីកាលពីថ្ងៃអង្គារបានអនុម័តច្បាប់ស្តីពីការផ្លាស់ប្តូរទីតាំងរដ្ឋធានីរបស់ប្រទេសនេះទៅកាន់កោះKalimantanដែល មានព្រំប្រទល់ជាប់ប្រទេសម៉ាឡេស៊ី និងប្រ៊ុយណេ។ នេះបើយោងតាមការចេញផ្សាយដោយសារព័ត៌មាន Xinhua។ ការផ្លាស់ប្តូរនេះគឺជាជំហានឆ្ពោះទៅមុខនៅក្នុងគម្រោងមហិច្ឆិតាបំផុតមួយដែលផ្តួចផ្តើមដោយលោក Joko Widodo ជាប្រធានាធិបតីរបស់ប្រទេសនេះ។ អតីតប្រធានាធិបតីមួយចំនួនបានបណ្ដែតគំនិតផ្លាស់ប្តូររាជធានីកាលពីអតីតកាល។ ប្រធានាធិបតីដែលត្រូវបានគេស្គាល់ជាទូទៅថា Jokowi កាលពីបីឆ្នាំមុនបានប្តេជ្ញាផ្លាស់ប្តូរទីតាំងរដ្ឋធានីទៅកាន់ខេត្ត Kalimantan ខាងកើត ដោយសារបញ្ហាមួយចំនួន រួមទាំងដង់ស៊ីតេប្រជាជនខ្ពស់ និងការ បាក់រលំដីនៅក្នុងទីក្រុងហ្សាការតា ដែលមានប្រជាជនជាង ១០ លាននាក់។ Nusantara ដែលជារាជធានីថ្មី នឹងត្រូវបានសាងសង់នៅក្នុងស្រុកចំនួនពីរនៅ Kalimantan ខាងកើតគឺ Penajam Paser Utara និង Kutai Kartanegara ។ វាត្រូវបានកំណត់សាងសង់លើផ្ទៃដីប្រហែល ២៥៦,០០០ ហិកតា។ រដ្ឋមន្ត្រីក្រសួងផែនការអភិវឌ្ឍន៍ជាតិ Suharso Monoarfa បាន និយាយថា ឈ្មោះ Nusantara ដែលអាចបកប្រែជាប្រជុំកោះជាភាសាអង់គ្លេស ត្រូវបានជ្រើសរើសដោយប្រធានាធិបតី Jokowi។ ឥណ្ឌូណេស៊ី ដែលជាប្រទេសមានប្រជាជនច្រើនជាងគេលំដាប់ទីបួនរបស់ ពិភពលោក មានប្រជាជនប្រមាណ ២៧០ លាននាក់ ដែលមានកោះប្រហែល ១៧,០០០។ លោករដ្ឋមន្ត្រី Monoarfa បានពន្យល់ក្នុងអំឡុងកិច្ចប្រជុំជាមួយសមាជិកសភានៅអគារសភាតំណាងកាលពីថ្ងៃអង្គារថា "រដ្ឋធានីជាតិ មានមុខងារកណ្តាល និងដើរតួជានិមិត្តសញ្ញានៃប្រទេសមួយដើម្បីបង្ហាញពីអត្តសញ្ញាណជាតិ និងរដ្ឋ"៕