ស្ថានីយផ្គត់ផ្គង់ទឹកស្អាតនៅខេត្តស្ទឹងត្រែង ស្ថាបនាបានជាង៧០ភាគរយហើយ

អត្ថបទដោយ៖លោក គឹមហឿន
MC៖ស្ថានីយផ្គត់ផ្គង់ទឹកស្អាតនៅខេត្តស្ទឹងត្រែង ស្ថិតក្នុងសង្កាត់ព្រះបាទ ក្រុងស្ទឹងត្រែង ស្ថាបនាបានជាង៧០ភាគរយហើយ ដោយក្រុមហ៊ុន ពន្លឿនការស្ថាបនាឱ្យហើយនៅ ចុងឆ្នាំ ២០២១នេះ ដើម្បីបម្រើសេចក្តីត្រូវការក្នុងជីវភាពប្រចាំថ្ងៃរបស់ប្រជាពលរដ្ឋ។
     ក្នុងឱកាសចុះពិនិត្យសកម្មភាពសាងសង់ស្ថានីយទឹកស្អាតក្រុងស្ទឹងត្រែង លោក សន ចន្ធី អនុប្រធានគម្រោងផ្គត់ផ្គង់ទឹកស្អាតទីប្រជុំជនបានបញ្ជាក់ថា គម្រោងសាងសង់ ស្ថានីយទឹកស្អាតដ៏ធំទីមួយនេះ បានស្ថាបនាឡើងលើផ្ទៃដីជាង១៧.០០០ម៉ែត្រក្រឡា នៅខេត្តស្ទឹងត្រែង ហើយអាចផ្គត់ផ្គង់ទឹកស្អាតជូនប្រជាពលរដ្ឋទូទាំងខេត្ត ប្រើប្រាស់បាន គ្រប់គ្រាន់ ព្រោះទីតាំងស្ថានីយនេះមានរយៈកម្ពស់រហូតដល់ទៅ៥៥ម៉ែត្រ។
លោកបន្តថា នេះជាការអនុវត្តនូវគោលនយោបាយរបស់រាជរដ្ឋាភិបាល ក្រោមកិច្ចសហការជាមួយដៃគូវិនិយោគ ដែលបានប្រើប្រាស់ហិរញ្ញប្បទានឥណទាន របស់ធនាគាអភិវឌ្ឍអាស៊ីហៅកាត់ថា(A D B) និងធ្វើឱ្យសម្រេចតាមផែនការនៅឆ្នាំ ២០២៥ ប្រជាពលរដ្ឋនឹងមានទឹកស្អាតប្រើប្រាស់គ្រប់គ្រាន់។
   លោក សាយ កុសល អភិបាលក្រុងស្ទឹងត្រែង បានសាទរជាមួយនឹងការទទួលបាន នូវសមិទ្ធផលថ្មីនេះ ព្រោះបច្ចុប្បន្នប្រជាពលរដ្ឋនៅក្នុងក្រុងមួយចំនួនតូចតែប៉ុណ្ណោះ ដែលទទួលបានទឹកស្អាតប្រើប្រាស់ពីស្ថានីយចាស់។
លោកសង្ឃឹមថា៖នៅពេលស្ថានីយ៍នេះស្ថាបនាហើយ ប្រជាពលរដ្ឋទូទំាងខេត្ត នឹងទទួលបាន ទឹកស្អាតប្រើប្រាស់ទៅតាមដំណាក់កាលនីមួយៗ ដែលក្រុមបច្ចេកទេស និងរៀបចំជូនពីទីប្រជុំជនដល់ទីជនបទ។
សូមបញ្ជាក់ថា តាមការឱ្យដឹងពីក្រុមហ៊ុនវិនិយោគ ស្ថានីយនេះ នឹងបើកដំណើរការ ឱ្យប្រើប្រាស់នៅចុងឆ្នាំ២០២១  ទៅតាមជំហានៗ  ដែលនឹងធ្វើឱ្យសម្រេចនូវ គោលនយោបាយរបស់រាជរដ្ឋាភិបាលដែលថា ឆ្នាំ២០២៥ ប្រជាពលរដ្ឋក្នុងខេត្តស្ទឹងត្រែង មានទឹកស្អាតប្រើប្រាស់គ្រប់ក្រុមគ្រួសារ៕