វិទ្យុជាតិកម្ពុជា៖ ដោយ លោក ចន ណារិទ្ធ
រាជធានីភ្នំពេញ៖ ឯកឧត្ដម ឃួង ស្រេង អភិបាលរាជធានីភ្នំពេញ បានអះអាងថា រាជធានីភ្នំពេញ មានបង្គន់អនាម័យច្រេីនលេីសលុប ដូចនេះបងប្អូនប្រជាពលរដ្ឋត្រូវតែចូលរួមថែរក្សាអនាម័យនិងបរិស្ថានរាជធានីភ្នំពេញរបស់យេីងទាំងអស់គ្នា ។ ឯកឧត្ដម ឃួង ស្រេង មានប្រសាសន៍បែបនេះ នៅក្នុងកិច្ចប្រជុំស្តីពី ការងារគ្រប់គ្រង និងវិធានការទប់ស្កាត់ ម៉ូតូ និងរថយន្តបំពាក់បំពង់សុីម៉ាំងប្រែនៗ នៅសាលារាជធានីភ្នំពេញ នាព្រឹកថ្ងៃទី២០ខែមករាឆ្នាំ២០២១។
ឯកឧត្តម ឃួង ស្រេង បានបញ្ជាក់ថា រាជធានីភ្នំពេញ មាន បង្គន់អនាម័យច្រេីនណាស់រាប់ទាំងនៅតាមទីសាធារណៈ និងតាមស្ថានីយលក់សាំងឬម៉ាតធំៗជាច្រេីនគេមិនកំណាញ់ទេ តែគាត់មិនព្រមចូល ។ គ្មានប្រទេសណាគេធ្វេីបង្គន់អនាម័យ១០០ម៉ែត្រ១នោះទេ អ្នកនៅទីក្រុងត្រូវមានចរិតថ្លៃថ្នូរ និងមានផែនការច្បាស់លាស់ គឺមុននឹងចេញពីផ្ទះត្រូវបត់ជើងឱ្យហេីយ កុំមានមាត់និងអណ្តាត ចេះតែគ្រលាស់នោះ ។
គួររំលឹកថា កាលពីព្រឹកថ្ងៃទី១៩ខែមករាឆ្នាំ២០២១កន្លងមកនេះ រដ្ឋបាលខណ្ឌដូនពេញបានឃាត់ខ្លួន អ្នកមកបន្ទោបង់នៅតាមសួនច្បារសាធារណៈ តាមដើមឈេី និងទីតាំងសាធារណៈផ្សេងៗទៀត បានចំនួន ១៣នាក់ យកមកអប់រំណែនាំ នៅសាលាខណ្ឌ ដូនពេញ ៕
Comments