វិទ្យុជាតិកម្ពុជា៖លោកចេម ហួតក្រសួងការពារជាតិនៃប្រទេសកម្ពុជា កាលពីរសៀលថ្ងៃទី២០ ខែមករា ឆ្នាំ២០២១ បានចុះអនុស្សារណៈជាមួយក្រុមហ៊ុនចិន Sensoro Cambodia ដើម្បីគ្រប់គ្រង និងតាមដាននូវគ្រោះមហន្តរាយនានា ជាពិសេសករណីអគ្គីភ័យ ។ឧបករណ៍ទាំងនោះអាចដឹងទុកជាមុន និងអាចគ្រប់គ្រង និងតាមដានគ្រោះមហន្តរាយនានា តាមរយៈបច្ចេកវិទ្យាឈានមុខដ៏ទំនើប ។
ឯកឧត្តម នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ បានលើកឡើងនៅក្នុងពេលនោះថា ការចុះអនុស្សារណៈយោគយល់គ្នា ស្តីពីកិច្ចសហប្រតិបត្តិការរវាងនាយកដ្ឋានបញ្ជូនសារ ក្រសួងការពារជាតិ នៃព្រះរាជាណាចក្រកម្ពុជា និងក្រុមហ៊ុនចិននេះ គឺនឹងធ្វើឲ្យក្រសួងការពារជាតិកម្ពុជាកាន់តែមានធនធានបន្ថែមទៀត ក្នុងការគ្រប់គ្រងហេតុការណ៍ទាំងនេះបានលឿន និងទាន់ពេលវេលា ខណៈករណីនេះបានកើតឡើងជារៀងរាល់ឆ្នាំ ដោយពុំបានដឹងជាមុននោះ។
ឯកឧត្ដមបានថ្លែងអំណរគុណចំពោះក្រុមហ៊ុន Sensoro Cambodia ដែលបានសម្រេចយកប្រទេសកម្ពុជាធ្វើជាដៃគូ ខណៈប្រទេសជិតខាងកម្ពុជានៅពុំទាន់មានបច្ចេកវិទ្យាទំនើបទាំងនេះ សម្រាប់ការគ្រប់គ្រងគ្រោះធម្មជាតិទាំងនេះនៅឡើយនោះ។
តំណាងក្រុមហ៊ុន Sensoro Cambodia បានលើកឡើងថា ក្រសួងការពារជាតិគឺជាកម្លាំងស្នូលដ៏មុតមាំ ដែលបានចូលរួមយ៉ាងសកម្ម ក្នុងការងារជួយសង្គ្រោះគ្រោះមហន្តរាយគ្រប់ប្រភេទ នាពេលកន្លងមក។ រាជរដ្ឋាភិបាលបានចំណាយកម្លាំងសម្ភារ និងថវិកាដ៏ច្រើនសន្ធឹកសន្ធាប់ក្នុងការងារជួយសង្គ្រោះគ្រោះមហន្តរាយទាំងនេះ ។ ការកសាងប្រព័ន្ធ sensor អំពីគ្រោះអាសន្ន និងគ្រោះមហន្តរាយថ្នាក់ជាតិមួយ គឺជាការងារបន្ទាន់ដែលត្រូវអនុវត្ត តាមរយៈការនាំចូលនូវបច្ចេកទេស IOT ដ៏ថ្មីបំផុត ហើយការប្រើកម្លាំងនៃបច្ចេកវិទ្យា វិទ្យាសាស្ត្រដើម្បីជួយចូលរួមសម្រេចនូវយុទ្ធសាស្ត្រឈ្នះៗ និងយុទ្ធសាស្ត្រចតុកោណ ជួយជម្រុញប្រទេសជាតិសម្រេចបាននូវគោលដៅរីកចម្រើនបែបទំនើបកម្ម និងអភិវឌ្ឍន៍ប្រកប ដោយល្បឿនលឿនឱ្យកាន់តែឆាប់រហ័សបន្ថែមទៀតផងដែរ៕
Comments