វិទ្យុជាតិកម្ពុជា៖ គឹមហឿនស្ទឹងត្រែង
ស្ទឹងត្រែង៖ រដ្ឋមន្ត្រីក្រសួង សាធារណការនិងដឹកជញ្ជូន រៀបយន្តការអនុវត្តពង្រឹងការងារគ្រប់ គ្រងជញ្ជីងថ្លឹងរថយន្តឱ្យមាន ប្រសិទ្ធភាព ដើម្បីការពារផ្លូវថ្នល់ ដែលកំពុងប្រើប្រាស់សព្វថ្ងៃឱ្យបានឆ្លើយតបទៅតាមការចង់បាន ព្រោះផ្លូវមួយខ្សែៗ រាជរដ្ឋភិបាល ចំណាយថវិកាសាងសង់អស់ច្រើនណាស់។
ក្នុងពិធីជួបសំណេះសំណាលជាមួយថ្នាក់ដឹកនាំ និងបុគ្គលិក មន្ត្រីរាជការ នៃមន្ទីរសាធារណការនិងដឹកជញ្ជូនខេត្ត នៅសាលាខេត្តស្ទឹងត្រែង ថ្ងៃទី០៣ខែមេសាឆ្នាំ ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន មានប្រសាសន៍ថា៖ថ្នាក់ដឹកនាំនាយកដ្ឋាន ក្រសួង សាធារណការត្រូវរៀបចំយន្តការត្រួតពិនិត្យ និងជួយទៅលើអង្គភាពជញ្ជីង ដែលកំពុងអនុវត្តថ្លឹងរថយន្តលើសទម្ងន់ ដើម្បីធ្វើឱ្យការងារមានប្រសិទ្ធភាពខ្ពស់ ។
ឯកឧត្តម រដ្ឋមន្ត្រីមានប្រសាសន៍ទៀតថា៖ចាប់ពីពេលនេះទៅផ្នែកជំនាញត្រូវពិនិត្យមើលទាំង៣៣ជញ្ជីងទូទាំងប្រទេស ដើម្បីពិនិត្យមើលកន្លែងណាក្តៅត្រូវដាក់អ្នកខ្លាំងទៅធ្វើការ ព្រោះកន្លែងខ្លះមានការអន្តរាគមន៍ដែលជាហេតុនាំឱ្យពិបាកដល់ការធ្វើការងារ ហើយក្រសួងនឹងគាំទ្រសម្ភារៈបច្ចេកទេសបន្ថែមសម្រាប់យកទៅអនុវត្តតែម្តង។
« វប្បធម៌អន្តរាគមន៍នេះគឺ យើងប្តេជ្ញាហើយពាក់ព័ន្ធទៅនឹងការដឹកជញ្ជូនលើសទម្ងន់នេះ គឺធ្វើយ៉ាងណាការពារ គោល បំណងយកតែមួយទេការពារផ្លូវ បើផ្លូវយើងធ្វើអស់លុយច្រើនណាស់ អស់លុយច្រើនហើយ គេអត់សប្បាយចិត្តទៀត ដោយសារផ្លូវឆាប់ខូច ដល់អ៊ីចឹងត្រូវធ្វើម៉េចត្រូវរៀបយន្តការឱ្យស្រួលធ្វើម៉េច ឱ្យប្រជាពលរដ្ឋយើងសាទរ ទៅនឹងសេវា ទៅនឹងសមិទ្ធផលរបស់ ក្រសួងសាធារណការនិងដឹកជញ្ជូន របស់យើង ជាពិសេសមន្ទីរដែលជាសេនាធិការបស់ក្រសួង ជាអ្នកអនុវត្តផ្ទាល់នៅមូលដ្ឋាន ។»
ឯកឧត្តមស្វាយ សំអ៊ាង អភិបាលខេត្តស្ទឹងត្រែងបានគាំទ្រដល់យន្តការនេះ ព្រោះពេលផ្លូវស្ពានមាននូវគុណភាពប្រើប្រាស់បានយូរអង្វែង បង្ហាញពីខេត្តមានសមិទ្ធផលល្អ និងបានរួមចំណែក ក្នុងការកសាងអភិវឌ្ឍខេត្តឱ្យរីក ចម្រើនក្នុងទិសដៅទៅអនាគត ។
លោកស គឹមណាត ប្រធានមន្ទីរសាធារណការនិងដឹកជញ្ជូនខេត្តបានបញ្ជាក់ថា៖ ទិសដៅនេះមន្ទីរបានផ្សព្វផ្សាយច្បាប់ផង អប់រំផង និងអនុវត្តផ្ទាល់ផង ហើយបងប្អូនអាជីវករមួយចំនួនក៏ត្រូវបានឱ្យធ្វើកិច្ចសន្យាចំពោះមុខច្បាប់។
លោកបន្តថា៖ ជាក់ស្តែងនៅក្នុងត្រីមាសទី១ឆ្នាំ២០២៤នេះ ការងារដឹកជញ្ជូន មន្ត្រីជំនាញបានអនុវត្តផាកពិន័យរថយន្តដឹកលើកទម្ងន់បាន៤.០៩២គ្រឿង និងអនុវត្តកាត់តំណទ្រុងរថយន្តបានចំនួន០៧ផងដែរ ។
សូមបញ្ជាក់ថា៖ក្នុងពិធីជួបសំណេះសំណាលនេះ ឯកឧត្តមរដ្ឋមន្ត្រីក្រសួងសាធារណការនិងដឹកជញ្ជូន បានជំរុញឱ្យមន្ត្រីជំនាញលើកគម្រោងជួសជុលផ្លូវចាប់ពីស្ពានសេកុង ទៅដល់ច្រកព្រំដែនអន្តរជាតិត្រពាំងគ្រៀលប្រវែង ជាង៦០គីឡូម៉ែត្រឱ្យបានឆាប់ និងពិនិត្យថវិកាសម្រាប់បន្តស្ថាបនាផ្លូវ៩២ឆ្ពោះទៅតំបន់ទេសចរណ៍ព្រះនិមិត្តប្រវែង២៧គីឡូម៉ែត្របន្ថែមនៅឆ្នាំ២០២៤នេះ៕
Comments