វិទ្យុជាតិកម្ពុជា កញ្ញា ខៀវ ណាវីន ថ្ងៃទី១៩ មីនា ២០២៥

អន្តរជាតិ៖ ចក្រភពអង់គ្លេស និងសហភាពអឺរ៉ុប (EU) គ្រោងបង្កើនសម្ពាធសេដ្ឋកិច្ចលើរុស្ស៉ី ហើយជំរុញគំនិតផ្តួចផ្តើមនៃវិស័យការពារជាតិ ខណៈដែលលោកស្រី Kaja Kallas ប្រធានគោលនយោបាយការបរទេស EU ត្រូវជួបពិភាក្សាជាមួយលោក David Lammy រដ្ឋមន្ត្រីការបរទេសអង់គ្លេស និងលោក John Healey រដ្ឋមន្ត្រីការពារជាតិ នៅក្នុងទីក្រុងឡុងដ៍។ នេះបើយោងតាមការចេញផ្សាយដោយសារព័ត៌មាន Reuters។ ក្នុងជំនួបនោះរួមបញ្ចូលនូវការបង្កើនសកម្មភាពប្រឆាំងការគំរាមកំហែងចម្រុះ ដូចជាការវាយប្រហារតាមអ៉ីនធឺណេត ការជ្រៀតជ្រែកក្នុងការបោះឆ្នោត និងការផ្សព្វផ្សាយព័ត៌មានមិនពិតរបស់រុស្ស៉ី។ លោកស្រី Kallas និងលោក Lammy ក៏នឹងកំណត់ផងដែរចំពោះកិច្ចខិតខំប្រឹងប្រែងពិនិត្យឡើងវិញ ដើម្បីជំរុញការចំណាយលើវិស័យការពារជាតិរបស់អឺរ៉ុបតាមរយៈ "គំនិតផ្តួចផ្តើមប្រកបដោយភាពច្នៃប្រឌិត" និងការត្រៀមលក្ខណៈខាងយោធាសម្រាប់គាំទ្រអង្គការណាតូ (NATO)។ គួរបញ្ជាក់ថា ចាប់តាំងពីខែកុម្ភៈ ឆ្នាំ២០២២ តាំងពីសង្រ្គាមអ៊ុយក្រែនបានផ្ទុះឡើង ចក្រភពអង់គ្លេស និង EU ជាមួយដៃគូអន្តរជាតិផ្សេងទៀតបានរួមគ្នាដាក់ទណ្ឌកម្មទៅលើប្រទេសរុស្ស៉ី គិតជាថវិកាចំនួន ៤៥០ពាន់លានដុល្លារ៕