វិទ្យុជាតិកម្ពុជា កញ្ញា ខៀវ ណាវីន ថ្ងៃទី០១ កុម្ភៈ ២០២៥
អន្តរជាតិ៖ កាសែត Wall Street Journal បានរាយការណ៍ថា ការស៊ើបអង្កេតលើការបំផ្លាញខ្សែថាមពលនៅសមុទ្របាល់ទិកមិនមានភស្តុតាងនៃការពាក់ព័ន្ធជាមួយរុស្ស៊ីទេ។ នេះបើយោងតាមការចេញផ្សាយដោយសារព័ត៌មាន Tass។ កាសែតនេះបានសរសេរដោយដកស្រង់សម្តីមន្ត្រីពីការស៊ើបអង្កេតថា "គ្មានភស្តុតាងណាមួយត្រូវបានគេរកឃើញថាទីក្រុងម៉ូស្គូបានបញ្ជា ឬរៀបចំការបំផ្លិចបំផ្លាញនោះទេ"។ ទន្ទឹមនឹងនេះ មេបញ្ជាការកងទ័ពជើងទឹកបែលហ្ស៊ិក ដែលជាប្រធានក្រុមដែលចូលរួមក្នុងបេសកកម្មរបស់អង្គការណាតូនៅសមុទ្របាល់ទិក បាននិយាយថា វាពិបាកក្នុងការវាយតម្លៃពីឥទ្ធិពលជាក់ស្តែងនៃការកើនឡើងវត្តមានរបស់ប្លុកនៅក្នុងតំបន់។ គួរបញ្ចាក់ថា កាលពីថ្ងៃទី១៤ ខែមករា លោក Mark Rutte អគ្គលេខាធិការអង្គការណាតូ បានប្រកាសពីការចាប់ផ្តើមបេសកកម្មក្នុងគោលបំណងការពារហេដ្ឋារចនាសម្ព័ន្ធក្រោមទឹក ដូចជាថាមពល និងខ្សែទិន្នន័យ។ បេសកកម្មនេះពាក់ព័ន្ធនឹងនាវាចម្បាំង និងយន្តហោះល្បាតដែនសមុទ្រពីប្រទេសសមាជិកណាតូ៕