វិទ្យុជាតិកម្ពុជា កញ្ញា ខៀវ ណាវីន ថ្ងៃទី០២ មេសា ២០២៥
អន្តរជាតិ៖ យោងតាមធនាគារកណ្តាលថៃ (BoT) បានឱ្យដឹងថា ហេដ្ឋារចនាសម្ព័ន្ធទូទាត់ហិរញ្ញវត្ថុ និងធុរកិច្ចរបស់ប្រទេសថៃមិនរងផលប៉ះពាល់នោះទេ បន្ទាប់ពីគ្រោះរញ្ជួយដីដ៏ខ្លាំងនៅក្នុងប្រទេសមីយ៉ាន់ម៉ា បានរាលដាលដល់ទីក្រុងបាងកក កាលពីថ្ងៃទី២៨ ខែមីនា។ នេះបើយោងតាមការចេញផ្សាយដោយសារព័ត៌មាន Vietnam Plus។ អភិបាលរង BoT លោក Roong Mallikamas បាននិយាយដោយពណ៌នាអំពីផលប៉ះពាល់ថា ជា "ការភ្ញាក់ផ្អើលរយៈពេលខ្លី" ដោយស្ថាប័នហិរញ្ញវត្ថុបន្តផ្តល់សេវាធម្មតាសម្រាប់អតិថិជនលក់រាយ និងសាជីវកម្ម។ សហព័ន្ធឧស្សាហកម្មថៃ បានបញ្ជាក់ថា ការផលិត និងការនាំចេញមិនមានផលប៉ះពាល់នោះទេ ខណៈពាណិជ្ជកម្មតាមព្រំដែនថៃ - មីយ៉ាន់ម៉ា នៅតែមានលក្ខណៈធម្មតា។ ប្រធានផ្សារហ៊ុនថៃបាននិយាយថា មូលដ្ឋានគ្រឹះរបស់ក្រុមហ៊ុនចុះបញ្ជីគឺនៅតែរឹងមាំ ហើយអាជីវកម្មកំពុងគ្រប់គ្រងស្ថានការណ៍ប្រកបដោយប្រសិទ្ធភាព។ គួរបញ្ជាក់ថា គណៈកម្មការមូលបត្រថៃធានាថា ប្រព័ន្ធជួញដូរនៅតែដំណើរការពេញលេញ។ ទន្ទឹមនឹងនេះការិយាល័យគណៈកម្មការធានារ៉ាប់រងបាននិយាយថា ស្ថានភាពហិរញ្ញវត្ថុរបស់ក្រុមហ៊ុនធានារ៉ាប់រងមានភាពរឹងមាំ អាចទប់ទល់នឹងផលប៉ះពាល់ហិរញ្ញវត្ថុនៃអគារដួលរលំ និងការរញ្ជួយដី៕