វិទ្យុជាតិកម្ពុជាលោកគឹមហឿន ថ្ងៃទី០២មេសាឆ្នាំ២០២៥
ខេត្តស្ទឹងត្រែង- ក្រសួងកសិកម្មរុក្ខាប្រមាញ់និងនេសាទ បានដាក់ពង្រាយមន្ត្រីជំនាញកសិកម្ម ចំនួន៣០នាក់នៅខេត្តស្ទឹងត្រែងឱ្យប្រចាំទៅតាមឃុំនិមួយៗ ដើម្បីជួយកសិករឱ្យចេះដាំដុះដំណាំកសិកម្ម  ទៅតាមបច្ចេកទេស និងបានជំរុញលើកកម្ពស់វិស័យកសិកម្ម  ឱ្យមានភាពរីកចម្រើនទៅដល់ទីជនបទ ។

ក្នុងពិធីសំណេះសំណាលជាមួយមន្ត្រីក្របខណ្ឌថ្មីកសិកម្មចំនួន៣០នាក់នៅសាលាខេត្តស្ទឹងត្រែងថ្ងៃទី០២មេសាឆ្នាំ២០២៥ ឯកឧត្តមសរសុពុត្រា អភិបាលខេត្តមានប្រសាសន៍ថា៖ ប្អូនៗដែលមកធ្វើការងារជាមន្ត្រីកសិកម្មនៅតាមឃុំត្រូវដាក់ចិត្តដាក់កាយ យកចំណេះជំនាញដែលទទួលបានពីការបណ្ដុះបណ្ដាល ទៅបម្រើការងារនៅតាមឃុំឲ្យបានត្រឹមត្រូវ ផ្តល់ចំណេះដឹងចំណេះធ្វើ ទៅដល់កសិករនៅតាមមូលដ្ឋានឱ្យចេះដាំដុះដំណាំកសិកម្ម ទៅតាមបច្ចេកទេសឱ្យបានត្រឹមត្រូវ។
         ឯកឧត្តមានប្រសាសន៍បញ្ជាក់ទៀតថា៖នេះជាបំណងប្រាថ្នា  របស់សម្ដេច មហាបវរធិបតី ដែលសម្រេចឲ្យរើសក្របខ័ណ្ឌនេះឡើង ចង់ពង្រឹងវិស័យកសិកម្មនៅមូលដ្ឋាន ដែលយើងទាំងអស់គ្នាដឹងហើយថាវិស័យកសិកម្ម  ជាវិស័យស្នូល នៅក្នុងការអភិវឌ្ឍខឿនសេដ្ឋកិច្ចជាតិរបស់យើង។(សំឡេង)អីចឹងប្អូនៗទៅដល់មូលដ្ឋានត្រូវគ្រប់គ្រង ការងារកសិកម្ម  ត្រូវជួយបំផុសប្រជាពលរដ្ឋ ត្រូវជួយផ្ដល់ គំនិតជំនួយស្មារតីទៅដល់ប្រជាពលរដ្ឋក្នុងការដាំដុះ ត្រូវចេះបង្កើតថ្មី  អ្វីដែលរៀនវិធីបង្កើត បង្កាត់ពូជនេះល្អ  មានពេលឧស្សាហ៍ជួបជុំគ្នា យើង ត្រូវយកចំណេះដែលយើងមាននេះយកមកដាក់នៅមូលដ្ឋាន របស់យើងដើម្បីពង្រីសក្តានុពល។
     លោកទំនីរ៉ូ ប្រធានមន្ទីរកសិកម្មរុក្ខាប្រមាញ់និងនេសាទខេត្តបានបញ្ជាក់ដែរថា៖ពេលនេះមន្ត្រីជំនាញនៅតាមបណ្តាឃុំ និងក្លាយជាបង្អែករបស់កសិករ  ព្រោះក្រសួងបានបែងចែកទៅតាមឃុំនិមួយៗ  និងនៅខ្វះចំនួន៤នាក់ទៀត សម្រាប់សង្កាត់ទាំង៤នៅក្នុងក្រុង  ហើយនៅឆ្នាំ២០២៥នេះ  ក្រសួងកសិកម្មនិងបញ្ជូនបន្ថែមមកតាមក្រោយ ។
    លោកនាក់លីដា មន្ត្រីជំនាញកសិកម្មប្រចាំឃុំសៀមបូកបានប្តេជ្ញាថា៖ពេលចុះអនុវត្តផ្ទាល់ជាមួយកសិករ យើងនិងធ្វើកិច្ចសហប្រតិបត្តិការឱ្យបានល្អ  ឆ្លើយតបតាមគោលការណ៍របស់ក្រសួងកសិកម្មនិងតបតាមការណែនាំរបស់ឯកឧត្តមអភិបាលខេត្ត។
         លោកបន្តថា៖  ពេលនោះមន្ត្រីទាំងអស់និងផ្ដល់បច្ចេកទេសដាំដុះដំណាំកសិកម្ម ទៅដល់កសិករនៅក្នុងឃុំរបស់ខ្លួនទទួលខុសត្រូវ ឱ្យគាត់កាត់បន្តផ្លាស់ប្តូរទំលាប់ នៃការធ្វើការងារកសិកម្ម ហើយមកអនុវត្តតាមបច្ចេកទេសថ្មីវិញ។ 
(សំឡេង)យើងចុះអនុវត្តផ្ទាល់ជាមួយនឹងគាត់ យើងចុះអនុវត្តផ្ទាល់ជាមួយនឹងគាត់ទាក់ទង  នឹងគោលនយោបាយ ក្នុងការធ្វើស្រែល្អ ទាក់ទងទៅនឹងការ  ចងក្រងពួកគាត់ជាសហគមន៍កសិកម្ម ទិញលក់ដូរអីចឹង   ដាំដំណាំទាក់ទងទៅនឹងដំណាំកៅស៊ូ   ដំណាំស្វាយចន្ទីអីចឹងទៅ  ។
សូមបញ្ជាក់ថា៖ការដាក់ពង្រាយមន្រ្តីកសិកម្មនៅតាមឃុំនេះជាយន្តការដ៏មានប្រសិទ្ធភាពក្នុងការលើកស្ទួយវិស័យកសិកម្មទៅដល់មូលដ្ឋានជនបទ ដែលរាជរដ្ឋាភិបាលយកចិត្តទុកដាក់បង្កើតឱ្យមានមន្ត្រីកសិកម្មប្រចាំនៅតាមបណ្តាឃុំសង្កាត់ សម្រាប់ជួយប្រជាកសិករបង្កើនការដាំដុះដំណាំកសិកម្មទៅតាមលក្ខណៈបច្ចេកទេសឱ្យទទួលបានទិន្នផលខ្ពស់៕
គឹមហឿនស្ទឹងត្រែង ថ្ងៃទី០២មេសាឆ្នាំ២០២៥