វិទ្យុជាតិកម្ពុជា កញ្ញា ខៀវ ណាវីន ថ្ងៃទី១០ មេសា ២០២៥

អន្តរជាតិ៖ លោក Antonio Guterres អគ្គលេខាធិការនៃអង្គការសហប្រជាជាតិ (UN) បាននិយាយថា តំបន់ហ្កាហ្សាបានប្រែក្លាយជា "វាលពិឃាដ" ដោយសារតែអ៊ីស្រាអែលបន្តបិទខ្ទប់ការផ្តល់ជំនួយ។ នេះបើយោងតាមការចេញផ្សាយដោយសារព័ត៌មាន Reuters។ លោកបានបន្តថា "ជាង ១ខែហើយ គ្មានជំនួយបានចូលទៅកាន់តំបន់ហ្កាហ្សានោះទេ។ គ្មានទាំងស្បៀងអាហារ ឥន្ធនៈ ឱសថ ឬ សម្ភារៈ ផ្គត់ផ្គង់ផ្សេងៗទៀត"។ ដោយចង្អុលទៅកាន់អនុសញ្ញាទីក្រុងហ្សឺណែវ ដែលចែងអំពីការប្រព្រឹត្តទៅ លើប្រជាជនក្នុងអំឡុងពេលសង្រ្គាម លោកអគ្គលេខាធិការ UN បានសង្កត់ធ្ងន់អំពីកាតព្វកិច្ចរបស់  កងកម្លាំងត្រួតត្រា ក្នុងការធានានូវការផ្តល់ស្បៀងអាហារ និងឱសថជាដើម។ លោកបានបន្ថែមថា "កាតព្វកិច្ចនេះមិនត្រូវបានអនុវត្តឡើយ។ គ្មានជំនួយមនុស្សធម៌អាចចូលទៅកាន់តំបន់ហ្កាហ្សានោះទេ។ តំបន់នេះបានប្រែក្លាយទៅជាវាលពិឃាដ ខណៈប្រជាជនស៊ីវិល កំពុងស្ថិតក្នុងវដ្តនៃសេចក្តីស្លាប់ ដែលគ្មានទីបញ្ចប់"។ ប៉ុន្តែអ្នកនាំពាក្យក្រសួងការបរទេសអ៊ីស្រាអែល បានចេញមុខច្រានចោលភ្លាមៗ ចំពោះការចោទប្រកាន់របស់លោក Guterres ដោយអះអាងថា គ្មានការខ្វះខាតជំនួយមនុស្សធម៌ ក្នុងតំបន់ហ្កាហ្សាឡើយ៕