វិទ្យុជាតិកម្ពុជា កញ្ញា ខៀវ ណាវីន ថ្ងៃទី២៥ មេសា ២៥

អន្តរជាតិ៖ ប្រទេសប្រ៊ុយណេកំពុងពង្រឹងភាពជាដៃគូរបស់ខ្លួនជាមួយកម្មវិធីអភិវឌ្ឍន៍អង្គការសហប្រជាជាតិ (UNDP) ដើម្បីផ្តល់នូវកំណើនដែលត្រៀមរួចជាស្រេចនាពេលអនាគត និរន្តរភាព និងរួមបញ្ចូលស្របតាមចក្ខុវិស័យរបស់ប្រ៊ុយណេឆ្នាំ២០៣៥ និងគោលដៅអភិវឌ្ឍន៍ប្រកបដោយចីរភាព។ នេះបើយោងតាមការចេញផ្សាយដោយសារព័ត៌មាន Xinhua។ លោក ហាជី ម៉ូស អាមីន លីវ អាប់ឌុលឡា (Haji Mohd Amin Liew Abdullah) រដ្ឋមន្ត្រីប្រ៊ុយណេនៅទីស្តីការនាយករដ្ឋមន្ត្រី និងជារដ្ឋមន្ត្រីទីពីរនៃហិរញ្ញវត្ថុ និងសេដ្ឋកិច្ចបាននិយាយក្នុងជំនួបជាមួយ កានី វីច ណារ៉ាចា (Kanni Wignaraja) ជំនួយការអគ្គលេខាធិការអង្គការសហប្រជាជាតិ និងជានាយក UNDP ប្រចាំតំបន់អាស៊ី និងប៉ាស៊ីហ្វិកថា សកម្មភាពដើម្បីធ្វើពិពិធកម្មសេដ្ឋកិច្ច យុទ្ធសាស្ត្របន្សាំអាកាសធាតុ និងកម្មវិធីអភិវឌ្ឍន៍ជំនាញនឹងធានាបាននូវកំណើនជាតិប្រកបដោយចីរភាព និងការរួមបញ្ចូល។ គួរបញ្ជាក់ថា រដ្ឋមន្ត្រីរូបនេះបានបន្តថា ដោយមានការជួយជ្រោមជ្រែងរបស់ UNDP ប្រ៊ុយណេមានបំណងបន្តដំណើរឆ្ពោះទៅរកគោលដៅដែលបានបញ្ជាក់របស់រដ្ឋាភិបាល ដោយធានាឱ្យប្រ៊ុយណេនៅតែមានសន្តិភាព ហើយប្រជាជនរបស់ខ្លួនបន្តរីករាយនឹងការកើនឡើងនូវស្តង់ដាសុខុមាលភាព៕