វិទ្យុជាតិកម្ពុជា ឈួន សំអាត ២៨.០៤.២០២៥

ភ្នំពេញ៖ សមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) កាលពីថ្ងៃទី២៧ ខែមេសា ឆ្នាំ២០២៥នេះ បានចុះពិនិត្យ និងព្យាបាលជំងឺប្រគេន ព្រះសង្ឃ និងជូនយាយជី តាជី ព្រមទាំងពុទ្ធបរិស័ទចំណុះជើងវត្ត សហគមក្រីក្រនៅជិតវត្ត ព្រមទាំងសិស្ស និស្សិត នៃពុទ្ធិកសាកលវិទ្យាល័យព្រះសីហមុនីរាជា សរុបចំនួន ២.៥៦០ ករណី រួមមាន៖ ជំងឺទូទៅ, ជំងឺមាត់ធ្មេញ, ពិនិត្យអេកូ និងរោគស្រ្តី, ជំងឺបេះដូង, ជំងឺភ្នែក, វះកាត់តូច, ជំងឺឫសដូងបាត, ជំងឺសន្លាក់, ជំងឺសើស្បែក, ជំងឺត្រចៀក ច្រមុះ បំពង់ក, ថតកាំរស្មីX និងពិនិត្យឈាម ក្នុងនោះករណីឈឺធ្ងន់ធ្ងរត្រូវបញ្ជូនទៅព្យាបាលបន្តមានចំនួន៣១ករណី ដែលប្រព្រឹត្តទៅនៅក្នុងបរិវេណ ពុទ្ធិកៈសាកលវិទ្យាល័យព្រះសីហមុនីរាជា។ 
នៅក្នុងឱកាសនោះក៏មានការចូលរួមផងដែរ ពីសំណាក់អាជ្ញាធរដែនដីគ្រប់លំដាប់ថ្នាក់ ក្រុមហ៊ុន GGEAR ធនាគារ ACELEDA  យុវជនអ.ម.ត យុវជនស.ស.យ.ក  យុវជនកាកបាទក្រហមកម្ពុជា យុវជនកាយរិទ្ធជាតិកម្ពុជា ព្រមទាំងក្រុមការងារពាក់ព័ន្ធជាច្រើនរូបទៀត។ 
ព្រះសង្ឃ និងយាយជីតាជី ព្រមទាំងប្រជាពលរដ្ឋដែលអញ្ជើញមកទទួលសេវាពិនិត្យ និងព្យាបាលសុខភាពទាំងអស់បានសម្តែងក្តីសប្បាយរីករាយ និងថ្លែងអំណរគុណជា ចំពោះសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ដែលបានចង្អុលបង្ហាញដល់ក្រុមគ្រូពេទ្យជំនាញចុះមកពិនិត្យ និងព្យាបាលជំងឺប្រគេននិងជូនពួកគាត់ដោយមិនគិតប្រាក់។
សូមបញ្ជាក់ជូនថា រាល់ការចំណាយទាំងអស់ ក្នុងសកម្មភាពមនុស្សធម៌នេះ គឺបានទទួលការឧបត្ថម្ភពីសម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែតផ្ទាល់៕