វិទ្យុជាតិកម្ពុជា៖ លោក រ៉ាត់ សុវណ្ណ (០៦ ០៥ ២០២៥)

កណ្តាល៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា បើទោះបីកម្ពុជា ទទួលរងផលប៉ះពាល់ ពីវិបត្តិកូវីដ១៩ និងបន្តមកសង្គ្រាមពាណិជ្ជកម្មយ៉ាងណាក្តី តែរាជរដ្ឋាភិបាល នៅតែបន្តរួមរស់ជាមួយប្រជាពលរដ្ឋ ដើម្បីធ្វើយ៉ាងណា ការពារសមទ្ធិផល និងបង្កើនសមទ្ធិផលជាច្រើនបន្ថែមទៀត ជូនបងប្អូនប្រជាពលរដ្ឋ ។ 

ក្នុងពិធីបើកការដ្ឋាន គម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ក្រោមក្របខ័ណ្ឌឥណទានសម្បទាន ពីរដ្ឋាភិបាល នៃសាធារណរដ្ឋកូរ៉េ នាថ្ងៃទី៦ ខែឧសភា ឆ្នាំ២០២៥នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កត់សម្គាល់ថា ក្រោយចប់សង្គ្រាមឆ្នាំ១៩៩៨ ស្ថានភាពក្រីក្រ នៅកម្ពុជា មានភាពវិជ្ជមានគួរឱ្យកត់សម្គាល់ ពោលពី៥០% ធ្លាក់ចុះមកនៅក្រោម១០% មុនវិបត្តិកូវីដ១៩ កត្តានេះបានមកពីកំណើនអ្នកមានជីវភាពមធ្យមមានការប្រែប្រួល ។ 

ក្នុងនោះសម្តេចធិបតី ទទួលស្គាល់ថា ក្នុងអំឡុងពេលវិបត្តិកូវីដ១៩ និងក្រោយមកទៀត កម្ពុជា ទទួលរងផលប៉ះពាល់ច្រើន និងបន្តមក ប្រឈមភាពមិនច្បាស់លាស់ នៅក្នុងការវិវត្តន៍ទៅមុខ ក្នុងរយៈពេលខ្លីដោយសារបញ្ហាសង្គ្រាមពាណិជ្ជកម្ម ។
 "ខ្ញុំសូមឱ្យបងប្អូនប្រជាពលរដ្ឋ មានភាពជឿជាក់ស្ថានភាពមេឃខ្មៅមេឃស្រឡះ មេឃភ្លៀងវាមានខ្លះ ប៉ុន្តែរាជរដ្ឋាភិបាលនៅជាមួយបងប្អូនខិតខំគ្រប់បែបយ៉ាង ​ដើម្បីធ្វើយ៉ាងណា ការពារសមិទ្ធផលនិងបង្កើនសមិទ្ធផលផ្សេងៗទៀត បន្ថែមជូនបងប្អូនប្រជាពលរដ្ឋ ទាំងសមិទ្ធផលរួម និងបង្កលក្ខណៈដើម្បីឱ្យបងប្អូនអាចមានលទ្ធភាពទទួលបានជាផលឯកជន តៗទៅទៀត យើងរួមជាមួយគ្នារាជរដ្ឋាភិបាល មិនទៅណាទេ" ៕