វិទ្យុជាតិកម្ពុជា , វ៉ាង ភក្តី ០៩ ០៥ ២០២៥
ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានថ្លែងស្វាគមន៍ចំពោះ ក្រុមហ៊ុនឯកជននានា ដែលមានបំណងធ្វើការវិនិយោគ ក្នុងវិស័យបរិស្ថាននៅកម្ពុជា ដើម្បីចូលរួមក្នុងផែនការសម្មភាព ឈានឆ្ពោះទៅកាន់ភាពស្អាត ភាពបៃតង និងចីរភាព នៅកម្ពុជាយូរអង្វែងតទៅ ស្របតាមយុទ្ធសាស្រ្តចក្រាវិស័យបរិស្ថាន របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។
ការថ្លែងស្វាគមន៍ ធ្វើឡើងក្នុងឱកាសទទួលជួបសំដែងការគួសមជាមួយ លោក Eui-Young Lee, ប្រធានក្រុមហ៊ុន Haw Sung Tech-Win Co.,Ltd របស់សាធារណរដ្ឋកូរ៉េ នាថ្ងៃទី៨ ខែឧសភា ឆ្នាំ២០២៥ នៅទីស្តីការក្រសួងបរិស្ថាន។ 
ឯកឧត្តមរដ្ឋមន្រ្តី បានថ្លែងអំណរគុណចំពោះក្រុមហ៊ុនកូរ៉េ ដែលបានសិក្សាលើសក្តានុពល នៃការវិនិយោគ ក្នុងការកែច្នៃសំរាម និងសំណល់ប្លាស្ទិក ធ្វើជាជីនិងសម្ភារប្រើប្រាស់ ដែលមានបំណងល្អ ជួយកម្ពុជា ដើម្បីជំរុញការវិនិយោគបៃតង និងបានបង្ហាញជូនដំណើរការផលិតកម្ម ដែលផ្តល់អត្ថប្រយោជន៍ ដល់ការលើកស្ទួយសេដ្ឋកិច្ច របស់ប្រជាជននៅតាមមូលដ្ឋាននិងសេដ្ឋកិច្ចជាតិផងដែរ។ ឯកឧត្តមបណ្ឌិត អ៊ាង សុផល្លែត បានសំណូមពរទៅក្រុមហ៊ុន បន្តធ្វើការជាមួយមន្រ្តីជំនាញ ដើម្បីសិក្សាតំបន់វិនិយោគ ដែលមាន។
លោក Eui-Young Lee ប្រធានក្រុមហ៊ុន Haw Sung Tech-Win Co.,Ltd បានវាយតម្លៃខ្ពស់ចំពោះជោគជ័យ ការដាក់ចេញយុទ្ធនាការ កាត់បន្ថយការប្រើប្រាស់ប្លាស្ទិក របស់ក្រសួងបរិស្ថាន នាពេលកន្លងមក បានដោះស្រាយបញ្ហាប្លាស្ទិក នៅតាមទីសាធារណនានា ជាពិសេសនៅតាមសាលារៀន វត្តអារាម និងតាមដងផ្លូវនានា ដើម្បីជំរុញឱ្យមានការទុកដាក់សំរាម សំណល់រឹង និងសំណល់ប្លាស្ទិក ឈានឆ្ពោះទៅរក ការកាត់បន្ថយសំរាមនិងសំណល់ប្លាស្ទិក នាពេលអនាគតនៅកម្ពុជា ជាពិសេសការបង្កើនគម្របបៃតង ដែលឆ្លើយតបនឹងកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ។
សូមបញ្ជាក់ថា ក្រុមហ៊ុន Haw Sung Tech-Win Co.,Ltd របស់សាធារណរដ្ឋកូរ៉េ បានសិក្សាពីសក្តានុពលវិនិយោគ និងបង្ហាញពីបំណងបង្កើតរោងចក្រ ដើរដោយបច្ចេកវិទ្យាថ្មី ទំនើប ធ្វើការកែច្នៃសបកគ្រាប់ធុញ្ញជាតិ ដើម្បីធ្វើជាប្រេង កែច្នៃសំរាមនិងសំណល់ប្លាស្ទិក ធ្វើជាជីធម្មជាតិ និងសម្ភារប្រើប្រាស់នៅកម្ពុជា៕