វិទ្យុជាតិកម្ពុជា ៖ យី វិច្ឆិកា ៩ ៥ ២០២៥
ភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានដឹកនាំកិច្ចប្រជុំគណៈកម្មការរៀបចំការប្រឡងប្រជែង ដើម្បីត្រៀមការងារឆ្ពោះទៅថ្ងៃប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារនៅអគ្គលេខាធិការដ្ឋានក្រុមប្រឹក្សាអ្នកច្បាប់ ក្នុងក្របខណ្ឌទីស្តីការគណៈរដ្ឋមន្រ្តី កាលពីថ្ងៃទី៨ ខែឧសភា ឆ្នាំ២០២៥។ 
ការប្រឡងនេះ ជាការប្រឡងលើកទី១៧ ដែលក្រសួងមុខងារសាធារណៈ បានដឹកនាំ និងសហការរៀបចំ ជ្រើសរើសមន្ត្រីជូនក្រសួង ស្ថាប័ន តាមរយៈការអនុវត្តនិយាមនីតិវិធីប្រតិបត្តិសម្រាប់ការជ្រើសរើសមន្ត្រីរាជការស៊ីវិល ប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ 
ជាស្មារតីនៃកិច្ចប្រជុំ បានលើកឡើងថា ការប្រឡងប្រជែងនឹងគ្រោងរៀបចំប្រឡងជាពីរដំណាក់កាល។ ដំណាក់កាលទី១ ដែលជាវិញ្ញាសាពហុចម្លើយ នឹងគ្រោងរៀបចំនាថ្ងៃទី១៨ ខែឧសភា ឆ្នាំ២០២៥ នៅមណ្ឌលប្រឡងសាលាភូមិន្ទរដ្ឋបាល។ បេក្ខជនដែលបានប្រឡងជាប់ដំណាក់កាលទី១ នឹងអាចបន្តការប្រឡងប្រជែងក្នុងដំណាក់កាលទី២ តាមកាលបរិច្ឆេទដែលនឹងជូនដំណឹងតាមក្រោយ៕