វិទ្យុជាតិកម្ពុជា កញ្ញា ខៀវ ណាវីន ថ្ងៃទី១៣ ៥ ២៥

អន្តរជាតិ៖ ទីភ្នាក់ងារសារព័ត៌មាន Bloomberg បានរាយការណ៍ដោយដកស្រង់ប្រភពថា មេដឹកនាំអឺរ៉ុបបានសម្រេចចិត្តរង់ចាំរហូតដល់ក្រោយកិច្ចចរចាស្តីពីអ៊ុយក្រែន ដែលគ្រោងធ្វើនៅថ្ងៃទី១៥ ឧសភា នៅទីក្រុងអ៊ីស្តង់ប៊ុល មុនពេលជំរុញឱ្យសហរដ្ឋអាម៉េរិកដាក់ទណ្ឌកម្មថ្មីលើប្រទេសរុស្ស៊ី។ នេះបើយោងតាមការចេញផ្សាយដោយសារព័ត៌មាន Tass។ យោងតាមរបាយការណ៍បានឱ្យដឹងថា មន្ត្រីអាម៉េរិកបានបញ្ជាក់យ៉ាងច្បាស់ទៅកាន់សមភាគីអឺរ៉ុបរបស់ពួកគេកាលពីថ្ងៃទី១២ ឧសភាថា ពួកគេចង់ទុកឱកាសឱ្យរុស្ស៊ី និងអ៊ុយក្រែនធ្វើកិច្ចចរចា មុនពេលពិភាក្សាអំពីការបង្កើនសម្ពាធទៅលើទីក្រុងម៉ូស្គូ។ បណ្តាញព័ត៌មានបាននិយាយថា មេដឹកនាំអឺរ៉ុបនឹងជំរុញឱ្យប្រធានាធិបតីអាម៉េរិកលោក Donald Trump ណែនាំការរឹតបន្តឹងប្រសិនបើប្រធានាធិបតីរុស្ស៊ីលោក Vladimir Putin បដិសេធកិច្ចប្រជុំជាមួយលោក Vladimir Zelensky ឬរុស្ស៊ីមិនយល់ព្រមចំពោះ "បទឈប់បាញ់ភ្លាមៗ និងគ្មានលក្ខខណ្ឌ។ ប៉ុន្តែសហរដ្ឋអាម៉េរិកមិនទាន់បានធ្វើការសម្រេចចិត្តលើការដាក់ទណ្ឌកម្មប្រឆាំងនឹងប្រទេសរុស្ស៊ីនៅឡើយ"។ ក្រសួងការបរទេសសហរដ្ឋអាម៉េរិកមិនបានឆ្លើយតបភ្លាមៗចំពោះសំណើសុំការអត្ថាធិប្បាយពី Bloomberg នោះទេ។ ថ្លែងទៅកាន់អ្នកសារព័ត៌មាននៅវិមានក្រឹមឡាំងកាលពីថ្ងៃទី១១ ឧសភា លោក ពូទីន បានអញ្ជើញអ៊ុយក្រែនឱ្យបន្តឡើងវិញដោយគ្មានលក្ខខណ្ឌបឋមណាមួយ នូវកិច្ចចរចាផ្ទាល់ លោកក៏បានស្នើឱ្យចាប់ផ្តើមកិច្ចចរចានៅថ្ងៃទី១៥ ខែឧសភានៅទីក្រុងអ៊ីស្តង់ប៊ុល៕