វិទ្យុជាតិកម្ពុជា កញ្ញា ខៀវ ណាវីន ថ្ងៃទី២១ ៥ ២៥

អន្តរជាតិ៖ ក្នុងសម័យប្រជុំជាន់ខ្ពស់នៃមហាសន្និបាតសុខភាពពិភពលោកលើកទី៧៨ (WHA) អនុរដ្ឋមន្ត្រីក្រសួងសុខាភិបាលវៀតណាមបានអះអាងនូវទំនាក់ទំនងដ៏រឹងមាំ និងមានប្រសិទ្ធភាពរបស់វៀតណាមជាមួយអង្គការសុខភាពពិភពលោក (WHO)។ នេះបើយោងតាមការចេញផ្សាយដោយសារព័ត៌មាន Vietnam Plus។ ថ្លែងមតិនៅក្នុងពិធីនេះ លោកបានលើកឡើងអំពីការរៀបចំរបស់វៀតណាមសម្រាប់ការប្រារព្ធខួបលើកទី៥០ នៃកិច្ចសហប្រតិបត្តិការជិតស្និទ្ធ និងមានប្រសិទ្ធភាពជាមួយ WHO។ លោកបានសង្កត់ធ្ងន់ថា វៀតណាមសម្រេចបាននូវចំណុចសំខាន់ផ្នែកសុខភាពគួរឱ្យកត់សម្គាល់ជាមួយនឹងការគាំទ្រជាបន្តបន្ទាប់របស់អង្គការសុខភាពពិភពលោក ដោយបានរៀបរាប់ថា ប្រទេសនេះបានហាមឃាត់បារីអេឡិចត្រូនិច និងផលិតផលថ្នាំជក់ ដែលជាវិធានការមួយក្នុងគោលបំណងការពារយុវជន និងកាត់បន្ថយការចំណាយលើការថែទាំសុខភាពរយៈពេលវែង។ លោកបានបន្ថែមថា ការធានារ៉ាប់រងសុខភាពសង្គមនៅក្នុងប្រទេសវៀតណាមពេលនេះគឺគ្របដណ្តប់ជិត ៩៥% នៃចំនួនប្រជាជន រួមទាំងគ្រួសារដែលមានប្រាក់ចំណូលទាប។ លើសពីនេះទៅទៀត ក្នុងនាមជាប្រទេសមួយក្នុងចំណោមប្រទេសដែលងាយរងគ្រោះបំផុតដោយគ្រោះមហន្តរាយធម្មជាតិ វៀតណាមកំពុងធ្វើការដើម្បីកែលម្អភាពធន់នឹងអាកាសធាតុនៃគ្រឹះស្ថានសុខាភិបាលរបស់ខ្លួន។ លោកក៏បានថ្លែងអំណរគុណចំពោះការគាំទ្ររបស់ WHO ក្នុងការលើកកម្ពស់សុខភាព និងជីវិតរបស់ប្រជាជនវៀតណាមផងដែរ។ វៀតណាមសង្ឃឹមថានឹងរក្សាកិច្ចសហប្រតិបត្តិការ និងបន្តធ្វើការរួមគ្នាជាមួយរដ្ឋសមាជិក និងដៃគូដទៃទៀត៕