វិទ្យុជាតិកម្ពុជា៖ លោកស្រី ប៉ុង សុភាវី ២៤ ០៥ ២៥

MC"៖ប្រជាពលរដ្ឋនៅខេត្តក្រចេះ ចំនួន ៦០ខ្នងផ្ទះ នៅទូទាំង ៩ភូមិ បាននិងកំពុងដាក់ឱ្យប្រើប្រាស់ ជាបណ្តើរៗនូវប្រព័ន្ធអគ្គិសនីដើរដោយថាមពលពន្លឺព្រះអាទិត្យតាមផ្ទះ ក្រោមគម្រោងទទួលផលរហ័ស នៃកិច្ចសហប្រតិបតិ្តការទន្លេមេគង្គ-គង្គា។
    បងប្អូនប្រជាពលរដ្ឋឃុំស្នូល ស្រុកស្នួល ខេត្តក្រចេះ បានទទួលផលពីគម្រោងបំពាក់ឧបករណ៍ផ្តល់ ចរន្តអគ្គិសនីដើរដោយថាមពលពន្លឺព្រះអាទិត្យ ដើម្បីលើកកម្ពស់ការទទួលព័ត៌មាន និងចំណេះដឹង ហើយគម្រោងនេះបានធ្វើពិធីសម្ពោធជាផ្លូវការនៅព្រឹកថ្ងៃទី២៤ ខែឧសភា ឆ្នាំ២០២៥ នាចំណុចអូរក្រុង នៃភូមិព្រែកក្តី ឃុំស្នួល ស្រុកស្នួល ខេត្តក្រចេះ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួង ព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ និង ឯកឧត្តម Vanlalvawna Bawitlung ឯកអគ្គរដ្ឋទូតឥណ្ឌាប្រចាំនៅកម្ពុជា។ ពិធីនេះក៏មានអញ្ចឹញចូលរួមពី ឯកឧត្តមកិត្តិបណ្ឌិត ពេជ្រ ប៊ុនធិន អ្នកតំណាងរាស្រ្តខេត្តក្រចេះ ។
តាមការបញ្ជាក់របស់ ឯកឧត្តម ប៉ាង ណាត អនុរដ្ឋលេខាធិការក្រសួងព័ត៌មាន បានឱ្យដឹងថាគោលបំណង សំខាន់នៃគម្រោងទទួលផលរហ័សនៃកិច្ចសហប្រតិបតិ្តការទន្លេមេគង្គ-គង្គា, គឺដើម្បីផ្តល់លទ្ធភាពជូន បងប្អូនប្រជាពលរដ្ឋក្នុងឃុំស្នួល ឱ្យបានទទួលចរន្តអគ្គិសនី ប្រើប្រាស់សម្រាប់លំនៅឋានផង និងមាន ប្រព័ន្ធបំភ្លឺផ្លូវសាធារណៈនៅតាមដងផ្លូវផង ដែលដំណើរការដោយថាមពលពន្លឺ ព្រះអាទិត្យ។ ទាំងនេះមិនត្រឹមតែជាការបំពេញតម្រូវការមូលដ្ឋានប៉ុណ្ណោះទេ ប៉ុន្តែថែមទាំងជាការរួមចំណែកដ៏ធំធេង ក្នុងការ លើកកម្ពស់គុណភាពជីវិត លើកកម្ពស់ការទទួលបានព័ត៌មាន និងចំណេះដឹង ក៏ដូចជាការអភិវឌ្ឍ  សហគមន៍មូលដ្ឋានឱ្យកាន់តែប្រសើរឡើង។ វឌ្ឍនភាពនៃការអនុវត្តគម្រោង នឹងបំពាក់ប្រព័ន្ធអគ្គិសនី ដើរដោយថាមពលពន្លឺព្រះអាទិត្យតាមផ្ទះប្រជាពលរដ្ឋ ចំនួន ៦០ខ្នងផ្ទះ នៅទូទាំង ៩ភូមិ ដែលបាននិង កំពុងដាក់ឱ្យប្រើប្រាស់ជាបណ្តើរៗ។ ជាមួយគ្នានោះដែរ ក៏មានការដំឡើង បង្គោលបំភ្លឺផ្លូវសាធារណៈ ដើរដោយថាមពលពន្លឺព្រះអាទិត្យ ចំនួន ៣៥ បង្គោល ដែលបាននិងកំពុងដាក់ឱ្យប្រើប្រាស់នៅកន្លែង មានតម្រូវការចាំបាច់ៗក្នុងឃុំ។
         សូមជម្រាបថា ការអនុវត្តគម្រោងនេះត្រូវបានបែងចែកជា ២ ដំណាក់កាល,ដំណាក់កាលទី ១៖ បាននិងកំពុងអនុវត្តយ៉ាងសកម្មនូវការបំពាក់ប្រព័ន្ធអគ្គិសនីតាមខ្នងផ្ទះដើរដោយថាមពលពន្លឺព្រះអាទិត្យ ចំនួន ២៥ខ្នងផ្ទះ និងដំឡើងបង្គោលបំភ្លឺផ្លូវដើរដោយថាមពលពន្លឺព្រះអាទិត្យចំនួន ១៨បង្គោល ។ មកដល់ពេលនេះ យើងសម្រេចបាន៩៥ភាគរយហើយ។ ដំណាក់កាលទី ២៖ សម្រាប់ចំនួនដែលនៅ សេសសល់រួមមាន ៣៥ខ្នងផ្ទះ និង ១៧បង្គោល នឹងត្រូវបន្តអនុវត្តបញ្ចប់ក្នុងពេលឆាប់ៗខាងមុខនេះ៕