វិទ្យុជាតិកម្ពុជា៖ លោកស្រី ប៉ុង សុភាវី ២៦ ឧសភា ២០២៥

MC៖ បន្ទាប់ពីបានឆ្លងកាត់វគ្គជម្រុះទាំង ៣សប្ដាហ៍ និងវគ្គពាក់កណ្តាលផ្ដាច់ព្រ័ត្ររួចមក ទីបំផុត មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ ក្រោមប្រធានបទ «កុមារ៖ អនាគតយើង ការទទួលខុសត្រូវរបស់យើង» បានរកឃើញកុមារា កុមារី ចំនួន ៥ក្រុម មកពីសាលាបឋមសិក្សារដ្ឋ និងឯកជន ដោយម្ចាស់ជ័យលាភីលេខ១ សម្រាប់មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ បានទៅលើក្រុមមកពីសាលាបឋមសិក្សា ព្រះនរោត្តម។ 
  
   ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងព័ត៌មាន នៅព្រឹកថ្ងៃទី២៦ ខែឧសភា ឆ្នាំ២០២៥ បានអញ្ជើញជាអធិបតីបិទ «មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥» ដែលជាកម្មវិធីមួយសម្រាប់ផ្តល់ឱកាសឱ្យក្មួយៗបានបង្ហាញសមត្ថភាព និងបានជួបប្រាស្រ័យជាមួយមិត្តភក្តិថ្មីៗ ប្រកបដោយក្តីសប្បាយរីករាយ។ 
   ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា តាមរយៈគំនិតផ្តួចផ្តើមនេះ មានគោលបំណងបង្កើតព្រឹត្តិការណ៍មួយសម្រាប់ក្មួយៗកុមារដែលមានអាយុចន្លោះពី៨ ទៅ ១៣ឆ្នាំ អាចស្វែងយល់អំពីចំណង់ចំណូលចិត្តសិល្បៈរបស់ខ្លួន និងអភិវឌ្ឍទំនុកចិត្តក្នុងការបញ្ចេញមតិរបស់ពួកគេតាមរយៈបទចម្រៀង។ ឯកឧត្តម រដ្ឋមន្ត្រី នេត្រ ភក្ត្រា បានបង្ហាញជំនឿជឿជាក់យ៉ាងមុតមាំលើឥទ្ធិពលនៃសិល្បៈក្នុងការបញ្ជ្រាបការអប់រំ យ៉ាងមានប្រសិទ្ធភាព។ ព្រមជាមួយគ្នានេះដែរ ក៏សូមកោតសរសើរគណៈកម្មការរៀបចំមហោស្រព ដែលបានខិតខំប្រឹងប្រែង ចាប់តាំងពីពេលរៀបចំផែនការយ៉ាងយកចិត្តទុកដាក់ រហូតដល់ការអនុវត្តដំណើរការវាយតម្លៃប្រកបដោយភាពយុត្តិធម៌ និងតម្លាភាព។ 
សូមជម្រាបថា វគ្គប្រឡងផ្តាច់ព្រាត់ មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ ដោយបានរកឃើញម្ចាស់ជ័យលាភីចំនួន៥ ក្រុមរួមមាន៖ ជ័យលាភីលេខ១ បានទៅលើក្រុមមកពីសាលាបឋមសិក្សា ព្រះនរោត្តម, ជ័យលាភីលេខ២ បានទៅលើក្រុមមកពីសាលាបឋមសិក្សា វត្តរាជបូណ៌, ជ័យលាភីលេខ៣ បានទៅលើក្រុមមកពីសាលាបឋមសិក្សា វត្តកោះ, ជ័យលាភីលេខ៤ បានទៅលើក្រុមមកពីសាលាបឋមសិក្សា មីគីវ៉េ និងជ័យលាភីលេខ៥ បានទៅលើក្រុមមកពីសាលាបឋមសិក្សា គៀនឃ្លាំង៕