វិទ្យុជាតិកម្ពុជា កញ្ញា ខៀវ ណាវីន ថ្ងៃទី៣០ ៥ ២៥

អន្តរជាតិ៖ អគ្គកុងស៊ុលកិត្តិយសវៀតណាមប្រចាំនៅប៉ារ៉ាហ្គាយ បាននិយាយថា ក្នុងរយៈពេល ៣០ឆ្នាំកន្លងមកនេះ ទំនាក់ទំនងវៀតណាម-ប៉ារ៉ាហ្គាយ ទទួលបានមិត្តភាព សាមគ្គីភាព និងកិច្ចសហប្រតិបត្តិការដែលបាននិងកំពុងពង្រីកឥតឈប់ឈរ។ នេះបើយោងតាមការចេញផ្សាយដោយសារព័ត៌មាន Vietnam Plus។ ថ្លែងទៅកាន់អ្នកឆ្លើយឆ្លងព័ត៌មានវៀតណាមក្នុងឱកាសរំលឹកខួបលើកទី៣០ នៃការបង្កើតទំនាក់ទំនងការទូតរវាងវៀតណាម និងប៉ារ៉ាហ្គាយ (ថ្ងៃទី៣០ ខែឧសភា ១៩៩៥ - ២០២៥) លោកស្រីបានចាត់ទុកថា ប្រទេសទាំងពីរមានភាពស្រដៀងគ្នាជាច្រើនក្នុងប្រវត្តិសាស្ត្រ និងវប្បធម៌។ ប្រទេសវៀតណាម និងប៉ារ៉ាហ្គាយបានឆ្លងកាត់ការលំបាកជាច្រើន ប៉ុន្តែជាមួយនឹងភាពធន់ប្រទេសទាំងពីរបានជម្នះរាល់បញ្ហាប្រឈមនានាដើម្បីរីកចម្រើន និងនាំមកនូវជីវិតរុងរឿងដល់ប្រជាជនរបស់ពួកគេ។ ជាពិសេស ដំណើរទស្សនកិច្ចនៅវៀតណាមរបស់រដ្ឋមន្ត្រីក្រសួងឧស្សាហកម្ម និងពាណិជ្ជកម្មប៉ារ៉ាហ្គាយ កាលពីឆ្នាំ២០២៤ និងដំណើរទស្សនកិច្ចនៅប៉ារ៉ាហ្គាយរបស់មន្ត្រីវៀតណាម រួមទាំងអនុរដ្ឋមន្ត្រីការបរទេសអចិន្ត្រៃយ៍ និងអង្គភាពអាជីវកម្មជាច្រើនបានជួយលើកកម្ពស់ការយល់ដឹងគ្នាទៅវិញទៅមក និងពង្រីកបណ្តាញសហប្រតិបត្តិការ។ អគ្គកុងស៊ុលកិត្តិយសវៀតណាមបាននិយាយថា សកម្មភាពទាំងនេះមិនត្រឹមតែជាការកត់សម្គាល់នូវព្រឹត្តិការណ៍សំខាន់រយៈពេល ៣០ ឆ្នាំនៃទំនាក់ទំនងការទូតប៉ុណ្ណោះទេ ថែមទាំងបើកទំព័រថ្មីសម្រាប់ទំនាក់ទំនងកាន់តែស៊ីជម្រៅរវាងវៀតណាម និងប៉ារ៉ាហ្គាយលើគ្រប់វិស័យដូចជា វប្បធម៌ អប់រំ ពាណិជ្ជកម្ម និងការអភិវឌ្ឍប្រកបដោយចីរភាពជាដើម៕