វិទ្យុជាតិកម្ពុជា ៖ យី វិច្ឆិកា ១៦ ៦ ២០២៥

ភ្នំពេញ ៖ ក្រសួងសាធារណការ និងដឹកជញ្ជូន បានកំណត់នូវចក្ខុវិស័យសំខាន់ៗចំនួន២ ដើម្បីជំរុញការអភិវឌ្ឍហេដ្ឋារចនាសម្ព័ន្ធដឹកជញ្ជូនកម្ពុជាឱ្យកាន់តែសំបូរបែប និងមានគុណភាពស្តង់ដារឹងមាំ សំដៅឈានទៅជំរុញកំណើនសេដ្ឋកិច្ច។

ក្នុងពិធីសំណេះសំណាលជាមួយថ្នាក់ដឹកនាំមន្ត្រីរាជការបុគ្គលិក និងកម្មករ នៃមន្ទីរសាធារណការ និងដឹកជញ្ជូនខេត្តព្រះវិហារ ដោយមានការចូលរួមពី ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ ព្រមទាំង ឯកឧត្តមជាថ្នាក់ដឹកនាំក្រសួង និងមន្រ្តីរាជការមន្ទីរសាធារណការខេត្តជាច្រើនរូបទៀត កាលពីថ្ងៃទី១៥ ខែមិថុនា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន លើកឡើងពីចក្ខុវិស័យសំខាន់ៗរបស់ក្រសួង ចំនួន២ ដើម្បីឆ្លើយតបទៅនឹងយុទ្ធសាស្ត្រ បញ្ចកោណរបស់រាជរដ្ឋាភិបាល នៅក្នុងអាណត្តិទី៧នេះ រួមមាន៖ ១. ការលើកកម្ពស់សេវាគ្រប់ប្រភេទ តាមរយៈការអភិវឌ្ឍ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថល ក្នុងការគ្រប់គ្រង និងការផ្តល់សេវាប្រកបដោយភាព លឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង ២.ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន ឱ្យមានគុណភាព សុវត្ថិភាព ចីរភាព ភាពធន់ និងបរិយាបន្ន។
ឯកឧត្តម រដ្ឋមន្រ្តីក៏បានកោតសរសើរ និងវាយតម្លៃខ្ពស់ដល់មន្ទីរសាធារណការ និងដឹកជញ្ជូនខេត្តព្រះវិហារ លើកិច្ចខិតខំប្រឹងប្រែងលើកិច្ចការងារក្នុងវិស័យ និងការចូលរួមសហការគ្នាបានល្អ ក្នុងការគ្រប់គ្រង ដឹកនាំ និងប្រតិបត្តិការងារ ដើម្បីសម្រេចបានជោគជ័យ និងឆ្លើយតបតាមសំណូមពររបស់បងប្អូនប្រជាពលរដ្ឋ អាជ្ញាធរខេត្ត ដែលក្រសួង និងរាជរដ្ឋាភិបាលបានដាក់ជូន។ 
 ក្នុងឱកាសនៃពិធីសំណេះសំណាលនេះដែរ ក្រសួងក៏បាននាំមកនូវសម្ភារៈបរិក្ខារសុវត្ថិភាពប្រើប្រាស់នៅការដ្ឋានមួយចំនួន ក្នុងនោះរួមមាន៖ អាវសុវត្ថិភាព ១០កំប្លេ មួកសុវត្ថិភាព ១០កំប្លេ ភ្លើងសញ្ញា ០២កំប្លេ ផ្លាកសញ្ញាការដ្ឋាន ១៤កំប្លេ កោណសុវត្ថិភាព ១០កំប្លេ ទង់ក្រហម ០២កំប្លេ ម៉ាស៊ីនកាត់ស្មៅ ០១គ្រឿង មួកសុវត្ថិភាពចរាចរណ៍ចំនួន ១០០មួក ស្ទីកឃ័រចំណាំងផ្លាតចំនួន ៥ពាន់សន្លឹក និង Cold Mix សម្រាប់ជួសជុលសំបុកមាន់ចំនួន ៤តោន ស្មើនឹង ២០០បាវ ព្រមទាំងថវិកាឧបត្ថម្ភមួយចំនួនជូនដល់មន្ត្រីរាជការនៃមន្ទីរសាធារណការ និងដឹកជញ្ជូនខេត្តព្រះវិហារផងដែរ៕