វិទ្យុជាតិកម្ពុជា ៖ យី វិច្ឆិកា ១៧ ៦ ២០២៥

ភ្នំពេញ ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតជូនគណៈប្រតិភូវិទ្យាស្ថានស្រាវជ្រាវធុរកិច្ចកម្ពុជា (Business Research Institute for Cambodia - BRIC) ដឹកនាំដោយលោក Yasuhiro Yamada មន្ត្រីជាន់ខ្ពស់ផ្នែកគោលនយោបាយមេគង្គ នៃវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (Economic Research Institute of ASEAN and East Asia - ERIA) និងក្នុងនាមប្រធានវិទ្យាស្ថាន ERIA លោក Tetsuya Watanabe បានដឹកនាំប្រតិភូចូលជួបសម្ដែងការគួរសម និងពិភាក្សាការងារ កាលពីថ្ងៃទី១៦ ខែមិថុនា ឆ្នាំ២០២៥ ។ គណៈប្រតិភូនេះក៏មានសមាសភាពចូលរួមផងដែរពីលោក Tsutomu Tamura មន្រ្តីសាជីវកម្ម Nippon Koei Co, Ltd.។
កិច្ចប្រជុំនាឱកាសនេះត្រូវបានរៀបចំឡើងក្នុងគោលបំណងពិភាក្សាស្នើសុំការណែនាំបន្ថែមស្តីពីការវិនិយោគសម្រាប់ក្រុមហ៊ុនជប៉ុននៅកម្ពុជា។ ការណ៍នេះអនុវត្តស្របតាមស្មារតីនៃកិច្ចប្រជុំរបស់លោក Tetsuya Watanabe ប្រធានវិទ្យាស្ថាន ERIA ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅឯប្រទេសជប៉ុនកាលពីចុងខែឧសភា ឆ្នាំ២០២៥ ហើយក្នុងកិច្ចប្រជុំនោះក៏មានការចូលរួមពី ឯកឧត្តមឧបនាយករដ្ឋមន្ត្រីផងដែរ។
តាមរយៈកិច្ចប្រជុំនាឱកាសនេះ គណៈប្រតិភូវិទ្យាស្ថានស្រាវជ្រាវធុរកិច្ចកម្ពុជាបានធ្វើបទបង្ហាញអំពីផែនការការងារ, ស្នើសុំការណែនាំនិងឆ្លៀតឱកាសនេះ ដើម្បីថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមឧបនាយករដ្ឋមន្ត្រី ដែលបានចំណាយពេលវេលាដ៏មមាញឹកផ្តល់ឱកាសឱ្យគណៈប្រតិភូបានទទួលអនុសាសន៍ប្រើប្រាស់ជាមូលដ្ឋានក្នុងការងាររបស់ខ្លួន៕