វិទ្យុជាតិកម្ពុជា៖ អត្ថបទដោយលោក វណ្ណៈមន្ទីរព័ត៌មានស្វាយរៀង

          ស្វាយរៀង៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀងវាយតម្លៃខ្ពស់ចំពោះមន្ត្រីពាក់ព័ន្ធបានផ្តល់សេវាសាធារណៈបានល្អជូនប្រជាពលរដ្ឋតាមមូលដ្ឋាន ។

ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ និងទិសដៅអនុវត្តបន្តឆមាសទី២ ឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង នាព្រឹកថ្ងៃទី២៥ ខែមិថុនា ឆ្នាំ ២០២៥ លោកជំទាវបណ្ឌិតសភាចារ្យ ភឿង សកុណា បានថ្លែងការកោតសរសើរ ដល់ក្រុមការងារចុះមូលដ្ឋានក្រុង ស្រុកទាំងអស់ដែលបានខិតខំចុះផ្សព្វផ្សាយ គោលនយោបាយរបស់រាជរដ្ឋាភិបាលពិសេសការផ្តល់សេវាសាធារណៈនានាជូនប្រជាពលរដ្ឋបានល្អនិងទាន់ពេលវេលា។

លោកជំទាវបន្តថា  ក្រុមការងារបានផ្សព្វផ្សព្វផ្សាយនូវវិធានការសំខាន់ៗ ដែលរាជរដ្ឋាភិបាលបានដាក់ចេញ ក្នុងកំឡុងពេលវិវាទជាមួយថៃ រួមទាំងលើវិស័យពាណិជ្ជកម្ម ថាមពល គមនាគមន៍ វិធានការត្រៀមទទួល បងប្អូនពលករដែលអាចត្រឡប់មកពីប្រទេសថៃ និងសម្របសម្រួលនិងជ្រោមជ្រែងដល់គ្រប់ពលករនៅខេត្តស្វាយរៀងឱ្យទទួលបានការងារធ្វើ ឬបន្តវគ្គបណ្តុះបណ្តាលជំនាញផ្សេងៗជាដើម។

ឯកឧត្តមប៉េង ពោធិសាអភិបាលខេត្តមានប្រសាសន៍ថា បើទោះបីប្រទេសកម្ពុជាយើងមានបញ្ហាព្រំដែនជាមួយប្រទសថៃក៏ពិតមែន ប៉ុន្តែក្រោមការដឹកនាំរបស់ដ៏ត្រឹមត្រូវ ស្វាហាប់ និងឈ្លាសវៃរបស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រក្សាបាននូវសុខសន្តិភាព និងស្ថេរភាពនយោបាយនៅ  ទូទាំងប្រទេស និងអភិវឌ្ឍន៍ប្រទេសជាតិ ក៏ដូចជាខេត្តស្វាយរៀង ឱ្យមានការរីកចម្រើនស្ទើរគ្រប់វិស័យ ជាមួយនឹងសភាពការណសន្តិសុខ សុវត្ថិភាព សណ្តាប់ធ្នាប់សាធារណៈ និងរបៀបរៀបរយនៅទូទាំងខេត្តមានលក្ខណៈល្អប្រសើរ ដែលផ្តល់ភាពអនុគ្រោះដល់ការអភិវឌ្ឍ និងការវិនិយោគ ការប្រកបអាជីវកម្ម និងការរស់នៅប្រកបដោយសុខដុមរមនារបស់ប្រជាពលរដ្ឋគ្រប់រូប។ 

ឯកឧត្តមបន្តថា ក្រុមការងាររាជរដ្ឋាភិបាល បានចូលរួមយ៉ាងសកម្មក្នុងសកម្មភាពនានានៅ  មូលដ្ឋានដូចជា ទិវាបុណ្យជាតិ និងអន្តរជាតិ ពិធីសម្ពោធសមិទ្ធផល ពិធីបុណ្យសាសនា ការប្រកួតកីឡា កម្មវិធីសង្ក្រាន សកម្មភាពដាំដើមឈើ ការដឹកនាំក្រុមគ្រូពេទ្យស្មគ្រចិត្ត ចុះជួយព្យាបាលជំងឺជូនបងប្អូនប្រជាពលរដ្ឋ សកម្មភាពមនុស្សធម៌ និងពិធីនានាជាដែលបានរៀបចំនៅក្នុងខេត្ត ព្រមទាំងបានចូលរួមជាគ្រឿងឧបភោគបរិភោគ សម្ភារៈ និងថវិកា ដល់មូលដ្ឋាន ដូចជាការជួយឧបត្ថម្ភសម្ភារៈ និងថវិកាដល់គ្រួសារក្រីក្រ គ្រួសារជួបគ្រោះធម្មជាតិ និងក្រុមគ្រួសារងាយរងហានិភ័យ ជាដើម ។

ឯកឧត្តមបន្ថែមទៀតថា ក្រុមការងាររាជរដ្ឋាភិបាលចុះមូលដ្ឋាន បានចូលរួមដោះស្រាយសំណើរ សំណូមពរ និងបញ្ហាប្រឈមនានា ចូលរួមបរិច្ចាគធនធានផ្ទាល់ខ្លូន និងបានកៀរគរធនធានពីសប្បុរសជននានា ដើម្បីចូលរួមអភិវឌ្ឍមូលដ្ឋាន និងចូលរួមកសាងសមិទ្ធផលនានារួមមាន ការជួយស្ថាបនាផ្លូវ ប្រឡាយទឹក សាងសង់អាគារមន្ទីរពេទ្យ មណ្ឌលសុខភាព អាគារសាលារៀន  ខ្លោងទ្វារ កុដ្ឋ ឧបដ្ឋានសាលា និងសមិទ្ធផលនានាជាច្រើនបន្ថែមទៀតទាំងវិស័យពុទ្ធចក្រ និងអាណាចក្រ ដើម្បីឆ្លើយតបទៅនឹងតម្រូវជាក់ស្តែង៕