វិទ្យុជាតិកម្ពុជា៖ មន្ទីរព័ត៌មានខេត្តក្រចេះ 
អំណោយសប្បុរសរបស់ព្រះមន្រ្តីសង្ឃ នៅទូទាំងស្រុកឆ្លូង ខេត្តក្រចេះ តែងតែប្រគល់ដល់អនុសាខាកាកបាទក្រហមកម្ពុជា និងរដ្ឋបាលស្រុក ជារៀងរាល់ឆ្នាំមិនដែលខាន ដើម្បីបម្រើក្នុងការងារមនុស្សធម៌ និងជាការតបស្នងគុណនៃការដឹកនាំប្រទេសជាតិឲ្យមានភាពរីកចម្រើនទាំងវិស័យពុទ្ធចក្រ និងអាណាចក្រ របស់រាជរដ្ឋាភិបាលកម្ពុជា ។

ដែលអំណោយទាំងអស់នេះមានជាគ្រឿងឧបភោគបរិភោប សម្ភារៈប្រើប្រាស់ រួមនិងបច្ច័យចំនួន ៣លានរៀល ដឹកនាំដោយព្រះសៈមៈណៈញាណៈកិច្ច បេ សីហា ព្រះធម្មធម៌អនុគណស្រុក និងជាព្រះចៅអធិការវត្តពោធិព្រឹក្ស ហៅវត្តឈើទាលភ្លោះ ឃុំកញ្ជរ ស្រុកឆ្លូងមានសង្ឃដីការព្រះធម្មធម៌អនុគណស្រុក បេ សីហា បានបញ្ជាក់ថា ៖ ជារៀងរាល់ឆ្នាំ ព្រះគ្រូតែងតែបិណ្ឌបាត្រកៀរគរព្រះមន្រ្តីសង្ឃ និងប្រជាពុទ្ធបរិស័ទ រួមនិងសប្បុរសជន ក្នុងការចូលរួមធ្វើបុណ្យសន្សំកុសល តាមរយៈសកម្មភាពនានា ជាពិសេសគឺសកម្មភាពមនុស្សធម៌ ដែលជាផ្នែកមួយក្នុងការចូលរួមតបស្នងទៅរាជរដ្ឋាភិបាល ដែលបានដឹកនាំកសាងប្រទេសជាតិ ឲ្យមានភាពរីកចម្រើន សម្បូរសប្បាយ ធ្វើឲ្យជីវភាពប្រជាពលរដ្ឋមានភាពធូធារ និងមានលទ្ធភាពនិងឱកាសក្នុងការធ្វើបុណ្យរួមគ្នា  ហើយក្នុងនោះដែរ វិស័យពុទ្ធសាសនា ក៏មានការអភិវឌ្ឍន៍រីកចម្រើនផងដែរ ។ 

ព្រះគ្រូបន្តថា ៖ បើទោះបីជាអំណោយ និងសម្ភារៈប្រើប្រាស់ រួមនិងថវិការដែលប្រគល់ជូនទៅ តិចតួចក្តីតែនេះជាទឹកប្រទ័យ និងទឹកចិត្តជ្រះថ្លាររបស់ប្រជាពុទ្ធបរិស័ទ ក្នុងការចូលរួមសម្រួល និងសម្រាលដ៏កិច្ចការរបស់អាជ្ញាធរ ក៏ដូចជារដ្ឋាភិបាល លើសុខទុក្ខជីវភាពរស់របស់ប្រជាពលរដ្ឋ ។ 

ក្នុងឱកាសនោះ លោកស្រី គង់ លឹមហូ អភិបាលស្រុក បានថ្លែងអំណរគុណចំពោះទឹកប្រទ័យរបស់ព្រះមន្រ្តីសង្ឃនៅទូទាំងស្រុក ជាពិសេសគឺព្រះគ្រូអនុគណស្រុកតែម្តង ដែលតែងតែគិតគូរ និងយកទឹកប្រទ័យទុកដាក់ ជាមួយអនុសាខាស្រុកជារៀងរាល់ឆ្នាំមិនដែលខាន បើទោះបីជាតិចក្តីច្រើនក្តី ក្នុងន័យធ្វើយ៉ាងណាជួយសម្រាលការរស់នៅរបស់ប្រជាពលរដ្ឋ និងដើម្បីផ្គត់ផ្គង់ទ្រទ្រង់ដល់សកម្មភាពមនុស្សធម៌របស់រដ្ឋបាលស្រុក និងអនុសាខាកាកបាទក្រហមកម្ពុជា ។ 

លោកស្រីបន្តថា ៖ អំណោយជាគ្រឿងឧបភោបបរិភោប និងសម្ភារៈ រួមបច្ច័យដែលទទួលបានពីព្រះមន្រ្តីសង្ឃកន្លងមក រដ្ឋបាលស្រុក និងអនុសាខា តែងតែចែកជូនដល់ដៃបងប្អូនប្រជាពលរដ្ឋទីទាល់ខ្វះខាតពិតប្រាកដ ហើយពេលនេះ រដ្ឋបាលស្រុកក៏កំពុងស្វែងរកមុខសញ្ញាដែលនឹងត្រូវទទួលបន្តទៀតផងដែរ ៕