វិទ្យុជាតិកម្ពុជា កញ្ញា ខៀវ ណាវីន ថ្ងៃទី៤ ៧ ២៥

អន្តរជាតិ៖ លោក វ៉ាង យី (Wang Yi) រដ្ឋមន្ត្រីការបរទេសចិនបាននិយាយថា អាជ្ញាធរចិន និងសហភាពអឺរ៉ុប (EU) គួរតែជំរុញការដោះស្រាយដោយសន្តិវិធីនៃការខ្វែងគំនិតគ្នាជាអន្តរជាតិ និងរួមគ្នាដោះស្រាយបញ្ហាសកលលោក។ នេះបើយោងតាមការចេញផ្សាយដោយសារព័ត៌មាន Tass។ យោងតាមគេហទំព័ររបស់ក្រសួងការបរទេសចិន លោក Wang Yi បានអំពាវនាវឱ្យភាគីទាំងពីរ "ប្រកាន់ខ្ជាប់នូវពហុភាគីនិយម និងពាណិជ្ជកម្មសេរី ការពារច្បាប់ និងសណ្តាប់ធ្នាប់អន្តរជាតិ ជំរុញការដោះស្រាយជម្លោះអន្តរជាតិដោយសន្តិវិធី និងរួមគ្នាដោះស្រាយបញ្ហាប្រឈមជាសកល ដូចជាការប្រែប្រួលអាកាសធាតុជាដើម"។ កាលពីថ្ងៃទី២ ខែកក្កដា លោក Wang Yi បានជួបជាមួយលោកស្រី អឺរស៊ូឡា វ៉ុនឌែរ ឡេយែន (Ursula von der Leyen) ប្រធានគណៈកម្មការអឺរ៉ុប នៅទីក្រុងព្រុចស៊ែល។ យោងតាមលោក Wang Yi ប្រទេសចិនបានត្រៀមខ្លួនរួចជាស្រេចក្នុងការអភិវឌ្ឍទំនាក់ទំនងភាពជាដៃគូជាមួយសហភាពអឺរ៉ុប ធ្វើឱ្យស៊ីជម្រៅកិច្ចសហប្រតិបត្តិការពាណិជ្ជកម្ម និងសេដ្ឋកិច្ច ពង្រឹងការបើកចំហទៅវិញទៅមក លុបបំបាត់ភាពខ្វែងគំនិតគ្នា និងសម្រេចបានលទ្ធផលផលប្រយោជន៍ទៅវិញទៅមក។ គួរបញ្ជាក់ថា លោក Wang Yi ក៏បានកត់សម្គាល់ថា ក្នុងស្ថានភាពអន្តរជាតិកាន់តែស្មុគស្មាញ ប្រទេសចិន និង EU គួរតែពង្រឹងទំនាក់ទំនង ពង្រឹងទំនុកចិត្តគ្នាទៅវិញទៅមក បន្តគោលនយោបាយប្រកបដោយការទទួលខុសត្រូវ និងដើរតួជាកម្លាំងស្ថិរភាពនៅលើពិភពលោក៕