វិទ្យុជាតិកម្ពុជា កញ្ញា ខៀវ ណាវីន ថ្ងៃទី១០ ៧ ២០២៥

អន្តរជាតិ៖ មន្ត្រីវៀតណាមបាននិយាយថា ការលើកកម្ពស់ និងធានាសិទ្ធិមនុស្សពាក់ព័ន្ធនឹងវិស័យ និងសសរស្តម្ភជាច្រើន ទាមទារឱ្យមានវិធីសាស្រ្តទូលំទូលាយ និងបង្កើនការសម្របសម្រួលរវាងគណៈកម្មការអន្តររដ្ឋាភិបាលអាស៊ានស្តីពីសិទ្ធិមនុស្ស (AICHR) និងទីភ្នាក់ងារឯកទេសដើម្បីបង្កើនធនធានសម្រាប់កិច្ចសហប្រតិបត្តិការសិទ្ធិមនុស្ស។ នេះបើយោងតាមការចេញផ្សាយដោយសារព័ត៌មាន Vietnam Plus។ ថ្លែងមតិក្នុងកិច្ចសន្ទនាជាមួយ AICHR កាលពីថ្ងៃទី៨ ខែកក្កដា ដែលជាផ្នែកមួយនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៨ (AMM-58) នៅទីក្រុងគូឡាឡាំពួរ លោកឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម បានកោតសរសើរចំពោះការរួមវិភាគទានរបស់ AICHR ក្នុងរយៈពេល ១៥ឆ្នាំកន្លងមកនេះ ហើយបានសម្តែងនូវទំនុកចិត្តលើតួនាទីបន្តនៃកិច្ចសហប្រតិបត្តិការអាស៊ានទាំងក្នុងតំបន់ ជាក់ស្តែង និងយុទ្ធសាស្ត្រ។ ខណៈដែលលោកបានទទួលស្គាល់វឌ្ឍនភាពនេះ លោកក៏បានជំរុញឱ្យគណៈកម្មការដោះស្រាយបញ្ហាប្រឈមដែលកំពុងកើតមានដូចជា ភាពក្រីក្រ លក្ខខណ្ឌការងារធ្ងន់ធ្ងរ និងឥទ្ធិពលនៃបច្ចេកវិទ្យាមកលើសិទ្ធិមនុស្ស។ ក្នុងកិច្ចសន្ទនានេះ រដ្ឋមន្ត្រីការបរទេសអាស៊ានក៏បានស្វាគមន៍ចំពោះការរួមចំណែកដ៏មានអត្ថន័យរបស់ AICHR ក្នុងការកសាងសហគមន៍អាស៊ាន និងបានកោតសរសើរដល់កិច្ចខិតខំប្រឹងប្រែងក្នុងការបញ្ជ្រាបសិទ្ធិមនុស្សនៅទូទាំងផ្នែកនៃកិច្ចសហប្រតិបត្តិការ រួមទាំងការលើកកម្ពស់សិទ្ធិស្ត្រី កុមារ និងជនពិការ និងការដោះស្រាយបញ្ហាដែលកំពុងកើតមានដូចជា ការការពារបរិស្ថាន ការប្រែប្រួលអាកាសធាតុ សុខភាពផ្លូវចិត្ត ឧក្រិដ្ឋកម្មឆ្លងដែន បច្ចេកវិទ្យា AI និងសន្តិសុខ៕