វិទ្យុជាតិកម្ពុជា កញ្ញា ខៀវ ណាវីន ថ្ងៃទី១៤ ៧ ២០២៥

អន្តរជាតិ៖ ក្នុងកិច្ចប្រជុំមិត្តភាពយុវជនវៀតណាម-ឡាវឆ្នាំ២០២៥ គណៈប្រតិភូនៃគណៈកម្មាធិការមជ្ឈិមសម្ព័ន្ធយុវជនកុម្មុយនិស្តហូជីមិញ (HCYU) បានទៅជួបសម្តែងការគួរសមជាមួយអនុប្រធានរដ្ឋឡាវ Bounthong Chitmany នៅទីក្រុងវៀងចន្ទន៍។ នេះបើយោងតាមការចេញផ្សាយដោយសារព័ត៌មាន Vietnam Plus។ លោក Bounthong Chitmany បានបង្ហាញជំនឿថា គណៈកម្មាធិការមជ្ឈិមនៃ HCYU និងសហភាពយុវជនបដិវត្តន៍ប្រជាជនឡាវ (LPRYU) នឹងបន្តពង្រឹងការសម្របសម្រួលដើម្បីអនុវត្តកិច្ចព្រមព្រៀងសហប្រតិបត្តិការឆ្នាំ ២០២២-២០២៧ ប្រកបដោយប្រសិទ្ធភាព ជាពិសេសក្នុងការផ្លាស់ប្តូរយុវជន និងការអប់រំយុវជនជំនាន់ក្រោយអំពីទំនាក់ទំនងប្រពៃណីរបស់ប្រទេស។ លោកក៏បានស្នើឱ្យ HCYU និងសហព័ន្ធយុវជនវៀតណាម បន្តគាំទ្រក្នុងការបណ្តុះបណ្តាលកម្មាភិបាលយុវជន ជាពិសេសនៅតាមបណ្តាខេត្តជាប់ព្រំដែន ដោយត្រូវចែករំលែកបទពិសោធជាមួយសមភាគីឡាវ ដើម្បីជួយអភិវឌ្ឍយុវជនឡាវ និងអនុវត្តគម្រោងមជ្ឈមណ្ឌលយុវជនឡាវ-វៀតណាម នៅទីក្រុងវៀងចន្ទន៍។ លោកក៏បានអំពាវនាវឱ្យមានការផ្លាស់ប្តូរបន្ថែមទៀតរវាងសមាគមសហគ្រិនវ័យក្មេងនៃប្រទេសទាំងពីរ ការអប់រំកាន់តែរឹងមាំរបស់យុវជនអំពីទំនាក់ទំនងមិត្តភាពពិសេស និងការអនុវត្តប្រកបដោយផ្លែផ្កានៃកិច្ចព្រមព្រៀងសហប្រតិបត្តិការ ដែលរួមចំណែកដល់ទំនាក់ទំនងទ្វេភាគី៕