វិទ្យុជាតិកម្ពុជា៖មន្ទីរព័ត៌មានកំពង់ឆ្នាំង 
ឯកឧត្តម ឈន សេដ្ឋា អនុរដ្ឋលេខាធិការក្រសួងអភិវឌ្ឍន៍ជនបទនិងជាអនុប្រធានក្រុមការងាររាជរដ្ឋាភិបាលចុះមូលដ្ឋានឃុំទួលខ្ពស់ រួមនឹងមន្ត្រីអ្នកមុខអ្នកការនៃស្ថាប័នពាក់ព័ន្ធជាច្រើន បានអញ្ជើញចុះសួរសុខទុក្ខ និងនាំយក បណ្ណសរសើរមេត្រី បរិស្ថាន របស់ក្រសួងបរិស្ថាន ទៅប្រគេន ព្រះគ្រូ ហួន សុភឿន ព្រះគ្រូចៅអធិការ វត្តមហាកុសលចេតនារាម ហៅវត្តត្រពាំងអញ្ចាញ ស្ថិតក្នុងភូមិត្រពាំងអញ្ជាញ ឃុំទួលខ្ពស់ ខេត្តកំពង់ឆ្នាំង។
លោក សំ មៀន ប្រធានការិយាល័យចំណេះដឹងនិង ព័ត៌មាន នៃមន្ទីរបរិស្ថាន ខេត្តកំពង់ឆ្នាំង បានបញ្ជាក់ថា ការប្រគេន បណ្ណសរសើរមេត្រី បរិស្ថាន ដល់ព្រះគ្រូ ហួន សុភឿន ព្រះគ្រូចៅអធិការវត្តត្រពាំងអញ្ចាញនៅពេលនេះ គឺដោយសារព្រះគ្រូចៅអធិការវត្តត្រពាំងអញ្ចាញនេះ បានដឹកនាំរៀបចំអភិវឌ្ឍន៍ កសាងក្នុងបរិវេណវត្តបានយ៉ាងល្អប្រណិត និងបានចូលរួមប្រតិបត្តិមេត្រីបរិស្ថានបានល្អ ក្នុងក្របខណ្ឌយុទ្ធសាស្រ្ត ចក្រាវិស័យបរិស្ថាន ព្រមទាំងបានរួមសហការ សាមគ្គីល្អ ជាមួយអាជ្ញាធរ ព្រះសង្ឃ និងពុទ្ធបរិស័ទ្ធ ក្នុងការកសាងទីអារាមនេះ ដើម្បី ទទួលបានភាពស្អាត ភាពបៃតង និង ចីរភាព សក្តិសមជាកន្លែងគោរពបូជា និងធ្វើបុណ្យទានផ្សេងៗទៅតាមប្រពៃណីព្រះពុទ្ធសាសនានៃខ្មែរយើង៕