ពលរដ្ឋអាមេរិកប្រហែល ១០០ នាក់ជាអ្នករស់នៅអចិន្ត្រៃយ៍នៅតែរង់ចាំការចាកចេញពីអាហ្វហ្គានីស្ថាន

វិទ្យុជាតិកម្ពុជា ៖ កញ្ញា ខៀវ ណាវីន

អន្តរជាតិ ៖ មន្រ្តីជាន់ខ្ពស់ក្រសួងការបរទេសអាមេរិកបាននិយាយ ថា សហរដ្ឋអាមេរិកដឹងអំពីពលរដ្ឋអាមេរិកាំង ១០០ នាក់និងអ្នករស់ នៅអចិន្ត្រៃយ៍ស្របច្បាប់ (LPRs) ដែលនៅតែបន្តស្ថិតនៅអាហ្វហ្គានីស្ថានហើយត្រៀមខ្លួនចាកចេញពីប្រទេសនេះ។ 

នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី២៨ ខែកញ្ញា។ មន្រ្តីរូបនេះបានប្រាប់អ្នកយកព័ត៌មានដោយសុំមិនបញ្ចេញឈ្មោះថា ក្រសួងការបរទេសកំពុង ធ្វើការដើម្បីយកមនុស្សទាំង នោះតាមជើងហោះហើរចេញពីអាហ្វហ្គានីស្ថាន។ មន្រ្តីរូបនេះបាននិយាយថា “អាទិភាពខ្ពស់បំផុតរបស់យើងនៅអាហ្វហ្គានីស្ថាន គឺនៅតែជួយពលរដ្ឋអាមេរិកទាំងនោះ ដែល មានបំណងចង់ចាកចេញពីប្រទេសអាហ្វហ្គានីស្ថានឥឡូវនេះ” ។ មនុស្សប្រហែល ១២៤,០០០ នាក់ត្រូវបានគេដឹកតាមយន្តហោះចេញពីទីក្រុងកាប៊ុលបន្ទាប់ពីរដ្ឋាភិបាលដែលគាំទ្រដោយសហរដ្ឋអាមេរិកនៅទីនោះបានដួលរលំកាលពីខែមុន ហើយក្រុមតាលីបង់បានគ្រប់គ្រង។ យោងតាមមន្រ្តីបាននិយាយថា ចាប់តាំងពីកងកម្លាំងអាមេរិកបានចាកចេញនិងប្រគល់ព្រលានយន្តហោះនៅថ្ងៃទី ៣១ ខែសីហា. ពលរដ្ឋអាមេរិក ៨៥ នាក់និង LPR ៧៩ នាក់បានចាកចេញពីអាហ្វហ្គានីស្ថានតាមជើងហោះហើរ។ មន្ត្រីរូបនោះបាននិយាយថាទោះយ៉ាងណាពលរដ្ឋអាមេរិកខ្លះមិនចង់ចាកចេញពីអាហ្វហ្គានីស្ថានដោយសមាជិកគ្រួសាររបស់ពួកគេមិនមានឯកសារធ្វើដំណើរដើម្បីចូលសហរដ្ឋអាមេរិកនោះទេ។ មន្រ្តីរូបនេះបាននិយាយថាសហរដ្ឋអាមេរិកនឹងខិតខំប្រឹងប្រែងបន្ថែមទៀតដើម្បីជួយដល់សមាជិកគ្រួសារនៃពលរដ្ឋអាមេរិកភ្លាមៗ ដែលមិនមានឯកសារចាំបាច់៕