ក្រុមហ៊ុន ផលិត ថ្ម របស់ ប្រទេសចិន ចុះ អនុស្សរណៈ ដើម្បី សាងសង់ រោងចក្រ នៅ ប្រទេសម៉ាឡេស៊ី

ក្រុមហ៊ុន ផលិត ថ្ម របស់ ប្រទេសចិន ចុះ អនុស្សរណៈ ដើម្បី សាងសង់ រោងចក្រ នៅ ប្រទេសម៉ាឡេស៊ី

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ក្រុមហ៊ុនផលិតថ្មរបស់ប្រទេសចិន EVE Energy Co. Ltd. បានចុះហត្ថលេខាលើអនុស្សរណៈនៃការយោគយល់ (MoU) ជាមួយក្រុមហ៊ុន Pemaju Kelang Lama Sdn Bhd នៅ ថ្ងៃ សុក្រ ដើម្បី បង្កើត រោងចក្រ ផលិត ទំនើប ក្នុង ប្រទេស ម៉ាឡេស៊ី។ នេះបើយោងតាមការចុះផ្សាយរបស់សារព័ត៌មាន Xinhua។ អាជ្ញាធរអភិវឌ្ឍន៍ការវិនិយោគម៉ាឡេស៊ី (MIDA) និង EVE បាននិយាយនៅក្នុងសេចក្តីថ្លែងការណ៍រួមមួយថា រោងចក្រនេះនឹងត្រូវបានសាងសង់នៅក្នុងរដ្ឋ Kedah និងតំណាងឱ្យការវិនិយោគរហូតដល់ ៤២២,៣ លានដុល្លារអាមេរិក ហើយនឹងផ្តោតលើការផលិតអាគុយលីចូម-អ៊ីយ៉ុងស៊ីឡាំងសម្រាប់ឧបករណ៍ថាមពល និងកង់អគ្គិសនី។ ការចុះហត្ថលេខាលើអនុស្សរណៈយោគយល់គ្នានេះបង្ហាញពីភាពជឿនលឿននៃគម្រោងម៉ាឡេស៊ីរបស់ក្រុមហ៊ុន EVE ដែលបំពេញតម្រូវការរបស់ក្រុមហ៊ុនយ៉ាងមានប្រសិទ្ធភាពក្នុងការពង្រីកបន្ថែមនូវសមត្ថភាពផលិតអាគុយស៊ីឡាំង ដើម្បីគាំទ្រដល់ក្រុមហ៊ុនផលិតកង់អគ្គិសនី និងឧបករណ៍ថាមពល ជាពិសេសនៅក្នុងប្រទេសម៉ាឡេស៊ី និងអាស៊ីអាគ្នេយ៍។ សេចក្តីថ្លែងការណ៍បាននិយាយថា "នេះនឹងលើកកម្ពស់បន្ថែមទៀតនូវអាជីវកម្មនៅក្រៅប្រទេសរបស់ក្រុមហ៊ុន និងចំណែកទីផ្សារសកលនៃទីផ្សាររថយន្ត និងឧបករណ៍ថាមពល និងលើកកម្ពស់ការប្រកួតប្រជែងរបស់ EVE ខណៈដែលបង្កើនល្បឿននៃការពង្រីកអាជីវកម្មនៅក្រៅប្រទេសរបស់ខ្លួន និងការលើកកម្ពស់ការអភិវឌ្ឍនៃប្រទេសម៉ាឡេស៊ី" ៕