វិទ្យុជាតិកម្ពុជា ៖ គឹមហឿនស្ទឹងត្រែង
ថ្នាក់ដឹកនាំ និងមន្ត្រីរាជការ ក្រសួង និងមន្ទីរប្រៃសណីយ៍និងទូរគមនាគមន៍ចំនួន៥០នាក់មកពីខេត្ត ក្រចេះ -រតនគិរី- មណ្ឌលគិរី- ព្រះវិហារ-និងខេត្តស្ទឹងត្រែងបានប្តេជ្ញារួមគ្នាប្រយុទ្ធប្រឆាំងជំងឺ អេដស៍ដោយគ្មានការឆ្លងថ្មី និងទប់ស្កាត់ការចរាចរគ្រឿងញៀនតាមបញ្ញើប្រៃសណីយ៍។
ក្នុងសិក្ខាសាលាស្តីពីក្រសួងប្រៃសណីយ៍និងទូរគមនាគមន៍ចូលរួមបញ្ជ្រាបជំងឺអេដស៍នៅកម្ពុជាឆ្នាំ២០២៥ និងទប់ស្កាត់ការប្រើប្រាស់ជួញដូរគ្រឿងញៀនតាមបញ្ញើប្រៃសណីយ៍នៅខេត្តស្ទឹងត្រែង ថ្ងៃទី១៩ខែតុលា ឆ្នាំ២០២៣ ឯកឧត្តមខាយ ឃុនហេង រដ្ឋលេខាធិការក្រសួងប្រៃសណីយ៍និងទូរគមនាគមន៍មានប្រសាសន៍ថា៖ជាគោលបំណងរបស់យើងទាំងអស់គ្នា ក្នុងការ ចូលរួមអនុវត្តផែនការនិងគោល នយោបាយរបស់រាជរដ្ឋាភិបាល ឈានទៅធ្វើឱ្យសង្គមជាតិយើងរួចផុតពីបញ្ហាប្រឈមទាំងឡាយណាដែលកើតមានឡើង និងអ្វីដែលយើងបានដឹងហើយ តែមិនបានចូលរួមអនុវត្ត។
ឯកឧត្តមរដ្ឋលេខាធិការមានប្រសាសន៍ទៀតថា៖ដូចជាការប្រយុទ្ធប្រឆាំងជំងីអេដស៍និងគ្រឿងញៀន កិច្ចការងារនេះយើងត្រូវតែសាមគ្គីគ្នាអនុវត្តឱ្យមានប្រសិទ្ធភាពដើម្បីខ្លួនយើងផង និងសង្គមជាតិយើងទាំងមូលផង។
ឯកឧត្តមលើកឡើងថា ៖ « យើងត្រឡប់ទៅវិញយើងអាចជួយបាន ជួយខ្លួនឯង ជួយគ្រួសារខ្លួនឯង ជួយដល់សង្គម ជួយដល់តំបន់របស់យើង ជួយទូទាំងប្រទេស យើងចូលរួមទាំងអស់គ្នា ទាំងបញ្ហាអវិជ្ជមាន ទាំងអេដស៍ ទាំងគ្រឿង ញៀន បើសិនជាមិនអត់មានការ ចូលរួមពីយើងម្នាក់ៗទេគឺអ៊ីចឹងយើងធ្វើដល់ណា ក៏មិនចេះចប់ដែរ។»
លោកស្រី នេតច័ន្ទវរិន ប្រធានមន្ទីរប្រៃសណីយ៍និងទូរគមនាគមន៍ខេត្តស្ទឹងត្រែងតំណាងសិក្ខាកាមមកពីខេត្តទាំង៥ បានបញ្ជាក់ថា៖យើងនឹងជំរុញបន្ថែមឱ្យយើងទាំងអស់គ្នា កាន់តែយកចិត្តទុកដាក់ក្នុងការបំពេញកិច្ចការងារ ឱ្យមានប្រសិទ្ធភាពទាំងការបង្ការ និងការទប់ស្កាត់។
លោកស្រីបន្តថា៖ក្រោយពីសិក្ខាសាលានេះទៅមន្ទីរនឹងធ្វើការផ្សព្វផ្សាយបន្ថែមទៅគ្រប់ប្រតិបត្តិករទៅដល់មន្ត្រីអង្គភាពបញ្ញើប្រៃសណីយ៍រដ្ឋ និងវិស័យឯកជន ដើម្បីនាំគ្នា លើកកម្ពស់ការប្រុងប្រយ័ត្ន និងអនុវត្តន៍ឱ្យមានប្រសិទ្ធភាពខ្ពស់ ទាំងការលុប បំបាត់ការចម្លងមេរោគអេដស៍និងការជួញដូរគ្រឿងញៀនផងដែរ។
សូមបញ្ជាក់ថា៖នេះជាយន្ត ការចាំបាច់មួយ ដើម្បីធ្វើឱ្យផែនការយុទ្ធសាស្ត្ររបស់រាជរដ្ឋាភិបាលឆ្នាំ២០២៥ ការប្រយុទ្ធប្រឆាំងជំងឺអេដស៍គ្មានអ្នកឆ្លងថ្មី និងគ្មានការចរាចរគ្រឿងញៀនតាមបញ្ញើប្រៃសណីយ៍ ប្រកបដោយប្រសិទ្ធភាព និងមានបរិយាប័ន្ន៕
Comments