ប្រទេសជប៉ុនបានអនុម័តថវិកាបន្ថែមចំនួន ៨៩,៤ ពាន់លានដុល្លារអាមេរិក ដើម្បីប្រយុទ្ធប្រឆាំងនឹងអតិផរណា

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ សភាជប៉ុនបានអនុម័តថវិកាបន្ថែមចំនួន ១៣,២ ពាន់ពាន់លានយ៉េន (៨៩,៤ ពាន់លានដុល្លារអាមេរិក) សម្រាប់ឆ្នាំសារពើពន្ធបច្ចុប្បន្នរហូតដល់ខែមីនាឆ្នាំក្រោយ ដើម្បីផ្តល់មូលនិធិកញ្ចប់សេដ្ឋកិច្ចថ្មីមួយដែលត្រូវបានរចនាឡើងដើម្បីជួយគ្រួសារដែលរងផលប៉ះពាល់ដោយការកើនឡើងតម្លៃ និងគាំទ្រសេដ្ឋកិច្ចដែលរងផលប៉ះពាល់ដោយអតិផរណា។ នេះបើយោងតាមការចេញផ្សាយដោយសារព័ត៌មាន Xinhua។ ក្នុងចំណោមចំនួនសរុប ៨,៨៨ ពាន់ពាន់លានយ៉េននឹងត្រូវបានធានាដោយការចេញមូលបត្របំណុលរដ្ឋាភិបាលថ្មីដែលនឹងធ្វើឱ្យមានភាពតានតឹងបន្ថែមទៀតលើគំនរបំណុលរដ្ឋដែលមានចំនួនច្រើនជាងពីរដងនៃទំហំសេដ្ឋកិច្ច។ លក្ខណៈពិសេសថ្មីនៅក្នុងកញ្ចប់រួមមានការផ្តល់ឱ្យគ្រួសារដែលមានប្រាក់ចំណូលទាបដែលត្រូវបានលើកលែងពីការបង់ពន្ធ ៧០,០០០ យ៉េននៅចុងឆ្នាំ ដោយរក្សាការឧបត្ថម្ភធនដើម្បីកាត់បន្ថយតម្លៃប្រេងឥន្ធនៈរហូតដល់និទាឃរដូវក្រោយ និងការបង្កើនការវិនិយោគលើផ្នែកសំខាន់ៗដែលធ្វើឱ្យប្រទេសមានការប្រកួតប្រជែង។ ជាមួយនឹងថវិកាបន្ថែម ទំហំសរុបនៃការចំណាយរបស់រដ្ឋាភិបាលសម្រាប់សារពើពន្ធឆ្នាំ ២០២៣ នឹងកើនឡើងដល់ ១២៧,៥៨ ពាន់ពាន់លានយ៉េន ដែលក្នុងនោះប្រហែលមួយភាគបី ឬ ៤៤,៥ ពាន់ពាន់លានយ៉េននឹងត្រូវបានផ្តល់មូលនិធិដោយមូលបត្របំណុលរបស់រដ្ឋាភិបាល៕ (១ ដុល្លារអាមេរិកស្មើនឹង ១៤៧,៧ យ៉េន)