ឯកឧត្តម ហ៊ុន ម៉ានី ថ្លែងថា សមិទ្ធផលនានា ក្នុងបរិវេណវត្តវិហារខ្ពស់ គឺឆ្លុះបញ្ចាំងអំពីការប្តេជ្ញាចិត្តប្រកបដោយសទ្ធាជ្រះថ្លារបស់ថ្នាក់ដឹកនាំ លើកកម្ពស់វិស័យព្រះពុទ្ធសាសនា

វិទ្យុជាតិកម្ពុជា៖លោក ជួន បូណា

កំពង់ស្ពឺ៖ ឯកឧត្តម ហ៊ុន ម៉ានី ថ្លែងថា សមិទ្ធផលនានា ក្នុងបរិវេណវត្តវិហារខ្ពស់ គឺឆ្លុះបញ្ចាំងឱ្យឃើញកាន់តែច្បាស់អំពីជំនឿដ៏មុតមាំរបស់ ពុទ្ធសាសនិកយើង និងការប្តេជ្ញាចិត្តប្រកបដោយសទ្ធាជ្រះថ្លារបស់ថ្នាក់ដឹកនាំ ក្នុងការខិតខំ ប្រឹងប្រែងលើកកម្ពស់វិស័យព្រះពុទ្ធសាសនាដែលជាសាសនារបស់រដ្ឋ សម្រាប់បម្រើឱ្យ វិស័យព្រះពុទ្ធសាសនា និងទុកជាសក្ការៈសម្រាប់ពុទ្ធបរិស័ទគោរពបូជា។

ក្នុងពិធីបុណ្យបញ្ចុះខណ្ឌសីមា និងសម្ពោធសមិទ្ធផលនានា ក្នុងបរិវេណវត្តវិហារខ្ពស់ នៅសង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ។ ពិធីនេះមានការនិមន្ត និងអញ្ជើញចូលរួមពីព្រះមុនីសត្ថាចារ្យកោសល កែវ ចន្ថា ព្រះមេគណខេត្តកំពង់ស្ពឺ ព្រះថេរានុថេរៈ ឯកឧត្តម លោកជំទាវ ជាសមាជិក ព្រឹទ្ធសភា រដ្ឋសភា ក្រុមការងាររាជរដ្ឋាភិបាលចុះជួយមូលដ្ឋានខេត្ត ក្រុង ស្រុក នៃខេត្តកំពង់ស្ពឺ ថ្នាក់ដឹកនាំ និងមន្ត្រីរាជការចំណុះរដ្ឋបាលខេត្តកំពង់ស្ពឺ និងបងប្អូន ប្រជាពលរដ្ឋជាច្រើនរូប នាព្រឹកថ្ងៃទី១៦ ខែមីនា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកំពង់ស្ពឺ បានមានប្រសាសន៍ថា សមិទ្ធផលទាំងអស់នេះ បានឆ្លុះបញ្ចាំងឱ្យឃើញកាន់តែច្បាស់អំពីជំនឿដ៏មុតមាំរបស់ ពុទ្ធសាសនិកយើង និងការប្តេជ្ញាចិត្តប្រកបដោយសទ្ធាជ្រះថ្លារបស់ថ្នាក់ដឹកនាំ ក្នុងការខិតខំ ប្រឹងប្រែងលើកកម្ពស់វិស័យព្រះពុទ្ធសាសនាដែលជាសាសនារបស់រដ្ឋ។ ដូច្នេះហើយទើបរាជរដ្ឋាភិបាលកម្ពុជា តែងតែបង្កបរិយាកាសល្អ និងយកចិត្តទុកដាក់លើកកម្ពស់វិស័យព្រះពុទ្ធសាសនា ដោយបានចែងកំណត់ក្នុងរដ្ឋធម្មនុញ្ញ ថាព្រះពុទ្ធសាសនាជាសាសនារបស់រដ្ឋ ព្រមទាំងបានចូលរួម និងជំរុញការកសាងហេដ្ឋារចនា សម្ព័ន្ធរូបវ័ន្តនានាជាច្រើនសម្រាប់បម្រើដល់វិស័យព្រះពុទ្ធសាសនាថែមទៀតផង។

ថ្លែងទៅកាន់អង្គពិធីនោះ ឯកឧត្តមឧបនាយករដ្ឋមន្ត្រី បានសម្តែងនូវការកោតសរសើរ និងថ្លែងអំណរព្រះគុណ យ៉ាងជ្រាលជ្រៅចំពោះព្រះគ្រូបសន្នចិត្តោ នុត ហ៊ែល ចៅអធិការ វត្តវិហារខ្ពស់ ព្រះថេរានុត្ថេរៈគ្រប់ព្រះអង្គ និងលោកយាយឧបាសិកា តេង អិត ព្រមទាំងគណៈ កម្មការអាចារ្យវត្តទាំងអស់ សប្បុរជន និងពុទ្ធបរិស័ទ គ្រប់ទិសទីដែលបានខិតខំប្រឹងប្រែង ចូលរួមចំណែកក្នុងការកសាងសមិទ្ធផលទាំងនេះឱ្យលេចចេញជារូបរាងឡើង សម្រាប់បម្រើឱ្យ វិស័យព្រះពុទ្ធសាសនា និងទុកជាសក្ការៈសម្រាប់ពុទ្ធបរិស័ទគោរពបូជា។

សូមជម្រាបជូនថា វត្តវិហារខ្ពស់នេះ គឺជាវត្តដ៏ចំណាស់មួយក្នុងចំណោមវត្តទាំង២១ ក្នុងក្រុងឧដុង្គម៉ែជ័យ ដែល បានកសាងឡើងក្នុងអំឡុងឆ្នាំ១៨២២ បើគិតមកដល់បច្ចុប្បន្ននេះ មានអាយុកាល២០២ឆ្នាំ មកហើយ។ ព្រះវិហារវត្តវិហារខ្ពស់មាន មានទំហំ ៣១.៣៥ម៉ែត្រ x ១៥.៣ម៉ែត្រ មានកម្ពស់ ៣២.៥០ ម៉ែត្រ ។ ជាមួយគ្នានេះ ក៏មានសមិទ្ធផលថ្មីៗជាច្រើនទៀតដែលត្រូវសម្ពោធឆ្លងនាព្រឹកនេះផងដែរ ក្នុងនោះ រួមមាន ដងទង់១គូ កម្ពស់ ២៧,៥ម៉ែត្រ, ហោត្រៃ ទំហំ ១៥ម៉ែត្រ x ៩ម៉ែត្រ កម្ពស់ ១២ម៉ែត្រ, កុដិ ២ខ្នង, ក្លោងទ្វារ ដែលមានទទឹង ៥ម៉ែត្រ កម្ពស់ ៨ម៉ែត្រ និងហេដ្ឋារចនាសម្ព័ន្ធដទៃទៀត ដែលគិត ជាទឹកប្រាក់សរុបអស់ប្រមាណជាង ៥៦០,០០០ ដុល្លារអាមេរិក (ហាសិបប្រាំមួយម៉ឺនដុល្លារ អាមេរិក)៕