វិទ្យុជាតិកម្ពុជា
ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រីបណ្ឌិត ប៊ែណាឌៀ អ៊ីរ៉ាវ៉ាទី ជិនដ្រាដេវី Bemadia Irawati Tjandradewi អគ្គលេខាធិការសមាគមទីក្រុងនិងរដ្ឋបាលមូលដ្ឋាន ប្រចាំតំបន់អាស៊ី និងប៉ាស៊ី
ហ្វិក (UCLG ASPAC)និងវេទិកាអភិបាលក្រុងអាស៊ាន (AMF) បានដឹកនាំកិច្ចប្រជុំពេញអង្គ លើប្រធានបទ «ការជំរុញកិច្ច សហការគ្រប់ជ្រុងជ្រោយ ដើម្បីទីក្រុងឆ្លាត មានភាពធន់ និងមានចីរភាព» នៅថ្ងៃទី ២ ខែធ្នូ ឆ្នាំ២០២២។
ឯកឧត្តម ឃួង ស្រេង បានមានប្រសាសន៍ថា៖ កិច្ចប្រជុំអភិបាលរាជធានី និងរដ្ឋធានីអាស៊ាន មានការចូលរួមពីអភិបាលរាជធានី-រដ្ឋធានីចំនួន៩ នៃ ប្រទេសជាសមាជិកអាស៊ាន និង អភិបាលខេត្ត ទីក្រុងសម្ព័ន្ធមេត្រី និងគណៈប្រតិភូនៃបណ្តាទីក្រុងអាស៊ាន ចំនួន ៤៣ ទីក្រុង, អង្គការ-សមាគមអន្តរជាតិ ៧ ស្ថាប័ន និងបណ្តាខេត្ត ក្រុង ទូទាំង ប្រទេសកម្ពុជា សរុបមានគណៈប្រតិភូជាតិ និងអន្តរជាតិប្រមាណជាង ៤០០ នាក់។
ឯកឧត្តមឃួង ស្រេង បន្តថា ៖ រាជធានីភ្នំពេញ នាពេលបច្ចុប្បន្ន កំពុងទទួលរងនូវសម្ពាធ នគរូបនីយកម្ម កំណើនប្រជាសាស្ត្រ ការពង្រីកទីក្រុង និងការប្រែប្រួល អាកាសធាតុ ជាពិសេសកំពុងប្រឈមមុខទៅនឹងបញ្ហាថ្មី នៃការអភិវឌ្ឍ តាមបែបទំនើប ដែលជារលកនៃសកលភាវូបនីយកម្ម គួបផ្សំនឹងវិបត្តិ បង្កឡើងដោយជំងឺកូវីដ-១៩ ក្នុងរយៈពេល ៣ ឆ្នាំចុងក្រោយនេះ ដែលបានបង្កើតជាតម្រូវការ បញ្ហាប្រឈម ក៏ដូចជាកាលានុវត្តភាពថ្មី១ ទាមទារ ឱ្យយើងត្រូវគិតគូររៀបចំផែនការយុទ្ធសាស្ត្រឆ្លើយតប ដើម្បីឈាន ទៅសម្រេចបានទីក្រុងមួយ ដែលមិនត្រឹមតែមានភាពធន់ប៉ុណ្ណោះទ ប៉ុន្តែថែមទាំងមានចីរភាព និងឆ្លាតវៃ ។ ឯកឧត្តមឃួង ស្រេង ជឿជាក់ថា បណ្តារាជធានី- រដ្ឋធានីអាស៊ាន ទីក្រុងសម្ព័ន្ធមេត្រី និងបណ្តាទីក្រុងអាស៊ានទាំងអស់ ក៏កំពុងជួបប្រទះនូវបញ្ហាប្រឈមទាំងនេះ ដូចគ្នាផងដែរ។សម្រាប់ក្របខណ្ឌរាជធានីភ្នំពេញ ក្រោយពេលចូលជាសមាជិក នៃបណ្តាញទីក្រុងវៃឆ្លាតអាស៊ាន គណៈអភិបាលរាជធានីភ្នំពេញ បាន ចូលរួមតាក់តែង «ផែនទីបង្ហាញផ្លូវយុទ្ធសាស្ត្រ ស្តីពីទីក្រុងឆ្លាត និង មានចីរភាពរាជធានីភ្នំពេញ ឆ្នាំ២០២២- ២០២៥» សំដៅលើកកម្ពស់ គុណភាពរស់នៅរបស់ប្រជាជនក្នុងទីក្រុង បង្កើនប្រសិទ្ធភាពក្នុងការគ្រប់គ្រង ក៏ដូចជាប្រសិទ្ធភាពក្នុងការផ្ដល់សេវាសាធារណៈជាសារវន្តជូនដល់ប្រជាពលរដ្ឋ និងដើម្បីជំរុញកំណើនសេដ្ឋកិច្ចរបស់រាជធានីភ្នំពេញ ដោយផ្តោតលើសសរស្ដម្ភចំនួន ៥ រូមមាន៖ ១) ការប្រើប្រាស់ដីធ្លី ២) សុវត្ថិភាព និងសន្តិភាព ៣) ចរាចរណ៍ក្នុងទីក្រុង ៤) បរិស្ថានរស់នៅ វៃឆ្លាត និង៥) អភិបាលកិច្ចឌីជីថល។
ឯកឧត្តមបន្តថា ការអនុវត្តគម្រោងទីក្រុងឆ្លាត គឺជាតម្រូវការចាំបាច់ដែលអាចជួយឱ្យរដ្ឋបាលរាជធានីភ្នំពេញមាន គឺជាតម្រូវការចាំបាច់ដែលអាចជួយឱ្យរដ្ឋបាលរាជធានីភ្នំពេញមាន លទ្ធភាពកាន់តែច្រើនក្នុងការដោះស្រាយបញ្ហាប្រឈមនានា ប្រកបដោយប្រសិទ្ធ ភាព លើបញ្ហាដែលកើតចេញពីភាពរីកចម្រើនយ៉ាងរហ័ស នគរូបនីយកម្ម និងកំណើនប្រជាជនក្នុងទីក្រុង។
ឯកឧត្តម ឃួង ស្រេង បានបញ្ជាក់ថា ប្រធានបទសម្រាប់កិច្ចប្រជុំ នាពេលនេះ គឺសុទ្ធសឹង តែផ្តោតសំខាន់លើកិច្ចសហប្រតិបត្តិការរួមគ្នា ដើម្បីសម្រេចបាន គោលដៅរួម ពោលគឺ ការកសាងទីក្រុងឆ្លាត មានភាពធន់ និងមាន ចីរភាព ជាពិសេសការឆ្លុះបញ្ចាំងពីមូលបទនៃកិច្ចប្រជុំកំពូលអាស៊ាន លើកទី៤០-៤១ ដែលទើបកន្លងផុតទៅថ្មីៗនេះ គឺ «អាស៊ានរួមគ្នាធ្វើ៖ ដោះស្រាយបញ្ហាប្រឈមទាំងអស់គ្នា» ។
ក្នុងកិច្ចប្រជុំនេះ ប្រទេសដែលបានចូលរួមប្រជុំ ដូចជា ប្រទេសប៊្រុយណេ លោក Awang Abdul Walid bin Haji Mataesan លេខាធិការរងអចិន្ត្រៃយ៍ (ក្រុង និងស្រុក) ក្រសួងមហាផ្ទៃប៊្រុយណេដារ៉ូសាឡាម ។ ប្រទេសឥណ្ឌូនេស៊ី (ក្រសួងមហាផ្ទៃ នៃប្រទេសឥណ្ឌូនេស៊ី)។ ប្រទេសកម្ពុជា (តំណាងក្រសួងមហាផ្ទៃ នៃព្រះរាជាណាចក្រកម្ពុជា)។ ប្រទេសឡាវ | ប្រទេសម៉ាឡេស៊ី | ប្រទេសមីយ៉ាន់ម៉ា ប្រទេសហ្វីលីពីន សិង្ហបុរី | ប្រទេសថៃ និងប្រទេសវៀតណាម បានផ្តល់នូវមតិយោបល់ បទពិសោធន៍ពីទីក្រុងរបស់ខ្លួនជូនអង្គប្រជុំ ដើម្បីបណ្តាទីក្រុងដែលចូល រួមយកទៅអនុវត្ត កាន់តែប្រសើរបន្ថែមទៀត ៕
Comments